Unanepã hatu tapĩmakatsi hatu kenamiskiaki, na hãtxarã
8
Ha unanepa hãtxa huni keskatũhawẽ hãtxa tashnimakĩ hatu tapĩmakatsi ikĩ hatu kenamiski.
Ha tapĩmanika hãtxa huni keskatũ
hawẽ hui kaĩmakĩ hatu nĩkamamiski.
2 Unanepa hãtxa inũ tapĩmanika hãtxã hatu nĩkamamisbuki,
mananãshũ inũ bai kapukea anu niti ishũ yuikinã.
3 Mae ewapa mishki kenebaunibu
hikiti shui hawẽ beputi anushũ
hatũ hui nĩkamakĩ hatu yuikĩ:
4 “Hunibuũ, matu inũ matũ bakebu anu ẽ matu hãtxa waii.
5 Mã berunã hawa tapĩriabuma inũ unaĩsmapabuũ,
haskai mã unanepatiru inũ mã nĩkanikatiru ea tapĩkãwẽ.
6 Hãtxa pepa putatima hatũ ẽ matu merabewatirã,
ẽ eaki. Nĩkakãwẽ.
7 Haska ẽ matu yuiai txanimaki.
Txani hãtxa yuiaibu ẽ betxipaismaki.
8 Dasibi ẽ hãtxarã, yui kayabiki,
haska ẽ matu yuiai ẽ kanetirumarã.
9 Habũ itxapa shabakabi tapĩtirubu inũ
shabakabi nĩkatirubunã,
ẽ hãtxari shabakabi pepa nĩkakĩ
hawa ẽ kaneama nĩkamisbuki.
10 Ha dukũ benakinã,
yusĩti kayabi inũ tapĩti kayabi
benakĩ tapĩkubaĩkãwẽ.
Haska mĩ tapiainã, mane prata inũ
mane ouro betxipaibiamisbu binuhairaki.
11 Unanepati hãtxarã,
hawẽ hiwei pehairakũkaĩkĩ
hamapai mabu nẽkati hawẽrua kushipahairabiakẽ binuaki.
Hamapai mabu sharabu haya mã hawẽ kemubiamis
ha unanepati hãtxã dasibi binuaki.”
12 Ea huni keskai unanepa hãtxakĩ yuikĩ:
“Ea unaneparã,
ẽ haibu tapĩhairanikabe ẽ habe ketashameaki.
Habe merabenaĩ ẽ hawa ariama
nuku dabe yubakakĩ pe shinãtã
pehaira nũ yusĩmiski.
13 Senhor Deuski datekĩ duawakubaĩkinã,
txakabu danaĩ mĩ haki sinatatiruki.
Eanã, nati txakabu ẽ danãmiski:
ibubis keaĩbu inũ, ha:
‘Ẽ eã besti hamapai unã keyuaii’, imisbu inũ,
hiwe txakakubaĩmisbu inũ,
txanitxakakubaĩmisbu eã ẽ hatu danãhairamiski.
14 Txakabu unãti wanika inũ
pepa unãti wanika kushiparã, ẽ ea bestiki.
Ẽ unã keyuaiwẽ taeshũ
bebũkiri hawara ẽ akatsis ikai yubakatã
ẽ akubaĩmiski.
15 Ewẽ taea shanẽ ibui kushipakĩ
hatunabu shanẽ ibushũkĩ pe hatu yunukubaĩtirubuki.
16 Ewẽ taea mai pakea anua
shanẽ ibubu inũ, hatũ bakebu inũ, shanẽ ibu beshmasbũ
hawara pe inũ hawara txakabu
hatunabũ akaibu pewẽ besti hatu yunukĩ unãti watirubuki.
17 Tsuabũra ea betxipaiaiburã,
eãri ẽ hatu betxipaimiski.
Tsuabũra ea benai eki nukumisbuki.
18 Ea benakĩ ea shinaĩbu
pewẽ hatu manakukĩ hatũ hiweti mabu pepa
inũ benimai hiweti ẽ hatu inãkĩ duawamiski.
19 Ea nĩkakĩ tapiaĩburã,
pehairawẽ ẽ hatu manakukĩ inãkatsis ikairã,
ha ouro mane has inũ prata mane has binuhairaki.
20 Ẽ ea unanepa kairã,
bai pepa yushtumawẽ kakĩ
hawa hatu kanemama yunuti kushipa
ẽ hatu unãti wamakubaĩmiski.
21 Tsuabũra ea betxipaiaiburã,
hawena ẽ inaiĩ, hamapai pepa bitã
hawẽ hiwe anu arukĩ hau itxawashanũbunã.
22 Senhor Deusũ mai inũ nai dasibi
dami wakĩ taewariama
ea dukũ ea tashnimaniki, ẽ unaneparã.
23 Mai dami wariama ea dukũhaira ea dami wakĩ taewaniki,
hawa mai anu betsa tashniriamahairatianã.
24 Ianẽwã tibi hayariama inũ,
hene tibi inũ hanua txatxa beai ũpash tibi habariama
ea dukũ tashnimatã Senhor Deus ea hayaniki.
25 Mati keyatapa inũ mawa tibi dami wariama
ea dukũ tashnimatã Senhor Deus ea hayaniki.
26 Ha mai hirabi anu bai wati tibi inũ,
ha mai mishpu bitã mai hirabi ha dami wani ariamabia
ea dukũ ea tashnimaniki.
27 Natukã nai namã ianẽwã dami wariamakẽ
ha bebũ ea dukũ ẽ hayai taeniki.
28 Nai anu nai kuĩ dami wariama inũ,
ianẽwã hanua hene tashniai dami wariama inũ,
29 ianẽwã kebẽkĩ hawẽ kesua kesha tibi pewariama inũ,
mai haki dakati pewariama
30 earã, habe ketashamekũkaini
hawa pashkama Senhor Deusbe ea unanepa hanu ẽ habe iniki.
Ewẽ benimakũkainaya
Senhor Deus bebunua bari tibi hawa pashkama
habe benimai ẽ beyuskũkainiki.
31 Deusũ hunibu bawaiwẽ taea
habu shinaĩ hatuwẽ ẽ benima txakayamakũkainiki,
mai hirabi hiwemashinawẽ taea haki beyuskũkainirã.
32 Ea unanepa ẽ matũ epa keskaki.
Natiã ea nĩkairakãwẽ.
Ẽ akubaĩmis ea txibaĩ
mã benimakũkaĩshanaii.
33 Ea unanepakiri ẽ matu yusiaĩ nĩkakĩ tapĩkĩ
ea danãyamashãkãwẽ.
34 Earã, ẽ bepẽmanaki.
Tsuabura ea anu hushũ
dasibi ẽ yusiã bari tibi ea nĩkakubaini txĩtuãma
ẽ hatu mekea haya habũ ea nĩkai benimakubaĩshãkanikiki.
35 Tsuãra ea benai eki nukutanã,
hatũ hiwea kayabi bishãkanikiki,
haska Senhor Deusũ betxipaimis txibãmiswẽ taeshunã.
36 Hakia tsuãra txakabuwakĩ
kanetã ea henebainirã,
hawẽ hiwearã, ibubis txakabuwashãkanikiki.
Hatũ ea danainã,
hawẽ mawa betxipaikiki”, anikiaki.