12
Tsuãra nemati betxipaikĩ txibainã,habiawẽri unanepati hãtxa betxipairiaikiki.
Hakia tsuara nemakĩ yusĩbiabu danãmisburã,
unaĩsmapa bestiki.
2 Huni duapa pepabuwẽ taeshũ
Senhor Deusũ hatu duawakubaĩmiski.
Hakia yusĩti pe shinãma
parananãkĩ txakabu besti yui dakeisbumarã,
Senhor Deusũ danãkĩ hatu kupishanikiki.
3 Hunibũ txakabuwamisburã,
ha txakabunã, hawẽ hatu mestẽwãtirumaki,
hiwe txibu hayama keskarã.
Hakia huni pepabu hatũ hiwea mestẽwãti
hi tapũ uke merãhaira beshea keskabuki,
tsuã hatu betsetirumarã.
4 Aĩbu unanepa pepatũ hawẽ bene duawakĩ
shanẽ ibuhaira keska wa hawẽ taea kẽtiruki.
Hakia hawẽ aĩ txakabutũ hawẽ bene duawakĩ merabewama
hawẽ hiwea txakabuwamakĩ
nuitapawamiski, ana hatu shinãtima wamakinã.
5 Huni pepabũ hawara pepa besti akatsi ikĩ
ha besti shinãkubaĩmisbuki.
Hakia txakabubu parananã bestikatsi shinãkubaĩmisbuki.
6 Huni txakabubũ hãtxarã,
hanushũ hatu tenãti birũ keskabuki.
Hakia huni pepaburã,
hawẽ hãtxa pepawẽ taea
hamapai txakabu anua piskutirubuki.
7 Huni txakabubũ kanekubaini
hawẽ hiwea beshtekei mawamisbuki.
Hakia pepabu hatũ hiwearã,
unanuma hiweyukubaĩmisbuki.
8 Tsuãra pe shinãkĩ hawaira tapĩhairanikarã,
haburã, hatu kẽwãkubaĩmisbuki.
Hakia tsuara tatima unaĩsmaparã,
hawa hatu kẽwãma danãkubaĩmisbuki.
9 Tsuara kẽwãma danãbiaibũ
hawẽ tsumapã merabewakĩ dayashuna haskai
pe hiwetirubuki.
Hakia tsuara kẽwãbiakubaĩmisbu
hawẽ piti itxapa hayamakẽ pematiruki.
10 Huni pepabũ hatũ inabuwẽ nuikĩ
hatukiri shinãkĩ pe mekekubaĩmisbuki.
Hakia huni txakabuburã,
hamapai tibiwẽ hawa nuiama
hakiri shinaĩsbumaki.
11 Huni dayakaparã, hatũ bai anu mibã
piti hamẽ imiski.
Hakia unaĩsmapatũ hawa daya pepa akamarã,
hawa piti itxapa hayatirubumaki.
12 Huni txakabubũ hawara txakabu betxipaikĩ shinãmisburã,
hisĩ keskawẽ neshea hani pashatirubumaki.
Hamẽ huni pepaburã,
hi tapũ txaipa haya keska
hatũ shinã pepawẽ kushipakĩ
pepawakubaini mestenepa hiweabuki.
13 Huni txakabubũ txanitxakamisbuwẽ taea
ibubis hatũ txakabuwẽ beshekea
hani pashatibubumaki.
Hakia huni pepabu txakabu anua kaĩbaini pashamisbuki.
14 Haska huni tibi hãtxamisbu bishãkanikiki,
pe inũ txakabu yuimisbu tibiwenã.
Hanua haska akubaini dayakubaĩmisbu
haskawẽ hatu pakarã,
txakabu kasmai pepa bishãkanikiki.
15 Yusiã nĩkaisma unaĩsmapaburã,
dasibi hawara akubainai:
“Ẽ pe hiweaki”, ishũ shinãkubaĩmisbuki.
Hakia huni unanepabunã,
huni betsã hatu merabewakĩ pe yusiaĩbu nĩka pewakubaĩmisbuki.
16 Huni unaĩsmapabu hawaira sinatakĩ
hawa huneama shabakabi hatu uĩmamisbuki.
Hakia unanepabu hatu yuaĩ hatuki kashebiabu
nĩkabiakĩ hatu dabaĩsbumaki.
17 Huni pepabũ hawara ikaibu uĩ pewatã
txanima hãtxa besti yuimisbuki.
Hakia huni txakabũ hawara uĩ pewamabia
txanitxaka bestikĩ yuikubaĩmisbuki.
18 Huni betsa hawa shinãma
hatu hãtxa txakabu yuikinã,
nupewẽ hatu txatxikĩ akawamisbuki,
hawa merabewamarã.
Hakia unanepabũ hatu yusĩkinã,
hatu merabewamisbuki,
dau pepa sheama keska wakinã.
19 Tsuabũra txanima hãtxa besti yuimisburã,
hiwei ikibi ishãkanikiki.
Hakia tsuabura txanitxakamisburã,
hawẽ hiwea hawaira keyushanikiki.
20 Huni txakabũ shinaĩ yubakairã,
txanitxakai parananãmisbuki.
Hakia tsuabura unanuma hiweshũ merabewakĩ
hatu yusiaĩbu nĩkai benimamisbuki.
21 Huni pepatũ hawa txakabuwaismakẽ
txakabũ nuitapa watirumahairaki.
Hakia huni txakabũ dasibi txakabu betsa betsapa amis
betsa wama dasibi haki dasi wabaĩ Deusũ hatu kupia nuitapamisbuki.
22 Habu txanitxakamisbu betxipaiama
Senhor Deusũ hatu danãmiski.
Hakia tsuabura hawa txanitxama yui pewakubainaibu
hatu uĩ hatuwẽ Senhor Deus benimahairamiski.
23 Tapĩhairanika ibubis kẽkĩ
hawara shinãkĩ unaĩ shabakabi hawaira hatu tashnimashuĩsmaki.
Hamẽ unaĩsmapabũ hawa shinãma
hawara hãtxa pema yuibaũmisbuki.
24 Dayakapã daya pe tapĩtã hatu yunushanikiki.
Hakia habu txikishburã,
huni betsã tsuma washũ hatu dayamamisbuki.
25 Tsuãra hawara bika tenehairai huĩti nishmai punu nukamisbuki.
Hakia tsuãra hãtxa pepawẽ bika teneaibu
merabewakĩ hatu benimawatirubuki.
26 Huni pepabũ habu ha dapi hiweabu
hatu haibuwakĩ hatu yusĩkĩ pewakubaĩmisbuki.
Hakia huni txakabubu hiwe txakai
bai txakabu txibaĩ benumisbuki.
27 Huni txikish piaya kashunã,
hawa tsakaisbumaki.
Hakia huni dayakapa hiwearã,
hamapai itxapa bitã hayamisbuki.
28 Yunuti pepa kushipa ha baiwẽ kairã,
hawẽ hiweti hayaki.
Hakia unaĩsmapabu hiwei peisbuma
hatũ hiwea benui mawa bestimisbuki.