Unanepairã, habiawẽ pepai hiwekubaĩtirubukiaki, na hãtxarã
2
Epaã, mĩ ẽ huni bakewẽ taeshũẽ hãtxa nĩkatã hakimama
ẽ yunuti inũ ẽ nemati hãtxa txibãkubaĩshãwẽ.
2 Unanepabũ mia yusiaĩ nĩka pewakĩ
txanima hãtxa tapĩtã hakimama
haskai hiwekũkaĩshãwẽ.
3 Haskai mĩ unanepatiru inũ
mĩ hawara pehaira unãti watiru tapĩkatsirã,
mĩ kushipa hirabiwẽ Deus yukakubaĩshãwẽ.
4 Pei inũ mabu pepa hunea binũ, iwanã,
benamisbu keska wakĩ
unanepati hãtxa tapinũ, iwanã, benahairakubaĩshãwẽ.
5 Mĩ haska benaiwẽ taea
haska Senhor Deus duawai mĩ dayashũtiru inũ
mĩ hakiri tapĩkĩ unãhairashanaii.
6 Senhor Deusũ yusiã tsuãra pe tapĩkubaĩkinã,
haska unanepatiru inũ haska betsa betsapakiri tapĩhairatiru Senhor Deusũ yusĩkĩ hatu inãshanikiki.
7 Tsuãra hawa kaneama inũ hawa txanitxakama
pepa besti hiwekũkainairã,
Senhor Deusũ merabewakĩ hatu mekekubaĩmiski.
8 Tsuãra hatu paraĩsma inũ
Senhor Deusũ hãtxa ikũwaĩ txĩtuĩsma
Deusũ habu yaushikĩ mekekubaĩmiski.
9 Pepai hiweabu Senhor Deusũ hatu mekekubaĩmiswẽ taeshũ
miari hawa txanitxakama inũ hawa parananãma
dasibi mĩ pe besti hiwekũkainai mĩ tapĩshanaii.
10 Unanepa hãtxa unãkĩ tapĩtã
mĩ huĩti merã mĩ benima txakayamashanaii.
11 Hawara bika hawaira tapĩtã hakimama
mĩ bebũkiri pe shinãkubainaya
tsuã mia parãtiruma ishanikiki.
12 Deusũ shinã mĩ tapĩhairaiwẽ taea
hunibu txakabu anua inũ
hiwei peabuma anua unanepai mĩ piskukaĩtiruki.
13-15 Deusũ mia mekeaya
tsuara hawẽ hiwea bai pepa henebaini kaima
bai atimapa yushtu keska txibãkĩ
daketapai txakabu mei beyuskĩ
yura betsa isĩ tenemai
hunibu txakabu nawai besi atimapaibu keska
mĩ hawa hatu txibãma ikũkaĩshanaii.
16-17 Deusũ mia unanepa waya
txipash Deusbe yubakatã beneyabiani
Deuskiri hakimatã hawẽ bene ma henebainima
mĩ hakiri hawa unãma
ha aĩbu hininipatũ hãtxa hawẽruawẽ
mia hawẽ kemumakĩ mia yubakatsi ikaya
pe shinãkubaini txakabukatsi ikama
mĩ hawaira putabaĩtiruki.
18 Ha aĩbu hininipatũ hiwe anu tsuara kairã,
ha baiwẽ yura mawai bumis keskabuki.
19 Hawẽ hiwe anu hikitã ana txĩtũkirãtirubumaki,
hawẽ hiwea bai pepa ana betxitã txibãmarã.
20-21 Hakia tsuabũra hawa kaneama
inũ hatuki txanitxakama
pe besti hiwekubaini
na mai anu hiweyukubaĩmisbuwẽ taea
miari pe hiwekĩ bai pepa txibãkubaĩshãwẽ,
pepabũ amisbu keska akubainirã.
22 Hamẽ habu parananãmisbu inũ
hunibu txakabukubaĩmisbu
mibã betsea keska wakĩ Senhor Deusũ hatu urẽshanikiki,
na mai anu ana hatu hiwemamarã.