11
Hawẽ balançawẽ tana pewamarã,Senhor Deusũ danãkĩ betxipaismaki.
Hamẽ hawẽ balançawẽ tana pewamisrã,
Senhor Deusũ betxipaimiski.
2 Tsuara ibubis kẽbiamis
hawara txakabu ashiã tashniaya dakeshanikiki.
Hakia habu ibubis hawa keĩsbumarã,
unanepaki.
3 Huni pepabũ hatũ beya pepa tapĩtã txibãmisbuki.
Hakia huni txanitxakamisbũ
ibubis txakabuwakubaini
hawẽ txani hãtxawẽ taea yamamisbuki.
4 Senhor Deusũ hanu unãti wakĩ hatu kupiaitianã,
tsuara mabu itxapayabia
hawa hatu merabewatirumaki.
Hakia tsuara hawẽ yunutiwẽ parananãma ikũkainairã,
mawa kayabi anua Senhor Deusũ hatu pashawashanikiki.
5 Huni pepabũ kaneaibũ
ha yunuti pepatũ hatũ shinã
hatu kayatapĩmakubaĩmiski.
Hakia huni txakabubũ kanekĩ
hatũ txakabuwẽ ibubis ana pikumisbuki.
6 Huni pepabũ yunuti pepa shinaĩ txakabu anua pashamisbuki.
Hakia parananaĩ huni betsã hawara bianũ ika hawẽ kemumisburã,
hatũ txakaburã, hawẽ yabukua keskaki.
7 Hamẽ huni txakabu hiweshũ
hamapai tibi itxawanũ ishũ shinãbiamisbu
mawai hakimai dasibi keyushanikiki.
8 Huni pepabu tsuãra hatu bika tenemaibu
Deusũ hatu pashawakĩ merabewatã
hanushũ huni pepatũ shãtukũ huni txakabu
Deusũ hatu bika tenemamiski.
9 Huni txakabũ habe hiweabu
hawẽ hãtxa bestiwẽ hatu nuitapawamisbuki.
Hakia tsuabura hatu itxakawabiabu
unanepa hãtxawẽ pepabu
ibubis mekei pashatirubuki.
10 Huni pepabũ hatũ daya pepawẽ hamapai itxawaibũ
mae anu hiwea dasibibu benimakubaĩmisbuki.
Hamẽ txakabubu mawaibũ
mae anu dasibi hiweabu benimai besimisbuki.
11 Huni pepabũ hatũ hãtxawẽ hatu merabewakĩ
hatũ mae pewakĩ ewawakubaĩmisbuki.
Hakia huni txakabubũ hãtxa txakabuwaiwẽ taea
hatũ mae txakabuwaya
yurabũ henebaĩmisbuki.
12 Pe shinaĩsbumã hatũ haibuaibuki hãtxa txakabumisbuki.
Hakia unanepaburã, haska shinaĩ hãtxaisbumaki.
Pes bestikubaĩmisbuki.
13 Huni txanikepatũ hawa huneama
dasibi hatu yuibaũmisbuki.
Hakia huni pepatũ hawara hune nĩkatã
hawa hatu yuiama mekekubaĩmisbuki.
14 Shanẽ ibu yununika pepamakẽ
ha txibaĩ hawenabu babui petirubumaki.
Hamẽ shanẽ ibũ hatu meke pewakinã,
hawẽ merabewanika unanepa itxapabũ merabewakĩ
yusĩ pewabu hatu nĩkatã
hawenabu hatu piskumatiruki.
15 Huni betsã hatu pei biãyukatsis ikai inãbumakẽ
tsuãra yubatã inãmaimarã, harã, nuitapashanikiki.
Hakia tsua haska shinãmakĩ amaismarã,
unanuma hiwetirubuki.
16 Aĩbuaibu duapa pepabu
betxipaikĩ hatu kẽwãkubaĩmisbuki.
Hakia tsuara yurabuki hawa dateama
hawẽ hãtxa kushipawẽ hatu mesewatã
pei itxapa bi bestimisbuki,
tsua hatu kẽwãmamarã.
