Salomãonẽ yusĩti hãtxa kene pewakubainibukiaki, na hãtxarã
10
Salomãonẽ unanepa hãtxa nĩkakãwẽ.Hawẽ bake unanepatũ hawẽ epa benimawamisbuki.
Hakia hawẽ bake nĩkaismatũ
hawẽ ewa kashamakĩ punu nuka wamisbuki.
2 Mabu besti itxawakĩ hatu parãtã itxawairã,
hawẽ pe hiwetirubumaki.
Hakia haska Deusũ betxipaiai pepa besti txibãkubaĩmisburã,
mawa kayabi anu kama piskutirubuki.
3 Huni pepabu buniaibu
Senhor Deusũ merabewakĩ
hatu piti inãkĩ bunimamamiski.
Hakia huni txakabubu hawara piti pepawẽ kemuaibu
Senhor Deusũ hatu yaniwamaismaki, kupikinã.
4 Tsuara eskarabes dayamis
hawa hayama nuitapakubaĩmisbuki.
Hamẽ tsuara daya txakayamamisburã,
dasibi hayakubaĩmisbuki.
5 Unanepabũ mibãshũ
bari tibi hushiaĩ tsekashũ
hatũ hiwe anu arumisbuki.
Hakia mibã biaimashũ
tsuara haki petxitã biama benushinarã,
txipu nuitapai ea iki dakemisbuki.
6 Huni pepabu hatũ pepawẽ Deusũ hatu duawamiski,
hawẽ pepawẽ manakukinã.
Hakia huni txakabũ bemakis hatu pewabiakĩ
uke merã txakabu shinaĩ hatube detenamemisbuki.
7 Huni pepa uĩkĩ Deusũ duawamis
betsabũ hawẽ pepa shinãkĩ hakimaisbumaki.
Hakia huni txakabukiri hawaira hakimamisbuki.
8 Unanepabunã, yunuti hãtxa pepa
hawaira nĩkamisbuki.
Hakia habu patapakĩ hãtxa txakabu yuimisburã,
hawaira txakabui benushãkanikiki.
9 Tsuabura pe hiwekĩ
hawa txakabu meisbuma
hawaki dateama unanuma hiwekubaĩmisbuki.
Hakia tsuabũra txakabu mekĩ hunebiamisbu
hatũ txakabu shabakabi betxitã hatu dake washãkanikiki.
10 Tsuãra huni betsa parãmakĩ
beruwẽ hatu unãmakĩ
hatukiri shetxiku amisrã,
unãtã hatu itxakawakĩ hatu nuitapawamisbuki.
Unaĩsmapatũ pe shinãma
hawaira hatu hãtxa yuibauni txanikaũmisrã,
hawẽ txakabuwẽ taeshũ
hakiri pe shinãma hatu itxakawashãkanikiki.
11 Huni pepabũ yusĩti hãtxa pepawẽ merabewakĩ
Deusũ hiwea kayabikiri hatu tapĩmakubaĩmisbuki.
Hakia huni txakabũ bemakis hatu pewabiakĩ
uke merã hune shinã txakakĩ
hatu txakabuwamamisbuki.
12 Dananãkũkaini sinatanamei detenamemisbuki.
Hakia huni nuikipanã, hawara txakabuwashinabu
hatu daewatã hatũ txakabu hakimawatirubuki.
13 Unanepa hãtxakinã,
hãtxa unanepa yuimisbuki.
Hakia tapĩ pewaisbuma
unaĩsmapatũ hawẽ hãtxa pe mekeama
txakabu yuiaibuwẽ taeshũ
danaĩ haki sinatakĩ hatu kakush kakush amisbuki.
14 Unanepabũ hawẽ unanepati hãtxa mekekĩ
hawaira yuisbumaki.
Hakia unaĩsmapabũ hatũ hãtxa hawaira yuikĩ
mese wakĩ hatu sinatamamisbuki.
15 Huni mabuyabunã, tsuãra hatu txakabuwaibu
hawẽ peiwẽ pakakĩ hatu nematirubuki.
