Unanepai hau unanuma hiwekũkainshanũ yusinikiaki, na hãtxarã
3
Epaã, mĩ ẽ huni bakewẽ taeshũẽ yusĩti hãtxa tapĩtã hawa hakimayamashãwẽ.
Ẽ yunuti hãtxa inũ ẽ nemati hãtxa shinãkubaini
2 benima besti mĩ hiwei txaipakũkaĩshanaii.
3 Dasibibuwẽ nuikũkaini
txanima hãtxa hawa heneyamakubaĩshãwẽ.
Teuti sawea keska wa hatuwẽ nuikĩ txanima hãtxa sawewe,
mĩ shinã uke merã netãkinã.
4 Mĩ haska hiwekũkainaya
Deus inũ yurabu miwẽ benimakĩ mia betxipaikubaĩshãkanikiki.
5 Haska ibubis mĩ unanepaiwẽ akama
hakia mĩ huĩti hirabiwẽ Senhor Deus ikũwãkĩ
haska mia yusiaĩ besti txibãkubaĩwẽ.
6 Hawara dasibi Senhor Deusũ betxipaiai shinãkĩ
mĩ akubainaya Senhor Deusũ mia tapĩmakĩ
hawẽ bai pepa mia yusĩkubaĩshanikiki.
7 Ibubis keĩ: “Ẽ unanepahairaki”,
iwanã, shinãyamakubaĩshãwẽ.
Hakia Senhor Deuski besti datekĩ ha besti duawai
txakabu tibi hene keyutã ana meyamakubaĩshãwẽ.
8 Senhor Deus besti mĩ duawakubainairã,
dau pepa mĩ shea keska waya
mĩ yura kushipakũkaĩshanikiki.
9 Hawara dasibi mabu mĩ haya
inũ mĩ mibã ha dukũ bimi taeai tsekashũ
Senhor Deus duawakĩ ha dukũ inãkĩ hawẽ kẽwãkubaĩshãwẽ.
10 Mĩ haska wakubainaya
mĩ piti aruti hiwe anu mĩ piti mata wakĩ
mĩ uva vinho aruti mai kẽti shumu ewapabuki
mata wakĩ mia bupakemashũshanikiki.
11-12 Hawẽ huni bakẽ kaneaya
hawẽ epã tapĩmakĩ yusĩkubaĩmis keska wakĩ
tsuabura Senhor Deusũ hatu betxipaiai kaneaibu
hatu nemakĩ pewakubaĩmiswẽ taeshũ
epaã, mĩ kaneai Senhor Deusũ mia pewakĩ bika tenemaya hawa danãyamakubaĩshãwẽ.
Hawẽ kushipawẽ mia yunukubaina
hawẽ hãtxa bikabiakẽ nĩkashũkubaĩshãwẽ.
13-14 Prata mane hushupa inũ
ouro mane itxawai hawẽ pepabiaibũ
hakia tsuara unanepai nĩkanikakĩ
ouro inũ prata binumakĩ
dasibi nĩkakĩ tapĩ keyutã
hawẽ benimakĩ hatu binukubaĩshãkanikiki.
15 Hawẽ dauti inũ
meitxikiti inũ pau inũ
teuti pepahaira karuhaira hayabiabũ
tsuara unanepakĩ
ha mabu hawẽrua betxipaihairakĩ bimisburã,
pepabia unanepatũ hawẽ hatu binuhairatiruki.
16 Unanepawenã, aĩbu duapa keskakĩ
nekerishũ mĩ hiwea txaipa mia inãyã
ukerishũ mabu pepa inũ yurabũ mia duawakubainai
mĩ haska hiwekũkaĩtiruki.
17 Unanepa hãtxa txibainã, benimakũkaini inũ
unanepa bai tanabaini unanuma mĩ hiwekũkaĩshanaii.
18 Tsuãra unanepa hãtxa tapĩtã txibaĩ hawẽ hiwetirubuki,
pe mekei benimakũkainirã.
19 Hawẽ shinã unanepawẽ
Senhor Deusũ mai inũ nai dami watã mestẽwaniki.
20 Hawẽ unanepahairawẽ shinãtã ianẽwã pashkatã
nai kuĩ anua basnũ tashnimakĩ taewaniki.
21 Epaã, mĩ shinã pepa arutã haratura pepa inũ
haratura txakabu unãti tapĩtã hawa hakimayamakũkaĩshãwẽ.
22 Haskakũkaĩkĩ Deusũ betxipaiai teuti hawẽrua teua keska
mĩ hawẽ pe hiwekũkaĩtiruki,
23 haki txiti itã hawa dateama kai ana kane taskamarã.
24 Shinã pepai inũ unanepai hiwekũkaini
hanu mĩ huĩrukuaĩtiã hawa dateama inũ
hanu mĩ ushaitiã unanuma mĩ dakatiruki.
25-26 Senhor Deuski mĩ txiti ika
hatũ hawẽ pepawẽ mia inãkubaĩshanikiki,
babui mĩ hawẽ dateyamanunã.
Hanua hawara mesehaira huaitiã mia mekekĩ nemashuna
ha mesẽ mia atxiama ishanikiki.
Ha inũ, hunibu txakabu mibe hiweabu
hatu kupikĩ yamawaya
mĩ hawa dateama ikũkaĩshanaii.
27 Tsuara hawa hayamatũ merabe mia yukai
mĩ ashũtiru hatuki txikishama ashũkubaĩwẽ.
28 Tsuãra merabe mia yukai
ikis mĩ ashũtiru hawa meshukiri manama hawaira ashũwẽ.
29 Mia betxipaikĩ mikiri pe shinãmisbu mia dapi hiweabuki
hatu txakabuwanũ ishũ yubakakĩ shinãyamashãwẽ.
30 Tsuara miki sinatakĩ mia txakabuwamabia
eiskaũ hatube detenameti shinaĩ sinatayamakũkaĩshãwẽ.
31-32 Hunibu txakabu Senhor Deusũ danãkĩ
huni pepabu betxipaikĩ
habu besti haibuwamiswẽ taeshũ
ha hunibu txakabu hawara haya uĩ hawẽ kemui ha keska
miari hayakatsis ikĩ shinãma
hawẽ shinã keska txibãyamashãwẽ.
33 Senhor Deusũnã, hunĩ txakabuwamisbũ
enabu yupukĩ
hakia pepabũ enabu
hatu duawakubaĩmiski.
34 Habu kashekenãmisbu
Senhor Deusri hatuki kasheriamiski.
Hakia hawa keĩsbuma
Senhor Deusũ hatu duawakubaĩmiski.
35 Unanepabu duawakĩ
itxapabũ hatu kẽwãshãkanikiki.
Hakia unaĩsmapabu danãkĩ
tsuã hatu kẽwãma ishãkanikiki,
hatukiri txakabu besti yui hãtxairã.