17 Tsuara nuikipakĩ hatu merabewamiswẽ taea
ibubis pe hiwekũkaĩriamiski.
Hakia tsuara hatuki sinatai hatuwẽ nuisbumawẽ taea
ibubis hiwe txakariakubaĩmisbuki.
18 Hunibu dayatxakamisbu manakukinã,
parã bestishãkanikiki, hawa pe inãmarã.
Hakia tsuara parananãma pepa wakubaĩmisburã,
hawẽ manakuti pepa inãshãkanikiki.
19 Yunuti hãtxa pepa kushipa txibãkubaini
hiwea kayabi anu kashanikiki.
Hakia txakabu akaibu txibainã,
hawẽ taea mawa kayabi anu kashanikiki.
20 Tsuãra txakabu besti wanũ, iwanã, shinãmisbu
Senhor Deusũ hatu betxipaiama danãmiski.
Hakia tsuãra hawa txakabu meisma
pe besti hiwekubaĩmisbu
Senhor Deusũ hatu uĩ benimahairamiski.
21 Txanima kayabi huni txakabubu
hanu hatu kupiaitiã hani pashatirubumahairaki.
Hakia pepabu hawa hatu kupiama
hawama kaĩbaini pashashãkanikiki.
22 Aĩbu hawẽruabia hawa tapĩkĩ
pe shinaĩsmarã, hamẽki.
Ina yawa hawẽrua wakatsi
ha mane ouro meitxikiti karuhairawẽ hamẽ
deuwatirubu keskarã.
23 Huni pepabũ haska betxipaimis akinã,
pepa tashnimakubaĩmisbuki.
Hakia huni txakabubũ hawa shinãma haska betxipaiai
akĩ hatu sinatamamisbuki.
24 Tsuabura hawa yaushiama hawẽ hawara pashkatã inananãmisbu
hatu inãmisbu binumakĩ itxapa bikubaĩmisbuki.
Hakia inananãma yaushimisbu
hawa hayamai nuitapamisbuki.
25 Hawara haya yaushiama pashkatã
hatu inaĩwẽ taea
hatũ hawara Deusũ hatu inãkubaĩmiski.
Tsuabũra hawẽ mabu hatu inãmis
betsabũ hari inãriamisbuki.
26 Tsuabũra hawẽ shekiwã trigo
hawẽ karu ana shekeshanũ, iwanã,
yaushiai keskakĩ mekekĩ aruyukẽ
hakiri hãtxa txakabu yuimisbuki.
Hakia tsuabũra hawẽ shekiwã trigo
hawẽ karu shekema peiwẽ hatu inananãmisbu
hatu duawamisbuki.
27 Tsuãra pewẽ hatu merabewakĩ duawaya
haska aki pe hiwea uĩtã betxipaishãkanikiki.
Hakia tsuabũra txakabuwakubainaibu
habia hawẽ txakabũ hatu atxishanikiki.
28 Mabu itxapa haya ha bestiwẽ hiwenũ ikubaĩmisbu
ni pei shanatã niri imis keskabuki, benuirã.
Hakia hi hawẽ pei niri iki keyubiatã
ana hukũkirãmis keskai
huni pepabu bika tenebiatã
ana hawa teneama pe besti hiwekubaĩtirubuki.
29 Hawenabube hiwea merabewakĩ hatu pe mekeama
pashkakainima hawa hayama ishanikiki.
Hanua unaĩsmapaburã,
unanepabũ hatu tsuma wakubaĩmisbuki.
30 Tsuabũra yunuti pepa kushipa txibaĩ
hiwei petirubuki.
Yura betsa txakabubiakẽ
tsuãra ha huni hawẽ shinã betsa wamakĩ
Deus txibãmairã, ha huni unanepaki.
31 Na mai anu hiweabu pepabũ
hatũ manakuti pepa biaibũ
habũ Deusũ hãtxa nĩkaisbuma inũ
txakabuwamisbu hatu manakukĩ
haska betxipaimisbu txakabuhairawẽ hatu kupishanikiki.