Hakia nuitapaibu tsuãra hatu txakabuwabu
hawaumawẽ taea hawa hatu nematiruma hawawẽ pashatirumaki.
16 Huni pepabu dayakubainaibu
manakuti pepa bitã hiwea kayabi hayashãkanikiki.
Hakia huni txakabubu daya peama kanemisburã,
hatũ manakuti birã, txakabui pikumisbuki.
17 Tsuãra kaneaibu pe hatu yusiãbu nĩkamisburã,
pe hiweshãkanikiki, hawa benuamarã.
Hakia pepa hatu yusiãbu danãkĩ nĩkaisbuma
hatũ hiwea benushãkanikiki.
18 Txanitxakamisbu hune mia danaĩ sinatabiai
mia hawa yuiamaki.
Hakia unaĩsmapabu tari hãtxabiaibũ hawenamabia
dasibi ikaibukiri hatu yuibaũmisbuki.
19 Tsuãra hawara tibikiri yui hãtxa txakayamakinã,
kanekubaĩmisbuki.
Hakia unanepaburã, mawaira hãtxaisbumaki.
20 Huni pepabũ hãtxarã,
mane prata karu pepa keskaki.
Hakia huni txakabubũ shinanã,
hawa pemahairaki.
21 Huni pepabũ hawẽ hãtxawẽ hatu yusĩkĩ
itxapa hatu tapĩmamisbuki.
Hakia huni unaĩsmapabũ
pepa shinãkĩ katutiruma mawamisbuki.
22 Senhor Deusũ tsuara hatu duawakinã,
mabu pepa itxapa keska hatu inãkĩ benimawamiski,
hawa hatu bika tenemakĩ isĩ tenemamarã.
23 Huni unaĩsmapatũ txakabu tibi wakubaini
hawẽ besti benimakũkaĩmiski.
Hakia huni unanepa hawẽ unanepawẽ benimamiski.
24 Huni txakabubu hawara huriamabiakẽ
haki datehairamisbu hatuki nukuai meshãkanikiki.
Hakia hawara huni pepabũ haska betxipaimis uĩshãkanikiki.
25 Niwe kushipahaira shubi shubi ibirãkĩ
huni txakabubu yamawakĩ keyushanikiki.
Hakia huni pepabunã, hawa meama
hawama hiwekubaĩshãkanikiki.
26 Huni txikishbu hawẽ tsumapã hatu yunubia ashuaĩsmarã,
bimi bũkash piabu hatũ sheta mashesh wakĩ
txakabuwamis keska inũ,
txi kuĩmã hawẽ beru hatu betxeshkĩ
txeshãwãmis keskabuki,
tsuã hatu betxipaiamarã.
27 Senhor Deuski datekĩ duawakubainaibu hatũ hiwea txaipa hayayushãkanikiki.
Hakia huni txakabubu hatishuĩra hiweama ishãkanikiki.
28 Huni pepabũ hatũ manakuti pepa huaya bi benimashãkanikiki.
Hakia huni txakabubũ hatũ manakuti pema huaya
benu bestishãkanikiki.
29 Senhor Deusũ hatu mekekinã,
habũ pepa wakubainaibu hatu mekemiski.
Hakia habũ txakabuwakubainaiburã,
Senhor Deusũ hatu kupikĩ yamawamiski.
30 Huni pepabu hatũ hiwea
betsa taska kane hayama ishãkanikiki.
Hakia huni txakabubu na mai anu hiwei ikibi ikama ishãkanikiki.
31 Huni pepã kesha anua hãtxa unanepa tashnimiski.
Hakia habũ txakabu yuikubaĩmisbu
kupikĩ hatũ hana meshtea keska wakĩ
hatu nesewashanikanikiki.
32 Huni pepabũ hawara pepa yuikĩ habũ nĩkaibu hatu benimawakubaĩmisbuki.
Hakia huni txakabubũ yuikĩ
atimapa hãtxa besti yuikubaĩmisbuki.