Hiwea pepa hau txibãkubainũbũ hatu yusinikiaki, na hãtxarã
4
Epaã, mã ẽ huni bakebuwẽ taeshũẽ yusiã pepa tapĩkĩ
ẽ hãtxa ea nĩkakĩ matũ hiwea pewakubaĩkãwẽ,
hawara pepa inũ hawara txakabu unãti wakinã.
2 Ẽ yusiã pepa ẽ matu yusĩkĩ pewairã,
hawa hakimakĩ hamakiri shinãyamashãkãwẽ.
3 Earã, ẽ hatũ bakeri iniki.
Ẽ ibu aĩbũ ea betxipaikĩ duawakubainaya
4 ẽ ibu hunĩ ea yusĩkĩ yuikĩ:
“Ẽ mia yusiaĩ shinaĩ
ẽ hãtxa hakimayamashãwẽ,
haska ẽ mia yunuai keska aki
mĩ pe hiwekũkaĩshanairã.
5 Unanepai inũ shinã pepa bestinũ, iwanã,
ẽ yusiã hãtxa hakima taskayamashãwẽ.
6 Unanepa kayabi tapĩkĩ betxipaikĩ heneyamawe.
Mĩ haska waya hatũ mia mekeshũ unãmakubaĩshanikiki.
7 Hamapai betsa mĩ ariama
ha dukũ unanepa inũ hawara pehaira
mĩ unãti watiru tapĩtã
ha shinãkĩ txibãkubaĩshãwẽ.
8 Unanepati miã mĩ betxipaiaya
unanepã mia kẽhaira wariashanikiki.
9 Maiti hawẽrua keska mia sawematã
unanepã mia duawakubaĩshanikiki”, ea wa ẽ nĩkarianiki.
10 Epaã, ẽ yusiã hãtxa nĩkakĩ tapĩtã
ana bari itxapa mĩ hiwekũkaĩshanaii.
11 Unanepa hãtxa ẽ mia yusiaĩwenã,
hawẽ ẽ mia iyu pewashanaii,
bai pepa mia txibãmakinã.
12 Hiwea bai pepa mĩ txibaĩ
tsuã mia nematirumaki.
Ha hiwea pepa txibaĩ hĩ hĩ ikama inũ
hawairabiakaini kanei mĩ hawa huti ikama ishanaii.
13 Ẽ yusĩti hãtxa danãma mestẽwãtã
hakimakĩ heneama txibaĩ mĩ pe hiwekũkaĩshanaii.
14 Huni txakabu ikaibu hatuki dasitã
hatũ txakabu txibãkĩ hatubetã meyamashãwẽ.
15-17 Habu huni txakabubũ hawara txakabuwariama
pe shinaĩ dakatirubumaki.
Yura betsa hawa kanemariama shinaĩ ushatirubumariki.
Hatu detekĩ itimaska wakĩ
habũ hatu txakabuwaibu
hatũ piti inũ hatũ nushutirã,
txakabu besti kaĩmamisbuki.
Hatu dũkekĩ henebaini hatukiri ana hawa shinãma
pe besti ikũkaĩshãwẽ.
18 Huni pepabu hawẽ hiwea hawẽruai
penai shabai taeitiã
bari kaĩkirani bari mananãbi daka
txasha txasha itxakayamai keskai
ana pehairakubaĩmisbuki.
19 Hakia hunibu txakabu hiwekubaini
meshu merã kai hawa unãma
hawaraki huti imisbu keska
haska wakĩ txakabuwakĩ kaneaibu tsuã unãbumahairaki.
20 Epaã, mĩ ẽ bakewẽ taeshũ
pes shũ ẽ yusiã ana nĩkakĩ pehaira wawe.
21-22 Mĩ ekiri tapiaĩ mĩ yura hawa isĩ teneama
ẽ yusiã shinaĩ mĩ hawẽ hiwekũkaĩtiruki.
Hawa benuama hakimama shinãkĩ
mĩ huĩti uke merã ẽ yusiã netã pewakubaĩwẽ.
23 Haskakĩ hiwea kayabi mĩ bitiruwẽ taeshũ
hawara betsa mai anua mĩ betxipaiai
binumakĩ mĩ shinã pe mekekubaĩshãwẽ.
24 Txanitxakakĩ mĩ yuiarã, txakabuharaki.
Ha henekĩ haska ana shinãyamakubaĩshãwẽ.
25 Huni txakabubũ betsa betsapa haikaimas shinãmisbu inũ
tsuãra mia uĩtiruwẽ taea
hatuki hawa dateama hariri mĩ kai
txĩtuãma pe besti shinãkubaini hiwekũkaĩwẽ.
26 Haska hiwekaĩkĩ hanira mĩ kai
bebũkiri shinã pewawe.
Haskai bai tanai nishũ
txakabuwakĩ mĩ kanetirumaki.
27 Kanekĩ bai txakabu txibanũ, iwanã, shinãma
pepas txibãkĩ heneyamakubaĩshãwẽ.