14
Aĩbu unanepatũ hawenabu tibihatu pe mekekubaĩmisbuki.
Hakia aĩbu pe shinaĩsmatũ
hawenabu hawa hatu pe mekeama
hiwe txakamakubaĩmisbuki,
hiwe teke teke aka keska wakinã.
2 Tsuara txanima hiwei peshũ
Senhor Deus duawakĩ benimawamisbuki.
Hakia tsuara hiwei peama kanekubaĩkinã,
Senhor Deus danãkubaĩmisbuki.
3 Unaĩsmapatũ ibubis kẽkĩ
hawẽ hãtxa kushipawẽ hatu kũyã amisbuki.
Hakia unanepatũ hawẽ hãtxa pepawẽ hatu pe mekekubaĩmisbuki,
tsua sinatamamarã.
4 Ina awa hayamawẽ taea hatũ bai anu
shekiwã trigo hayabumaki.
Hakia ina awa hawẽ kushipawẽ hatũ bai anu mai sheshaimashũ
shekiwã trigo itxapa tsekakubaĩmisbuki.
5 Tsuãra hawara ikaibu ibubis uĩtanã, txanitxakama yui kayabitirubuki.
Hakia tsuãra uiãmabia kaka besti nĩkatã txanitxaka bestimisbuki.
6 Tsuara yunua nĩkaismatũ
unanepanũ ishũ unanepã hãtxa benabiai haki nukutirumaki.
Hakia nĩkanikabũ hãtxa bena tapĩkinã,
hawa bikama hawaira tapĩkubaĩmisbuki.
7 Unaĩsmapabũ hãtxa nĩkakĩ
mĩ hawa tapĩtirumawẽ taea
hatube haibunameama tari mapukubaĩkãwẽ.
8 Huni pepa unanepatunã, haska pe hiwetiru
bebũkiri unanepakĩ unãkubaĩmiski.
Hakia unaĩsmapa pe hiwetiruma ibubis parananãmisbuki.
9 Unaĩsmapaburã, kanei kashekenãmisbuki.
Hakia huni duapaburã,
hatube haibunamekĩ hatu merabewakĩ
hatu benimawakubaĩmisbuki.
10 Huni tibitũ hatũ huĩtinĩ hawara bika teneai inũ
haskai benimai hamesti shabakabi unãtiruki,
tsua hawa unãmamarã.
11 Huni txakabubũ enabu txakabuwakĩ yamawashãkanikiki.
Hamẽ huni duapa nuikipabũ enabu pe hiwei pakubaĩshãkanikiki.
12 Hiwei pea dabanẽ merabenã bestikũkaini hãtxai hiwemisburã,
bari hawẽ heneaitiã Deusũ hawẽ huĩti pema unãtã hatu kupishanikiki,
mawa kayabimakinã.
13 Bemakis usãbiai huĩti uke merã
bika tenei hawawẽ haskatima mĩ isĩ tenetiruki.
Haskai bemakis benimabiashina
hawẽ henei kashatirubuki.
14 Haska unaĩsmapabu hawẽ hiwea pemabiakẽ
hiwekũkaini benimakubaimisbuki.
Hakia huni pepabũ haska pe wakubaĩmisbuwẽ
benimai shinã txãkãkubaĩmisbuki.
15 Huni betsã bebũkiri tapĩtã pe shinaĩsmatunã,
hawara yuiaibu nĩkatã hawa shinãma
hawaira ikũwãmisbuki.
Hakia huni betsã bebũkiri pe shinãmisbunã,
dasibi pewatã mapumisbuki.
16 Unanepabu txakabuwẽ datekĩ henekubaĩmisbuki.
Hakia unaĩsmapabu txakabuwẽ dateama
nashui ika mapumisbuki.
17 Tsuabura shinãma hawaira sinatakĩ
txakabuwakubaĩmisbuki.
Hakia tsuabũra bebũkiri pe shinãtã
hawaira sinataisbumaki.
18 Huni betsã bebũkiri pe shinaĩsmarã,
hawẽ unaĩsmapawẽ taea hiwei peismaki.
Hakia huni betsã bebũkiri pe shinãmisrã,
unanepai hiwea dasibibũ uĩtirubuki.
