39
“Mati matipa anua yuinaka cabra hatiãhawẽ bake kaĩmisrã, mĩ unaĩ?
Txashu bake kaĩ kamiairã, mĩ ma uĩmamẽ?
2 Hati ushe txashu bakeyatã hanu kaĩmis
mĩ ma unaĩ?
3 Txashu yushã hawẽ bake kainũ ika
kami txĩtxa daka kaĩtã isĩhairai maĩmiski.
4 Hanua kaĩtãs hamebi benia damesteni kushipatã
ni anua ewatã txipu hawẽ ibu dapashkabaĩmiski,
ana hanu hawẽ ibu anu txĩtuãmarã.
5 Jumento inabiakẽ tsuã nitxinimẽ,
hau yuinaka betsa keskai hamebi hiwekũkainunã,
hawẽ nesha pekatã tsuã mekeama
hau ibubis hiwenũ tashnimakinã?
6 Hanu tsua hiweabuma anu napãpa mai salya
hau hanu hiwenũbũ ha jumento nitxĩkĩ
uĩmakĩ eã ẽ hatu metuniki.
7 Mae ewapa anua yurabu hãtxawaĩbu jumentõ hatu betxipaiama
inũ habũ jumento yunukĩ sai amisbu nĩkakatsi isbumaki.
8 Pinũ ika mati inũ pãpa tibi anu
basi pepa benai jumento nikũkaũmiski.
9 Ina awa bene ibuuma yuinaka keska hiwekũkaĩmis
mia dayashũtiru mĩ shinaĩ,
mĩ ina hiwe anu pubẽbiakẽ ushãkubaĩkinã?
Mĩ haska bitxitirumahairaki.
10 Ha ina awa mĩ dayamakatsis ikai hi tekishkũshũ nĩkamas
mĩ bai berẽ amakĩ hẽ iyamabiaya mĩ pewamabaĩtirumẽ?
Kayãbis kakĩ dayakaĩkĩ mia katxũ kaya
mia pukĩ pukĩ akĩ pewashũbaĩtirumẽ?
11 Mĩ daya hau ibubis mia ashũkubainũ
ina awa bene pubẽ kushipawẽ taeshũ
mia pe dayashunũ ha besti mĩ henetirumẽ?
12 Mĩ shekiwã trigo tsekashũ
mĩ mae anu hanushũ mĩ shememis anu mia itxawashũtirurã,
haska mĩ shinaĩ?
Mia haska washũtirumahairaki, pubẽhairawẽ taearã.
13 Yuinaka peiya avestruz hawẽ pei bitxu nãketapa keskabia
benimai pea pea ibiamis manaũri nuyakaĩtirumaki,
hawẽ pei kushipamawẽ taearã.
14 Hanua bari txashakĩ hawẽ batxi hau shana wanũ
hawẽ batxi mashi anu paketã henebaĩmiski,
15 yurabu inũ yuinakapã pemakĩ
hawẽ batxi txakabuwãtiru hawa shinaĩ hawa nuiamarã.
16 Hawenama keska hatũ bake ibubis tushiabu
hatu hawa mekeisbumaki,
hawẽ batxi pakei hamẽ dayashina hawa ana shinãmarã.
17 Eanã, avestruz hawa unanepati ẽ inãma iniki,
hawa pe shinãtiruma wakinã.
18 Hakia benitã pea pea ikayabi kushikaĩkĩ
cavaloki katsaumea buaibu
hawaira hatu binubaĩkĩ hatu usãbaĩmiski.
19 Cavalo kushipa wakĩ inũ
hawẽ teshu anu bu txaipa hawẽrua wakinã,
miã mĩ animẽ?
20 Yurabu datehairamai hãsh hãsh iki
cavalo mĩ ishtxumatirumẽ,
shini ishtxumis keska wakinã?
21 Kanũ ika hawẽ kushipa hatu uĩmai
pãpa anua taweshiki taweshiki ikĩ
huni katsaumea detenameaibu anu
hawa dateama cavalo hikibaĩmisbuki.
22-23 Hawara mesehairabiakẽ usaĩ huni haki katsaumea
hawẽ pia itxapa txineshekeaya bei
kushama kushama abiranaibũ inũ nupe txaipa inũ
hashi txaipawẽ detenamei baka baka iki detenameaibũ
hawa datei teku itã cavalo txĩtuĩsbumaki.
24-25 Txaikea detenamei sai sai ikaibu
cavalõ nĩkakĩ hatũ himi shetei
hanua trombeta txã txã akaibũ
ana hawẽ dekĩwẽ hãsh hãsh iki
hawa manai pes nitiruma
tsuã hatu nematiruma
detenameaibu anu hawaira kushibaĩmisbuki.
26 Hamẽ betsarã, hau tete nuya tapĩtã sulkiri nuyakaĩtanũ
unanepa wakĩ miã mĩ yusĩmismẽ?
27 Nawa tetẽ hau manaũrihaira hawẽ batxi paketi na wanũ
pewamakinã, habia miã mĩ amamismẽ?
28 Mati keyatapahaira mamaki mishki betsa naeshpa anu
nawa tete yushã hanu bariri inũ meshu merã huĩrukũkatsi
hanu hawa hikitiruma
ushakatsi na wakĩ hawẽ iruti watã hiwemiski.
29-30 Hari manaũrihairashũ manakĩ hawẽ piti nami hawara betxitã atxishũ
hawẽ bakebu nami himiyabi pimakubaĩmiski.
Yuinaka betsa mawa inũ detenamei mawabu anu
nawa tetẽ nami pi itxa mapumisbuki”, itã