Aĩbu beneyabiatũ mia txutamakatsis ikai unãmatikiaki, na hãtxarã
7
Epaã, ẽ hãtxa nĩkakĩẽ yunuti hãtxa shinaĩrakubaĩshãwẽ.
2-3 Haska mĩ beru yaushikĩ mĩ pe mekemis keska wakĩ
ẽ yunuti hãtxa inũ ẽ yusĩti hãtxa
mĩ mekẽ anu dispiwẽ nea keska wakĩ
mĩ shinã uke merã netã pewatã
shinãkubaini mĩ pe hiwetiruki.
4 Unanepa hãtxakiri shinãkĩ:
“Unanepa hãtxawẽ mĩ hawẽ hãtxatirurã, mĩ pui keska wawe.
Hawaira tapĩtikiri shinanã,
mĩ haibu aĩbu keska wawe.
5 Mĩ hatu haska warã, aĩbu beneyabũ hãtxa hawẽruawẽ
mia txutamakatsi ibiaibũ
unanepati hãtxa inũ hawaira tapĩti shinã
mĩ hayawẽ mĩ pashatiruki.
6 Shaba betsatiã ẽ hiwe hanu uĩti shui bepẽshũ hune ẽ uiãyã
7 berunãbu hawa shinã pepa biriabuma ea daĩbainaibu
hatube berunã betsa unaĩsmapahairari kai ẽ betxia
8-9 ma bari kai meshuaya ha berunã bai tanabaini
bai betsa ketãbaini kapukebaini
aĩbu paranananikatũ hiwekiri kayãbis kaya
10 ha aĩbu hawẽ hiwe anua ha berunãki nukunũ ika
tashnikirani hawẽ batxi inũ hawẽ besu hawẽrua
hininipa beneuma keska
11 bebũkiri hawa shinãma hawaira hãtxai
inũ hawẽ hiwe anu dayaisma
12 mae ewapa anu bai inũ praça bai kesha tibi anu nikũkaĩkĩ
ha dukũ huni huai atxikatsi manakubaĩmis ha berunãki nukutã
13 ikushũ hãtsu hãtsu atã hawa dakeama yuikĩ:
14 “Haska ẽ yubakashina
ikis ẽ yushĩ deus daewati ina sheni ẽ hatu kuamakĩ keyushuki.
Ẽ ma piti hayaki.
15 Haskawẽ taea miki nukunũ ika ẽ tashnikiranaii.
Haska betxitanũ ika hukirã ẽ ma miki nukushuki.
16 Egito anua tari hawẽruawẽ
ẽ dakati bebekãkĩ pewatã
17 mirra inũ aloés inũ canela sheni inihairawẽ ẽ txa abirãshuki.
18-20 Ẽ bene hanumaki. Nãta txai kashiãki.
Pei itxapa bushiãwẽ taea ushe babekeriamakẽ
txĩtũriamawẽ taea
ẽ hiwe anu kanãwẽ, haria penariama
meshu hirabi txutanamei betxipainamei
nũ benimanunã”, akĩ
21 hãtxa hawẽruawẽ yuikubaĩkĩ heneama
ha berunã hawẽ shinã betsa wa
22 ana hawa shinãma habe ha itxũ kaimaki.
Ina awa tesenũ ishũ hawa unãma
dispiwẽ neshashũ ninibaĩkĩ iyumisbu keska inũ
txashu birũ merã hikia
23 pia kuĩwẽ tsakakĩ pishtxakash amisbu keska inũ
peiyabu hui hisĩ txaipa biruãbuki hikimisbu keskairã,
ha berunãtũ aĩbu hininipa txibaĩ
mawai kaikiki, hawa unãmarã.
24 Haskakẽ epaã, ea nĩka pewakĩ
ẽ hãtxa shinãkubaĩshãwẽ.
25-27 Ha aĩbu hininipã hiwe anu kai
hawẽ bai tanabaini itxapa mawamisbuki.
Aĩbu hininipã hatu iyushũ txakabuwaya
huni itxapa ma debuabuwẽ taeshũ
haska aĩbu hininipã hatu amisbu shinãkĩ
miãri kanei hatxũ kayamashãwẽ,
ha baiwẽ kai mawai benukatsi ikamarã.