Aĩbu txakabukiri yusinikiaki, na hãtxarã
5
Epaã, ẽ unanepa hãtxa nĩkairawe.Haska eã ẽ tapini miari yusinũ pes shũ ea nĩkawe.
2 Na habiatiã haska tapĩtã shinã pewai
unanepã hãtxa unãtã mĩ hawẽ hãtxashanaii.
3 Eska mia yuinũ ea nĩkawe.
Aĩbu hawẽrua beneyabia kemui hawẽ hãtxa kemutapatunã,
piti sheni pepa mĩ betxipaimis keskatũ binutiruki.
4 Hakia hawẽ hiwea txakabu eskaki.
Tsuara ha aĩbu haska parananãmis
hawẽ hãtxa ana hawẽruama
ni pei mukahaira keska inũ
nupe kenu dabeya keskawẽ hatu meshteabu
isĩhairamisbu keskaki.
5 Ha aĩbũ hatu iyukinã,
hau habe mawai kanũ hatu iyumiski,
hawa hatu niti akama hanu mawa maiwamisbu anu hatu iyukinã.
6 Ha hiwea kayabi baiwẽ kai hawa pe shinãma
hawẽ hiwea mestẽmawẽ taea
hawẽ nuitiruma inũ hawa unãmaki.
7 Haskawẽ taeshũ epaã, ẽ hãtxa ea nĩkatã
ẽ yusĩti hãtxa hawa heneyamakubaĩshãwẽ.
8 Ha aĩbũ hiwea anu hari mĩ kemashĩkẽ
9 haska mĩ hiweawẽ bari itxapa daya txakayamakũkaĩkĩ
mĩ mabu itxawakubainaya
nawa betsa hawa miwẽ nuiama
miki sinatakĩ mia mebĩtiruki.
10 Haskakẽ dasibi mĩ daya pei inũ hawara mĩ dayaima
hau nawa betsã biyamashanũ
ha aĩbu txakabu anu hawa hari kemayamashãwẽ.
11 Hakia ẽ hãtxa danaĩ aĩbu txakabu anu mĩ kakũkaĩmis
atimas mĩ hiwea keyui
mĩ yura unãshubira babukũkaĩkĩ
12 hanushũ ibubis shinaĩ: “Ea yusĩkĩ nemabiabu
haskakĩ hatũ yusiã ẽ danãkubainimamẽ?
Ewẽ nuikĩ ea nemabiabu haskakĩ ẽ hatu nĩkama ikũkainimamẽ?
13 Huni yusinãbũ ea yusiãbu ẽ hatu nĩkama ikimaki.
Hanua ea unãmabiakubainabu ẽ hatu danaĩmaki.
14 Enabu dasibibũ ea uiaĩbũ
txakabu mei ẽ hawẽ benui pemahairashina shinaĩ ẽ dakehairaii”, iwanã,
“Aitĩ itxakayamakĩ mĩ yuikubaĩshanaii.”
15 Hakia ẽ hãtxa nĩkakubaĩwẽ.
Haskawẽ taea mĩ ainã, txatxa ũpash pepa habai keskaki.
Txutanamekatsi ikĩ mĩ ũpash manuai keskakinã, mĩ aĩ besti txutakubaĩshãwẽ.
16 Ũpash pepa bai namaki hukakĩ txakabuwa keskakĩ
aĩbu betsawẽ kemukĩ mekĩ
mĩ hura txaka wama mĩ aĩ besti txutakubaĩshãwẽ.
17 Mĩ ainã, mina bestiki, betsanamarã.
Hau huni betsã mĩ aĩ txutanũ
mĩ aĩ yunuama mina besti wakĩ txutakubaĩshãwẽ.
18 Txatxa ũpash pepawẽ kemukĩ nũ betxipaimiski.
Mĩ aĩ berunãtũ mĩ biai
Deusũ mia inãni habe mia duaya
habe besti benimakũkaĩshãwẽ,
ha txatxa ũpash mĩ betxipaimis keskairã.
19 Txashuwã bake hawẽrua pishta keska
mĩ ainĩ yura hawẽrua mĩ betxipaiai
mia damãbauna hinĩ bitã benimakĩ
ha besti txutakubaĩshãwẽ.
20 Epaã, haskai hawa shinãma
aĩbu huni betsanawẽ mĩ kemukũkainai?
Haskakĩ aĩbu mĩ aĩma
ikutã hawẽ txutxu damãkĩ mĩ mekubainai?
21 Huni tibi mapushũ akubainaibu
haska akaibu Senhor Deusũ uĩkĩ
hawa hakimama shinãkubaĩmiski.
22 Huni txakabũ ibubis hawara txakabuwamisrã,
hawẽ yura txakabũ atxitã
dispiwẽ neakĩ akawamamisbuki.
23 Hanua nemati hãtxa tapiãma
danãmisbuwẽ taea mawa kayabimisbuki,
patapa nĩkaismahaira benuirã.