Huni betsã pei biãyukatsis ikai betsã merabewatimakiaki, na hãtxarã
6
Epaã, nawa anua mĩ haibũ hawẽ pei biãyukatsis ikayamerabewakĩ nawa mĩ yuishuna pei inaĩmashũ
txipu nawã hawẽ pei mia yukatiruki,
mĩ haibũ pakamawẽ taeshunã.
2 Miã yunukĩ mĩ hãtxawẽ yubakĩ
ibubis mĩ kaneimawẽ taeshũ mia ma atxiaki.
3 Epaã, haskatũ ma mia atxia kaĩkatsirã,
ibubis nawa pakakatsi ikama mĩ haibu eska wawe.
Harakirira mĩ haibũ mia hãtxa txakabuwatiru dateama
hawaira mĩ haibũ hau pakanũ
ha bebũ ka dãti ishũ yukakĩ ea a txakayamawe.
4 Ushariama inũ hawa huĩrukuãmahaira
5 txashu piayabuki datei pashamis inũ
peiyabu birũki datei pashai nuyakaĩmis keska kaĩ
mĩ hawaira pewatiruki.
Txikishbu haska yusiãwẽ yusĩtikiaki, na hãtxarã
6 Txikishbuũ, ea nĩkakãwẽ.
Unanẽ hawẽ piti arumis bushũ uĩtãkãwẽ.
Haska wamisbu uĩkĩ shinãkĩ
habũ dayakiri tapĩkãwẽ.
7 Ha unã shanẽ ibuuma inũ hatũ yununika hayamabia
ibubis shinaĩ dayatxayamisbuki.
8 Bariã hatũ piti bitã bitãkĩ
hatũ kini anu arukĩ mata wamisbuki,
yurabũ hatũ yunu tsekashũ arumisbutianã.
9 Txikishbuũ, haskaira ana ushayamakãwẽ.
Mã usharã, hatiã bestẽtã mã beniai?
10 Usha paẽ matu atxia tinĩtãtani
shuikukui petã besti mã ushakatsis ikai?
11 Txikishi mã hawa dayamawẽ taea
hawa hayama mã nuitapakũkaĩshanaii,
huni daya hayabumã matũ mabu matu biãbaina keskairã.
Huni txakabubũ hatũ akarã, eskakiaki, na hãtxarã
12 Huni txakabubũ hatu txakabuwamis pe shinãma
txanitxakakĩ txani besti hatu yuibaũmisbuki.
13 Hatũ shinã txakabu hatu unãmakĩ
hau txakabuwanũbũ
beruwẽ hatu yuikĩ hatu shetxiku akĩ inũ
hatũ taewẽ hatu timakĩ inũ
hatũ metutiwẽ hatu metukĩ hatu unãmamisbuki.
14 Hatũ shinã txakabuwẽ taea
shinã txakabuwakĩ haska shinãkubaĩmisbuki,
hau detenamenũbũ hawara huni betsã hakiri txakabu yuishu
hatuki txanikĩ hatu sinatamairã.
15 Haskamisbuwẽ taeshũ habu kupikinã,
txakabuhairawẽ hatu bika tenemakĩ
hawaira betsupe ika keska wakĩ
hatu txakabuwakĩ yamawakĩ keyushanikiki,
hawawẽ ana kayatima hatu wakinã.
Eska tibi Senhor Deusũ danãtxakayamamiskiaki, na hãtxarã
16 Txakabu betsa betsapa akĩ 6 kasmai 7ki amisburã,
Senhor Deusũ hatu uĩ betxipaiama danãtxakayamai
hatuki sinatahairamiski.
Haskakiri matu yuinũ ea nĩkakãwẽ.
17 Ibubis kẽmisbu inũ,
txanitxaka bestimisbu inũ,
hawa txakabuwamabiakẽ
hatũ mekẽwẽ hatu tenãmisbu inũ,
18 hawẽ hatu txakabuwanũ ika
huni betsaki yubakamisbu inũ,
hamapai txakabuwaibu hatu merabewanũ ika
kushibaĩmisbu inũ,
19 huni betsã txakabuwashu hatũ hawa uiãmabia
txanitxakai shanẽ ibuki txanimisbu inũ,
betsabu hau sinatanamenũbũ
hatu txaniwẽ parãmisbu
habu dasibirã, hatuki sinatakĩ
Senhor Deusũ hatu kupishanikiki.
Aĩbu mĩ aĩma txutakatsi shinãtimakiaki, na hãtxarã
20 Epaã, mĩ ẽ bakewẽ taeshũ
mĩ ibu huni inũ mĩ ibu aĩbũ yunuti inũ nemati hãtxa txibãkĩ
nukũ yusiã danãyamakubaĩshãwẽ,
shinãkubaini hawa hakimamarã.
21 Teuti teua keska wakĩ
mĩ huĩti anu netãtã hakimayamakũkaĩshãwẽ.
22 Hatunã, hanira mĩ kai mia mekeshũ iyukĩ
hanu mĩ ushai anu mia mekea inũ,
usha mĩ besteãyã ana mibe hãtxai keskakĩ
mia shinãmakubaĩtiruki.
23 Txanima ha yunuti hãtxa inũ ha yusĩti hãtxarã,
mĩ kai anu bĩ ewapa dekua txasha keskaki.
Mĩ kaneai nemakĩ mia pewaibu inũ hawẽ shinãmati hãtxa mia yusiaĩbu
txibaĩ hiwea kayabi mĩ hayashanaii.
24 Haska inũ, aĩbu betsa txakabu
huni tibibe txutanamemisbũ hãtxa hawẽruawẽ mia parãtirububia
nukũ yusiã hãtxa shinãtã mĩ hawẽ nematiruki.
25 Ha aĩbu hawẽruatũ mia uĩkĩ mia kemumabiaya
hawẽ yurawẽ kemukĩ shinãyamakubaĩshãwẽ.
26 Ha inũ, aĩbu hininipa beneumatunã,
txutanamekĩ hawẽ piti besti benai yukamisbuki.
Hakia aĩbu beneyatũ hawẽ bene parãtã
huni betsa txutamatanã,
mĩ hawara mia keyu biãtiruki.
27 Huni betsã txi dekẽ ikuarã,
hawaira hawẽ tari menumiski.
28 Ha inũ, huni betsa txi dekẽki paia
hawaira hawẽ tae menuriamiski.
29 Habiaskariai huni betsã aĩ beneyabiakẽ
habe txutanamemisrã,
txanima hawẽ kupiti bishanikiki,
txi dekẽ ikua keskairã.
30 Huni betsa bunihairakĩ pinũ, iwanã,
piti yumetsutã pikẽ hawa haki sinatatimaki.
31 Hakia hune yumetsuaya betxitã atxiabu
ha hunĩ hawara hatuna yumetsushurã,
hau 7ki hawẽ mabu hau ana ibu inã keyunũwẽ,
dasibi hawẽ hiwe anu mabu hawara haya inã keyukinã.
32 Hamẽ unaĩsmapatunã,
aĩbu beneya tsuãra txutairã,
ibubis hawẽ hiwea txakabuhairawaikiki!
33-35 Hawẽ benẽ yaushikĩ unãtã
haki sinatairã, txi keskaki.
Ma txakabuwakenã,
hãtxawẽ inũ inãkuĩti itxapawẽ
tsuã nemakĩ daewatirumaki.
Hawẽ txakabu bene hakimakatsi ikama
dete dete akĩ dake watã nitxĩshanikiki.