40
1-2 Senhor Deusũ Jó ana yuikubaĩkĩ:“Mianã, ẽ Deus kushipahaira dasibi binuatũ
haska eã betxipaikĩ ẽ amis nĩkamas ana ea pewakĩ
mĩ ea ana txitekatsis ikai?” aka
3-4 Jó hawa yuitiruma unãshubira yuikĩ:
“Ẽ hawamahairawẽ taeshũ
ẽ mia hawa ana hãtxa watirumahairaki.
5 Ẽ haibuaibu ma ẽ hatu dabeki yuikubaĩshinaki.
Ana hãtxa betsa yuikĩ ẽ mia hawa yuitirumaki”, aka
Hawẽ kushipa Deusũ Jó shabakabi ana unãmanikiaki, na hãtxarã
6 hanua niwe kushipa shubi shubi ikai anushũ hãtxa wakĩ Senhor Deusũ Jó ana yuikĩ:
7 “Natiã haska mĩ kushipamis
ea uĩmariwe,
na yukati tibi ẽ mia yukai ea kemakinã.
8 Miã ea txitekinã,
kanekĩ ẽ txakabuwaima miã mĩ ea yuiai?
Hanua mia ikirã, dasibibu bebũ
hawa txakabuwaisma mĩ kaĩkatsis ikai?
9 Miarã, mĩ kushipa hayamẽ,
ea ẽ Deus kushipa haya keskarã?
Mĩ huirã, ena keskamẽ,
kana tĩ ikaĩkainai dẽke ikainai keskarã?
10 Shanẽ ibukĩ kushipa sawea keskai kushipai hawẽruai
txasha txasha iki keskawẽ yabukuwe.
11 Ha ibubis kẽkubainaibu dasibi hatu uĩ
hatuki sinatakĩ babu wakĩ hatu dake wawe.
12 Tsuabura ibubis keĩ hãtxamisbu
hatu uĩ bestikĩ di akawakĩ
hatu beshtewe.
Hanira hunibu txakabu mĩ hatuki nukuairã,
hatu txusha keska wakĩ dake wakĩ hatu beshtewe.
13 Mai anu maiwati uke merãhaira anu hatu bitxikĩ bepuwe,
ha mawaburã.
14 Mĩ haska waya,
‘Mĩ kushipawẽ mĩ ibubis maematã meketiruki’,
akĩ eã ẽ mia unãshanaii”, atã
15 ana Deusũ yuikĩ:
“Yuinaka itamamahaira Beemotekiri shinãwẽ.
Yuinaka Beemote inũ mia ẽ matu dami waniki.
Habunã, ina awa keskakĩ basi besti pikubaĩmisbuki.
16 Kushipahaira hawẽ kati nami inũ
hawẽ pubi namirã, babumahairaki.
17 Hawẽ kate hinarã, txarishki, kusha hi keskarã.
Hawẽ kishi punu hawẽ taeki tsamiakeakea kushipahairaki.
18 Hawẽ shau tibi mane bronze shãkiã keska inũ
hawẽ kishi inũ hawẽ pũyã
mane kushipa ferro keska kushipahairaki.
19 Ha yuinaka Beemote dami wakĩ
dasibi yuinaka betsa ẽ hatu binumakĩ keyuniki.
Eã ẽ dami waniwẽ taeshũ
eã besti tenãkĩ ẽ yamawatiruki.
20 Mati matipa anu hanu yuinaka betsa pianãbu hiwea beyusbiamisbukẽ
habianushũri basi hukuaĩ yuinaka Beemote beshũ pikubaĩmisbuki.
21 Ha inũ, hi betsa utapã namã dakai inũ
iã kesha tawa anu hunea manimisbuki.
22 Pashku kesha hi inũ hi betsa utapãri
shukua mapubauna anu utamisbuki.
23 Hene Jordão bai matai kushibiranaya hawa dateisbumaki.
Hatũ dekĩ anu hene kesubiakẽ unanuma mapumisbuki.
24 Hatũ beru tsekanũ, iwanã,
tsuã hatu atxitirumẽ?
Hatũ dekĩ anu tsuã hatu deuwatirumẽ?
Tsuã haska watirumahairaki.