13
Hawẽ bake unanepatũ hawẽ epã nemati hãtxa nĩkashũ txibãkubaĩmiski.Hakia bake habiaska beyai nĩkaismatunã,
hawẽ epã nemati hãtxa danãkĩ hawa txibaĩsbumaki.
2 Haska hãtxamisbu tibi hatũ manakuti bishãkanikiki,
pe inũ txakabu yuimisbu tibiwenã.
Hakia huni pubẽ detenamemisbunã,
ana hatu detekĩ txakabuwanũ ishũ
txakabu besti benakubaĩmisbuki.
3 Tsuãra hawẽ hãtxa mekemis ibubis meketirubuki.
Hakia tsuãra hamapai yui hãtxawãmisrã,
hamẽ hawena besti benushanikiki.
4 Txikishbũ hawara betxipaikĩ bikatsis ibiai hawa bitirubumaki.
Hakia dayakapaburã, hamapai hayakubaĩmisbuki.
5 Huni pepabũ txani hãtxa danãmisbuki.
Hakia huni txakabubũ hawara atimapa akai
uĩ hawẽ dakemisbuki.
6 Huni duapabu hatũ pepawẽ mekemisbuki.
Hakia hunĩ txakabuwakubaĩmisbu
hatũ txakabuwẽ keyui yamamisbuki.
7 Huni betsabu hawa hayamabia:
“Ẽ mabuyaki”, iki kẽmisbuki.
Hakia tsuara mabu itxapa hayabia shabakabi yuiama
nuitapai keska hiwemisbuki.
8 Yumetsubũ hau hatu tenãyamanũbũ
mabu itxapayabũ hatũ peiwẽ hatu daewatã
hawẽ hiwea piskutirubuki.
Hakia nuitapaiburã,
tsua hatuki sinatamawẽ taea hawa nĩkama hiweabuki.
9 Huni pepabu bĩ txashahaira keska benimamisbuki.
Hakia huni txakabubu bĩ nuka keskabuki,
hawa benima hayamarã.
10 Hunibu ibubis kẽkĩ hatu txakabuwamakubaĩmiski,
hatu detenamemakinã.
Hakia huni unaneparã,
keãma yusiã pepa nĩkamisbuki.
11 Dayai parananãtã mabu hawaira itxawamisburã,
hawaira hawẽ mabu keyushãkanikiki.
Hakia tsuãra unãshubira dayakĩ
mabu itxawakubainairã, ewawashanikiki.
12 Hawara akatsi shinãbiaya hamapai betsawẽ taea tea
atiruma unaĩ huĩti nishmamisbuki.
Hakia haska uĩkatsis ikĩ shinãkĩ manakamis
tashniaya benimamisbuki.
13 Yunuti hãtxa danãkĩ pe shinãma
hawara kanetã aitĩ itxakayamatiruki.
Hakia yunuti hãtxa nĩka pewatã txibãkĩ
manakuti pepa bishanikiki.
14 Unanepã yusĩti hãtxa nĩkairã,
hawẽ hiwea hayashanikiki,
ha mawawẽ datemis piskuirã.
15 Tsuãra pe shinãkĩ akĩ pewabainaya
hunibũ kẽwãmisbuki.
Hakia parananaĩ txanitxakakubaĩmisbu
ana haskatã petirubumaki.
16 Unanepatũ bebũkiri pe shinãtã hamapai amisbuki.
Hakia unaĩsmapatũ hamapai txakabuwakĩ
shabakabi hatu uĩmakubaĩmisbuki.
17 Hãtxa bunika txakabunã,
hatũ hãtxa txani peama hatu txakabu tueshũmiski.
Hakia hãtxa bunika pepã hatũ hãtxa pepa txanikĩ
hatu daewakĩ benimawamisbuki.
18 Hawẽ merabewati yusĩti hãtxa tsuãra danãmisrã,
yumaĩ dakekubaĩshãkanikiki.
Hakia merabewati yusĩti hãtxa tsuãra nĩkamisbu
yurabũ hatu kẽwãshãkanikiki.
19 Hawara haska betxipaiai akĩ menetanã,
hawẽ benimamisbuki.
Hakia unaĩsmapabunã,
shinã betsa watã hatũ txakabu henekatsi isbumaki.
20 Unanepabube haibunãtanã,
hawẽ unanepa hãtxa mĩ tapĩkubaĩshanaii.
Hakia unaĩsmapabube haibunãkinã,
hatũ txakabu tapĩkĩ matũ beya pepa mã putashanaii.
21 Habũ txakabu mekubainaiburã,
hatũ txakabuwẽ betsa betsapa tenemisbuki.
Hakia pepabunã, manakuti pepa bi hawẽ benimamisbuki.
22 Huni pepabu mawakĩ
hatũ yusiã pepa inũ mabu pepa
hawẽ bababu heneshũbaĩmisbuki.
Hakia hunĩ txakabuwamisbũ
mabu itxapa itxawashinarã, mawaya
huni pepabũ bikĩ ibuwashãkanikiki.
23 Nuitapaibũ bai anu piti hamẽ ibiaya
tsuã hatu pe mekeama hatu itxakawakĩ
hatũ piti hamẽ hatu benũtirubuki.
24 Tsuãra hawẽ bakebu betxipaiamarã,
txakabuwai hatu nemakĩ pewakatsi isbumaki.
Hamẽ tsuãra hawẽ bakebu betxipaikinã,
hatu yusĩkĩ bebũkiri nema pewakubaĩmisbuki.
25 Huni pepatũ pikĩ yaniwatã
benimai shinã txãkãkũkaĩmiski.
Hakia huni txakabũ pibiai bunikũkaĩmiski.