Senhor Deus ha besti piskumanikakiaki, na hãtxarã
43
Hakia natianã, Jacó enabu Israelbuũ, nĩkakãwẽ.Senhor Deusũ matu dami wanitũ matu yuikĩ:
“Dateyamakãwẽ, matu iyunibu haria hatu putamabirãkĩ ẽ matu tashnimabiranimaki.
Eã matu katunishũ matũ kenawẽ kenakĩ ena ẽ matu waniki.
2 Mã hene pukebainaya ẽ matubetã pukekubaĩshanaii.
Hene besusi pukebaini mã hasama ishanaii.
Matumebi mã txi anu napukubia mã menuama ishanaii,
ha herepã matu dawakara akamarã.
3 Earã, ẽ Israelĩ enabũ Senhor Deus meribi matũ piskumanikaki.
Matu tashnimakinã, matu ana ena wakĩ bikatsis ikĩ
ha nawabu Egito inũ, Etiópia inũ, Sebá habũ matu itxakawaibu
hatu matu kupishũkĩ Pérsia nawabuwẽ ẽ matu tashnimabirãshanaii.
4 Matu yaushihairakĩ matu benukatsi ikama ẽ matu betxipaiaii.
Matũ hiwea piskumatã matu benukatsi ikama
hunibu inũ mai pakea tibi hari ẽ matu inãniki.
5 Dateyamakãwẽ, ẽ matube niakirã.
Matunabu ana itxawakĩ nenuma bari huaikiria inũ bari kaikiria
hatu iwekĩ ẽ txĩtũwãshanaii.
6 Nortekiri hiweabu eã hatu yuikĩ:
‘Enabu ea ana hatu nitxĩshũrikãwẽ’, akĩ
sulkiri hiweabu hatu yuikĩ:
‘Enabu ana hari yaushiama
ẽ huni bakebu inũ ẽ aĩbu bakebu
nenuma mai kesukauna anua ea hatu iweshũrikãwẽ.
7 Dasibi enabu ẽ kenaya
habũ ea duawakĩ yurabu ẽ kushipa hau uĩmashanũbũ
hatu dami wakĩ ẽ bawanirã, ea anu ana hatu iwerikãwẽ’ ”, iwanã,
8 “Enaburã, ea anu nitxĩkãwẽ.
Haburã, beruyabia beshushbuki.
Pabĩkiyabia nĩkaisma patabuki.
9 Mae tibi anuabu inũ nawabu mã shukuakeakeaburã,
hanus hatube mã itxatiruki.
Haska Deusũ hawenabu merabewai kai
tsuã bebũkiri unãtã yuitirubu ikimamẽ?
Haska txanimamẽkaĩ, tsuãra uĩmashũ nuku bebunua txanikãwẽ,
nũ nĩkanunã, haska yui kayabimẽkainã”, ikĩ
10 Senhor Deusũ hawẽ hãtxa kaneama mestẽwãkĩ:
“Habia mã matubuki, ẽ txaninikaburã,
mã ẽ tsumabu inũ eã ẽ matu katunirã.
Ea unãtã ea ikũwaĩ eki txiti ikĩ
ẽ Senhor Deus dasibi binua
mã ea unanũbũ ẽ matu katuniki.
Ẽ iriamakẽ tsua deus betsa hayama iniki.
Ha inũ, uatiã ea katxu betsa hayatirumahairaki.
11 Ea besti ẽ Senhor Deuski.
Eamaki hawa tsua betsa piskutirubumaki”, itã
12 Senhor Deusũ hawẽ hãtxa kaneama mestẽwãkĩ:
“Ea bebũkiri matuki txani hãtxanishũ piskumakĩ ẽ matu pashawaniki.
Yushibu betsã matu mekekĩ matu ashuãma ini matũ ibubu inũ matubunã, uinishũ mã unãhairaii.
13 Ea ẽ tashninirã, hawa betsama habias ẽ ipakeaii.
Ẽ kushipa mebĩkĩ tsuã ea henematirumaki.
Hawara ẽ akai tsuã ea binumakĩ txakabuwatirumaki.”
