PROVÉRBIOS
Unanepã hãtxa kushipakiri yusinikiaki, na hãtxarã
1
Davĩ huni bake Israelĩ enabu shanẽ ibuhaira Salomãonẽ yusĩti hãtxa 2 hawenabũ tapĩtirubuwẽ taeshũ yusĩkubainikiaki, eska hatu yuikinã.Yusĩti inũ, unanepati inũ, merabewakĩ tapĩmati
hãtxa nĩkai hau pekubainũbũ inũ,
3 yusĩti inũ, pe shinãmati inũ, txanima
parãtima inũ, hawa txakabuwatima inũ,
unanuma hiweti inũ, bebũkiri hĩ hĩ ikama
yui pewati hau pehaira tapĩkubainũbũ inũ,
4 hawara bebũkiri unãriabuma tapĩ
hau unanepashanũbũ,
berunãbu shinãmati inũ nĩkaisbuma nemati
hatu tapĩmakĩ hawẽ yusĩti hãtxa
Salomãonẽ hawenabu haskawẽ hiwetirubu
hawẽ kenenika hatu kenemashunikiaki.
5 Yurabu unanepa inũ
tapĩhairanikatũ yusiã nĩkakĩ
ana unanepahairakĩ
dasibi haska tapĩkubaĩmis
shinãkĩ ana shabakabi tapĩtirubuki,
6 unanepabũ yusĩti hãtxa inũ,
habũ haska miyuiwẽ yusĩmisbu inũ,
habũ hunea hãtxa nĩkakĩ pewakatsis ikinã.
7 Senhor Deus duawakĩ haki datekĩ hawẽ hãtxa nĩka pewakĩ
unanepakĩ tapĩ taewabaĩtirubuki.
Hakia tsuara unaĩsmapabũ
unanepati inũ yusĩti hãtxa pepa danãmisbuki.
Salomãonẽ hawẽ bake yusinikiaki, na hãtxarã
8 Epaã, mĩ ẽ huni bakewẽ taeshũ
ẽ yusiã mia yusinũ nĩkakĩ pewawe.
Mĩ ewã yusiãri danãkĩ nĩkasyamashãwẽ.
9 Mĩ epã yusĩti inũ mĩ ewã yusĩti mĩ heneama
hawẽ mĩ hawẽruai mia uĩtirubuki,
teuti inũ maiti hawẽruahaira mĩ sawea keskarã.
10 Huni txakabubũ mia parãkatsis ikaibu
hawa hatu nĩkakĩ txibãyamashãwẽ.
11 Tsuãra mia yuikĩ: “Nukube kawe.
Hawa shinãma hatu parãtã tsuara tenanũ bukãwẽ.
Hawa nuku txakabuwamabia huai
daĩbaĩkĩ detenũ bukãwẽ.
12 Huni mawa maiwabu maĩ sheamis keska hatu wakĩ
hunibu hiweabu hatu tenãkĩ nũ hatu yamawashanaii.
13 Hatu haska watã hatũ mabu yumetsushũ
mabu betsa betsapa pepa bitã
nukũ hiwe tibi nũ mata watiruki.
14 Haska wai mĩ nukube ka
hawara bitã mibetã habiaskas nũ pashka pewakubaĩshanaii”,
akĩ mia yuiaibu hatũ hãtxa nĩkama danãshãwẽ.
15-16 Mĩ ẽ bakewẽ taeshũ epaã, txakabu txibãyamashãwẽ.
Tsuara hawaira tenãkatsis ikaibube hatũ bai txibaĩ hatube kayamashãwẽ.
17 Isa peiyabũ uiaĩ berubi birũ wãkinã,
hamẽ amisbuki.
18 Hakia ha huni txakabubũ hatu tenãkatsi ikĩ
birũwã keska wakinã,
ibubis hatũ hiwea mese wakĩ amisbuki.
19 Habunã, kemukĩ mabu besti hatu parãtã bikubainaibu
ibubis haska kemui parananãmisbuwẽ taea
hawẽ henei mawa bestishãkanikiki.
Unanepatũ hatu tapĩmakatsi hatu kenamisbukiaki, na hãtxarã
20 Mae namakis bai tibi hashpa inũ hashpama anushũ
unanepabũ hatũ hui hatu nĩkamakĩ
21 mae hanu hikikaĩti shui inũ hanu itxamisbu anushũri
hatũ yusiã hatu yuikubaĩkĩ:
22 “Berunã hawa tapĩriabumaã,
hawa unãma besti hiwenũ ika haska betxipai
mã hatuki kasheai inũ unanepati hãtxa mã danãmisrã,
hatiã mã heneshanai?
23 Ẽ matu yusiaĩ ea nĩka pewai bekãwẽ.
Ẽ matu nemaya mã ea nĩka pewaya ẽ shinã ẽ matu atximashanaii.
24 Mã ea nĩkai benũbũ ẽ matu kenabia
hushũ mã ea hawa nĩkakatsis ikamaki.
25 Hakia hukatsi ikama
ẽ yusiã hãtxa danãkĩ
ẽ matu pewakatsi ikai ea anua
mã hawa tapĩkatsi ikamaki.
26 Hakia ma matu anu txakabuhaira huaya
eãri ẽ matu usãshanaii.
Datei mã mawakatsis ikaya
ẽ matuki kasheshanaii.
27 Mai anua niwe bei shubi shubi ibirãkĩ
dasibi matu datebirãkĩ txakabuwabirãkĩ yamawabiranaya
datei mã nuitapaya ẽ matuwẽ ana hawa nuiama ishanaii.
28 Ha shaba haskaitiã tsuãra ea kenabiaya
ẽ hawa hatu kemama ishanaii.
Habũ ea benabiai hawa eki nukuama ishãkanikiki”, iwanã,
hatu ana yuikĩ:
29 “Unanepati hãtxa danãkĩ
habũ Senhor Deus hawa duawakatsi ikabumaki.
30 Hatũ shinã ẽ hatu pewamakatsi ibia ẽ hãtxa danãkĩ
ẽ hatu yusiã nĩkakatsi isbumaki.
31 Hatũ hiweawẽ shinã txakakĩ txakabu tibi amisbuwẽ taea
nuitapai bika tenekubaĩshãkanikiki,
hatũ txakabu itxapa yaniwa keskairã.
32 Hawara pepa betsa betsapa tapĩkatsi isbumawẽ taea
habũ hawa unãma mawashãkanikiki.
Hawa yusiã pepawẽ nuisbumawẽ taea
unaĩsmapa mawai yamashãkanikiki.
33 Hakia habũ ẽ yusiã nĩka pewakubainaibu
unanuma hiwekubaĩshãkanikiki,
hawara txakabu mese huaya dateamarã”, anikiaki.