Jó shinã betsa betsapa Deusũ unãti wamanikiaki, na hãtxarã
38
Hanua niwe kushipa shubi shubi ikai anushũ hãtxa wakĩ Senhor Deusũ Jó yukakĩ:2 “Ẽ mia ashũmis hawa pe ekiri tapĩkĩ
mĩ unãriamabia ekiri hatu yuikĩ
shabakabi wama hunei mĩ hãtxakũkainairã,
habia mĩ miaki”, atã,
3 “Mĩ kushipawẽ hawa dateama
mĩ ea ikũhairawamisrã, ea uĩmawe,
na yukati tibi ẽ mia yukai ea kemakinã.
4 Mĩ txanima unanepahairarã,
ha mai dami wakĩ ẽ taewayarã,
miarã, mĩ hani inimẽkaĩ ea yuiwe.
5 Mai dami wakĩ taewakĩ tana keyukĩ
hatishũ hawẽ kesu wakea tsuã ani mĩ unaĩ?
Tsua inimẽ, ha mai dami wai dayairã?
6-7 Ẽ nai tsumabu benimahairakĩ ea kẽwaĩbũ
penamahaira bishi hatiri txashai taekirani
habe benimai kãtaibũ
ha mishkipawã kushipahaira hawẽ mai mestẽwãkĩ
ha dukũ hanakinã, tsuã animẽ?
8 Mai uke meranua dasibi ianẽwã tuebiranairã,
tsuã hene nemakĩ maĩwẽ bepukĩ
kesha wakĩ metu wabaunimẽ?
9-10 Ianẽwã nemakĩ hawẽ kesha hatishũ
kesu kawanawakĩ eã ẽ aniki.
Dasibi bepu pewakinã, nai kuĩ hawẽ tari keska wakĩ inũ
basnũri hawẽ bakeishta yabukuti keska wakĩ
ianẽwã ẽ ashuniki.
11 Haska watã ianẽwã yuikĩ:
‘Hanu besti kesua tũkash ikĩ tsakabirãbirãshãwẽ,
ana unuri binuamarã’, akĩ ẽ nemaniki.
12 Penai hau bari txashai pekiranunã, hiwekũkaĩkinã,
mĩ ma haska yunuimamẽ,
eã ẽ amis keska wakinã?
13 Mai hirabi hau shaba wanũ yunukĩ
inũ huni txakabubu hau datei pashanũbũ
mai taka taka akĩ hatu putakĩ
mĩ kushipawẽ mĩ ma yunuimamẽ?
14 Bari txashakiranaya mai besu betsai mati matipa
tari hawẽruai keskai tashi mirĩ itiruki.
15 Bari txashakĩ huni txakabubu atxibiatã hunekaĩmis keskai
huni sinatamisbu keyushanikiki.
16 Ha ianẽwã uke merã hunea
hanua habai uinã, mĩ ma katanimamẽ?
17 Hanu mawabu bumisbu meshuhaira anu
hawẽ hikiti beputi shuirã, mĩ ma uĩtanimamẽ?
18 Mai hirabi hatishũ kesuakea hawẽ hashpa inũ hawẽ txaiparã,
mĩ unaĩ?
Haska ẽ mia yukakubainairã,
txanima dasibi mĩ unã keyuimẽkaĩ, ea yuiwe.
19 Shaba inũ meshu hanu irumisrã, mĩ unaĩ?
20 Hawẽ kati baiwẽ mai hirabi txaihaira dũkemabaũkĩ
bari inũ meshu ana txĩtũwãbirãkinã,
mĩ hatu yunutirumẽ?
21 Mĩ haska yunutirumahairaki.
Mai bawakĩ dasibi ẽ dami waitiã
mĩ kaini bari itxapa mĩ hayabia
dasibi ẽ dami wani mĩ unãtirumahairaki.
22-23 Hanu detenamei nuitapaibutiã
huni txakabubu hawẽ hatu kupishanũ, iwanã,
ha ui matsihaira inũ barush ui hanu ẽ arua
hari kashũ mĩ ma uĩtanimamẽ?
24 Haratu baiwẽ shaba hui
ibubis txashakirani pabirãmismẽ?
Niwe bari huaikiria shũku ibirani
haskatã pua iki pabaĩmismẽ?
25-27 Ha mai tsusĩhaira anu hanu tsua hiweabuma anu
txa akĩ hau basi benemanũ
tĩ ikaĩkaini kana baka baka ikai yunukĩ
tsuã ui bepẽkĩ ui ima txakayamamismẽ?
28 Ui inũ basnunã,
hatũ dami wanirã, ibu hunirã, tsuamẽ?
29-30 Mati keyatapahaira anua
matsihaira wakĩ pashku inũ, hene inũ,
ianẽwã batapa tãkimamisrã,
tsuamẽ, haki banirã?
31 Bishi shukua hawẽ kena Sete-estrelo
miã mĩ hatu meketirumẽ, hawa pashkamarã?
Ha inũ, bishi shukua betsa Órionã,
miã mĩ pashkatirumẽ, maewakinã?
32 Bishi shukua tibirã, hanu kaiaĩtianã,
miã mĩ hatu tashnimamismẽ?
Bishi shukua dabe Ursa Ewa inũ Ursã Bakerã,
hanu dakai anu miã mĩ hatu maewakubaĩmismẽ?
33 Nai anua shanẽ ibukĩ haska dayakĩ ẽ yunukubainairã,
mĩ unaĩ?
Haska ẽ yunumis mai anushũri habias keskari
mĩ yunuriamismẽ?
34 Hau miki ui itxakayamanũ
mĩ hãtxa bestiwẽ nai kuĩ mĩ yunutirumẽ?
35 Mĩ yunua haniara kana baka baka itã mia yuikĩ:
‘Nũ nenuki, mĩ nuku yunua nũ ikairã’, ikĩ mia yuibainaiburã,
mĩ haska nĩkamismẽ?
36 Tsuã yurabu unanepa wakubaĩmismẽ?
Hunibũ yushĩ nĩkanikaya wakinã,
tsuã hatu haska wakubaĩmismẽ?
37-38 Unanepahairakĩ nai kuĩ hati haya
tsuã tanatirumẽ?
Mai mishpu tãki keyua dasibi tsusĩ anu
tsuã ui imatirumẽ,
nai kuĩki ũpash mata maĩ huka keska wakinã?
39-40 Inu betsa leão yushanẽ hawẽ bakebu pimakĩ
hatu yani wamanũ ika
hatũ kini uke merã kasmai
txaka merãshũ manaibu
yuinaka miã deteshũ mĩ hatu beshũmismẽ?
41 Tete meshupã bakebu hawa pitima
ĩsh ĩsh ikĩ ea merabe yukakubainaibũ
tsuã ibu merabewa hatu piti bishũmismẽ?” atã,