14 Israelĩ Senhor Deus meribi
hatu mebikinãkũkaĩmis hatuki txani:
“Matu hari pashawakinã, Babilônia hunibu ẽ hatu yunushanaii.
Haria matu tashnimabirãkatsirã, bai tibi ẽ matu bepẽshũshanaii,
Caldéia nawabũ matu iyui matuwẽ benimabiabainibu habũri bika teneshãkanikiki.
15 Earã, ẽ habia Israelĩ damiwanika meribi Senhor Deus ẽ matũ shanẽ ibuki.”
16 Hanushũ Senhor Deusũ ianẽwã merã bai tapĩtã
hene mesebiakẽ hanu bai watã
17 detenamenika mẽtsisipabu hatũ detenameti cavalo inũ hawẽ tarãbaĩti ha baiwẽ buaibu
hanu hatu yamawakĩ ana haska benitima wakĩ
hanu besti hatu desũshanikiki,
bĩ pahi hi ikai nukawa keska wakinã.
18 Haska washanaiwẽ taeshũ Senhor Deusũ hawenabu hatu yuikĩ:
“Haska uatiã mã hiwekũkirãshina ana shinãyamakãwẽ,
mã bika tenekubirãshina ana has shinãma hakimairã.
19 Eanã, mã haska hiweisma betsa bena ẽ matu ashuaĩ
natiã tashniai ibubis mã uĩshanaii.
Hanu tsua hiweabuma anu ẽ matu bai pesashũshanaii.
Ha mai anu hawa hukuĩsma anu hene tuekĩ ẽ habawashanaii.
20-21 Habu enabu wakĩ hau ea kẽwãshanũbũ ẽ hatu katuni
habu ekiri txanibaũshãkanikiki.
Hanu tsua hiweabuma inũ hanu hawa hukuĩsmanu
ũpash tuekĩ ẽ hatu habawashũshanaii.
Ẽ hatu haska washuna ha ũpash akaibũ
hanushũ yuinaka pianã betsa betsapabu inũ, kamã inu inũ, pupũ habũri ea duawashãkanikiki.
22 Jacó enabu mã Israelbu matunã,
ea kenakatsi ikama eki txikishi mã ma ea hakimaki.
23 Ea benimawakĩ txashuwã mã ea menushunama inũ
ea duawakĩ mã ana ea hawa inãkuĩsmaki.
Mã ekiri hakimaya ana matũ inãkuĩ inũ sheni ininipa:
‘Ea inãkãwẽ’, iwanã, matu bika wai:
‘Menã, menã’, ikĩ ẽ matu yukama ikũkainimaki.
24 ‘Hawara ininipa peiwẽ bitã mã ea benimawanũ’, ikai
ẽ matu yunuama inũ,
ha binumakĩ: ‘Yuinaka sheni ea kuashũkãwẽ’, iwanã,
ẽ matu hawa yunuamaki.
Hamẽ haskama maturã, atimapa tibikĩ ea danãmakĩ txakabukĩ
mã ea bika tenemakubainaii.
25 Mã pubẽ sinatapabubiakẽ ea ẽ matũ Deus matuwẽ nuikĩ
matũ txakabu ana tanakatsi ikama matu tere ashũtã ẽ ana shinãma ishanaii.
26 Ẽ matu haska wamismẽkaĩ, mã ea txitekatsis ikairã,
unanepa pewanika anushũ pewanãkãwẽ.
Mã ea txitekĩ pepa kaĩmaimẽkaĩ, txanikĩ ea uĩmai bekãwẽ, nũ uinananunã.
27 Ha dukũ matũ shenipabu txakabui taeniki.
Matũ yusinãbũ ẽ hãtxa txibãma ea dananibuki.
28 Ẽ Templo shanẽ ibu mekenikabũ atimapa wakĩ ea txibã pewabumakẽ
ẽ hatu beshtekubainiki.
Na haska tibiwẽ taeshũ Jacó enabu mã Israelbu
hau matuki kashekĩ nuitapa wayunũbũ hatu yunukĩ ẽ matu heneniki”, itã,