Unanepa inũ unaĩsmapakiri yusinikiaki, na hãtxarã
9
Unanepã hawẽ hiwe wakĩ7 txibu hawẽrua nitxĩkĩ kushipa watã
2 hanushũ berunãbu hatu yusinũ, iwanã,
piti hawẽrua tibi hatu pimakatsi hawẽ ina deteshũ
hanushũ ha nushuti vinho pepa pewatã hakishũ piti
tapu hatu pewashũtã
3 hawẽ tsumabu mati mapetã
mae ewapa anu hiweabu hatu
sai akĩ eska hau hatu yuitanũ yuikĩ:
4 “Berunã tapĩsbuma inũ unaĩsmapabuũ,
neri bekãwẽ.
5 Piti ẽ matu pewashũshu inũ
vinho pepa ẽ matu pewashũshu
pikĩ neshui bekãwẽ.
6 Tapĩhairanika hãtxa ana danãma
tapĩhairatã hiwekubaĩkãwẽ,
haska tapĩhairai hiwemisbu keskai hiweirã, hatu atãkãwẽ”, aka bushũ
7 tsuara merabewakatsis ikĩ hatu pewabiabu
huni txakabubu hawaira sinatamis
hawa haska tapĩkatsi ikama
haki hãtxa txakabuhairai
haki kashe bestitirubuki.
8 Habu kashei hawaira sinatamisbu nemakĩ
mĩ hatu tapĩmapaia
miki sinatakĩ mia danã bestishãkanikiki.
Hakia huni unanepa nemakĩ mĩ tapĩma
shinã pewatã miwẽ benimatiruki.
9 Hamẽ huni unanepa mĩ yusiã nĩkakĩ tapĩhairai
ana unanepa txakayamashanikiki.
Huni pepa mĩ yusiã mia nĩkatã ana itxapa tapĩshanikiki.
10 Unanepai taekinã, Senhor Deus ha dukũ nĩkatã duawakubaĩtiki.
Deus meribi pepahaira mĩ unainã,
hawaira tapinika mĩ ikũkaĩtiruki.
11 Tsuara ewẽ taea unanepairã,
hawẽ hiwea bari itxapa hiweshanikiki,
Deusũ ana hiwemakubainarã.
12 Mia mĩ unaneparã,
hiwei pekĩ pepa besti mĩ bikubainaii.
Hakia patapai mĩ nĩkaismamisrã,
harã minaki, txakaburã,
mĩ hawa biama ishanairã.
13 Tsuara nĩkaisma pataparã,
aĩbu txakabu unaĩsmapa
hawa unãma txani besti yuimis keskaki.
14 Mae ewapa mananã anu
hawẽ hiwe beputi anu shabakã tsauti anu tsaushũ
15 hunibũ hawa shinãma
hatũ shinã pepawẽ bai tanabaini buaibu
ha nĩkaisma patapa aĩbu keskatũ hatu kenakĩ:
16 “Berunã tapĩriabumaã,
neri bekãwẽ”, akĩ
habũ pe shinãbuma hatu yuikĩ:
17 “Ũpash yumetsutã akarã, pehairaki.
Misi huneshũ piarã, nuehaira mĩ unaiĩ”,
akĩ hatu yuia
18 ha aĩbu keskatũ hatu kena bumisburã,
habu unaĩsmapabu hari pe dabanẽ mawa kayabi anu buaibu hawa unãbumaki.