15
Hãtxa pewẽ hatu kemakĩ pewakinã,sinataibu hatu daewamisbuki.
Hakia hãtxa kushipawẽ kũyã akĩ yuikinã,
ana hatu sinatahairamamisbuki.
2 Huni unanepa hãtxakinã,
hawẽ unanepa hãtxa kaĩmamisbuki.
Hakia unaĩsmapabũ hãtxa yuibiairã,
hawa hãtxa pe yuisbumaki.
3 Senhor Deusũnã, dasibi mae tibi anuabu hatu uĩ keyubaunikiki,
habu pepabu inũ habu txakabuburã.
4 Hãtxa duapawẽ hatu unanuma hiwemakubaĩmisbuki.
Hakia beparameti hãtxawẽ hatũ huĩti nishma wakubaĩmisbuki,
hatu punu nuka wakinã.
5 Hatũ epã hatu nemakĩ pewamis hãtxa
ha unaĩsmapabũ nĩkaisbumaki, danãkinã.
Hakia unanepatũ hatũ epã hatu nemakĩ
pewamis hawẽ hãtxa nĩkakĩ
shabakabi hatu uĩmakubaĩmisbuki.
6 Huni pepa itxakanikamatũ hiwe anurã,
mabu inũ piti itxapa hayakũkaĩmiski.
Hakia huni txakabubũ mabu inũ piti itxawabiai
hawẽ hawara bibiakinã,
hawa ibubis pe merabe bitirubumaki.
7 Unanepabũ hawẽ unanepa hãtxa yuikinã,
hatũ hãtxa pepa sa aka keska wakĩ
pawabaũmisbuki.
Hakia unaĩsmapabũ shinaĩ hãtxamisburã,
hawẽ hãtxawẽ tsua hatu merabewatirubumaki.
8 Huni txakabubũ inabu Deus kuashũkĩ inãkuiaĩbu
Senhor Deusũ hatu danãkĩ uĩkatsi ismaki.
Hakia huni pepabũ Deusbe hãtxakĩ dayuikĩ yukaibu benimakĩ
Senhor Deusũ hatu nĩkamiski.
9 Haska huni txakabubũ shinã pewama hiwekubainaibu
Senhor Deusũ hatu danãkĩ betxipaismaki.
Hakia huni pepabũ pepa txibaĩ hiwei pekubainaibu
Senhor Deusũ hatu betxipaimiski.
10 Pe hiwei taebiakaĩkĩ hatũ hiwea bai henekĩ txakabuwaibu
ana hatu pewakĩ txĩtũmairã, bikahairaki.
Tsuara hatu yusĩkĩ pewabiabu
hatũ hãtxa nĩkama danainã, tenãshãkanikiki.
11 Senhor Deusũ dasibi hatu uĩmiswẽ taea
hanu mawaibu inũ hanu mawa bumisbu unã keyuikiki.
Hakia haska hatu binuawẽ taeshũ
Senhor Deusũ hunibũ shinãmis binuhairaki.
12 Patapa nĩkaisbumã hatũ nemati hãtxa betxipaisbumaki,
hatũ shinã besti betxipaikinã.
Ha dikabi unanepabu danaĩ hatube dasikatsi isbumaki.
13 Hatũ huĩti benimairã,
hatũ besu benimariai mapumisbuki.
Hamẽ hatũ huĩti punu nukarã,
kasha tenea mapumisbuki.
14 Huni shinã unanepatunã,
ana tapĩhairanũ ishũ shinã bena nĩkakubaĩmisbuki.
Hakia unaĩsmapabũ hawa pepa unãma
atimapa besti shinãkĩ yui hiwemisbuki.
15 Tsuara bika betsa betsapa tenei
shaba tibi nuitapakũkaini hiwemisbuki.
Hakia tsuara huĩti benima hayarã,
shaba tibi besi hawẽruai keskai hiwemisbuki.
16 Mabu mirima hayabia hawẽ datei hiwekubaĩtirubuki.
Hakia tsuara mabu eskarabesyabiatũ
Senhor Deus duawakĩ hatu binuhairatirubuki.