19 Huni txakabubũ huni pepabu bebũ
dãti iki beti itã hatu kẽwãshãkanikiki.
Huni pepabũ hiwe hikiti shui anushũ
huni txakabubũ hatu ea ashãkanikiki.
20 Nuitapaiburã, hatũ haibuaibũ dikabi hatu danãkubaĩmisbuki.
Hakia mabu itxapayaburã, haibu mirima hayamisbuki.
21 Hatu dapi hiweabu tsuãra merabewama danãkinã,
Deusũ yusiã txibãma txakabuwaikiki.
Hakia tsuara nuitapaibuwẽ nuikĩ merabewai benimakũkaĩmiski.
22 Tsuãra txakabuwanũ ishũ benabaũkinã,
bai pepa benumisbuki.
Hakia tsuãra pepa besti anũ ishũ benamisburã,
yurabũ hatu betxipaikĩ txibãkĩ
hatu hawa heneisbumaki.
23 Tsuara daya txakayamakũkainirã,
piti inũ mabu hayakubaĩmisbuki.
Hakia hawa wamabia hãtxa bestikubaĩmisburã,
hawa hayama nuitapakubaĩmisbuki.
24 Unanepabũ hatũ shinã pepahairarã,
maiti hawẽrua sawea keskabuki.
Hakia habu unaĩsmapabũ hawẽ hatu uĩmairã,
maiti atimapa sawea keskabuki.
25 Tsuãra hawara ikaibu ibubis uĩtanã,
shanẽ ibu yui pewashuna hawẽ hãtxa ikũwãkĩ
huni betsã hiwea piskumatirubuki.
Hakia tsuãra uiãmabia kaka besti
nĩkatã txanitxakakĩ shanẽ ibu tenãmatirubuki.
26 Tsuãra Senhor Deus ikũwãkĩ duawai
hawa dateama hiwekubaĩmisbuki.
Haska hawẽ ibu hiwea uĩkubaini
hawẽ bakebu hawa datetirubumariki.
27 Senhor Deus duawakĩ mĩ benimawairã,
habia mĩ hiwea kayabiki,
mawa kayabi mĩ ma binushinawẽ ana dateamarã.
28 Shanẽ ibu kushipakĩ yura itxapa yunukubainaya kẽwãkubaĩmisbuki.
Hakia yura eskarabes yunukubaini
hatũ shanẽ ibu babui ana kushipamakẽ
ana hawa nĩkatirubumaki.
29 Tsuara hawa hĩ hĩ ikama unãshubira hãtxakĩ
hawẽ unanepa hatu uĩmakubaĩmisbuki.
Hakia tsuara hĩ hĩ iki hawaira hãtxakĩ
hawẽ patapa hatu uĩmakubaĩmisbuki.
30 Tsuãra hawara bika teneai henetã
ana hawẽ nuiamakẽ hawẽ yuraki isĩ hikitirumaki.
Hakia huni betsã mabu uĩ habias hayarianũ ika kemumisburã,
hatũ yuraki isĩ shauki tekitã txapuai keskabuki.
31 Tsuãra nuitapaibu bika tenemakĩ itxakawakinã,
hatũ damiwani Deus danaĩ haki sinatamamisbuki.
Hakia tsuara nuitapaibuwẽ nuikĩ
hatũ damiwani Deus duawakĩ benimawakubaĩmisbuki.
32 Huni txakabu hatũ txakabuwẽ txakabuwai di imisbuki.
Hakia huni pepabu duapakubaini
hawẽ pepawẽ hawa dateama unanuma mawatirubuki.
33 Tsuabũra bebũkiri pe shinãkubaĩmisburã,
hatũ shinã merã unanepa hãtxa hayabuki.
Hakia unaĩsmapabũ unanepati hãtxa hawa tapĩtirubumaki.
34 Hatũ yunuti kushipa pepawẽ
nawa shukua betsa shanẽ ibui ibubis kẽkubaĩmisbuki.
Hakia shanẽ ibũ txakabuwakĩ
kanekubainaiwẽ hawenabu dakekubaĩmisbuki.
35 Dayarubu pepa anikabu shanẽ ibubũ hatu betxipaikubaĩmisbuki.
Hakia dayarubu mawaira anikabumarã,
shanẽ ibubu hatuki sinatakubaĩmisbuki.