17 Sinatai dakekenãkĩ awa nami pepa hatumesti pikubaĩmisbuki.
Hakia betxipainamekĩ yunu besti haya pikinã,
ha piti pepa pimisbu hatu binuhairabuki.
18 Hawaira sinatai hãtxakĩ hatu pubẽmamisbuki.
Hakia tsuabũra pe shinaĩ hawaira sinatama
hawẽ hãtxa pewẽ hatu nemamisbuki.
19 Txikishĩ hiwearã, hawẽ hiwea bairã,
mushã kaiã besheaki.
Huni pepabũ hiwearã, bai hashpa
hawa tã akama shũpĩ anu mapua keskabuki.
20 Bake unanepabũ hatũ ibubu benimawamisbuki.
Hakia bake unaĩsmapabũ hatũ ibubu danãkĩ
hatu dake wamisbuki.
21 Bebũkiri pe shinaĩsma patapaburã,
patapa bestinũ ika benimakubaĩmisbuki.
Hakia habũ hawaira tapinikabunã,
ibubis hatũ hiwea pewakubaĩmisbuki.
22 Tsuãra hamapai anũ ishũ
hamebi yubakai hawa yuka ikamarã,
hawẽ yubaka pe kaĩtirumaki.
Hakia tsuãra hamapai anũ ishũ
unanepabu itxapabu hatu merabe yuka
habũ shinã pewẽ merabewamisburã,
hawẽ yubaka pe kaĩmamisbuki.
23 Hawara bikatsi yuka itã pepawẽ mĩ manai
hawa bikama mia yuikĩ pewashanai haska peki.
Hakia haska yuka ikĩ bikatsi shinaĩ
binumakĩ hawaira haki nukumairã, ha pehairaki.
24 Deusũ bai nai anurã, hanu unanepabu butirubuki,
txakabu mawa hanu hatu kupishanai anu buama piskuirã.
25 Ibubis kẽmisbũ hiwe Senhor Deusũ di akĩ txakabuwabiakĩ
aĩbu beneyabiani ana bene hayamatũ hiwe inũ hawẽ mibã sharabu
Senhor Deusũ mekeshũkubaĩmiski.
26 Huni txakabubu yubakaibu
Senhor Deusũ hawa betxipaiama hatu danãmiski.
Hakia habũ hãtxa txakabu yuisbuma
hatũ hãtxa pe bestiwẽ Senhor Deus benimakũkaĩmiski.
27 Tsuãra hawenas besti wanũ, iwanã, mabuwẽ kemukĩ
hawenabu duawama ibubis txakabumisbuki.
Hamẽ tsuãra hawẽ txakabuwẽ taeshũ
shanẽ ibu hune pei inãpaia danãkubaĩmisrã,
hiwei pekũkaĩkĩ
Senhor Deus benimawamiski.
28 Pepabũ ha dukũ shinã pewatã
ha katxu hãtxa pepawẽ hatu kema pewamisbuki.
Hakia huni txakabubũ hawa shinã pewama
hawaira hãtxa txakabu kaĩmamisbuki.
29 Huni txakabubu Senhor Deusbe hãtxakĩ yukabiabu
hawa hatu kemakĩ nĩkaismaki.
Hakia huni pepabu Senhor Deusbe hãtxakĩ yukaibu
hatũ hãtxa hatu nĩkakubaĩmiski.
30 Tsuãra besu hawẽrua sinatama uĩ benimamisbuki.
Ha inũ, tsuãra kakape bana nĩkatã
shinã txãkaĩ hawẽ benimai hawẽ kushipakubaĩmisbuki.
31 Tsuãra txakabuwai unanepabũ hatu nema
hatũ hãtxa nĩkai
unanepabu ibuwatã hatube tsaushãkanikiki.
32 Tsuãra txakabuwai nemabiabu
hatũ nemati hãtxa nĩkama hatumebi danananãmisbuki.
Hakia tsuãra hatũ nemati hãtxa nĩkakĩ tapĩkubainirã,
beshtekei unanepamisbuki.
33 Senhor Deusũ nemati hãtxa tsuara hawẽ datekinã,
hawẽ unanepakĩ tapĩkubaĩmisbuki.
Txipu matu kẽwãshanaiburã,
ha dukũ ibubis keãma pe hiwekũkaĩtiki.