41
Ha kape pubẽ itamamahaira hawẽ kena tsatsakapetãwãkiri shinãhairawe.Sheamati ewapawẽ sheamakĩ mĩ bitirumẽ?
Dispiwẽ hawẽ hana mĩ neshatirumẽ?
2 Hawẽ dekĩ shui dabe anu dispi mistubaĩ
mĩ neshatirumẽ?
Mane betãtiwẽ hawẽ kui mĩ betãtirumẽ?
3 Hawẽ daewati hãtxawẽ hau mĩ hawẽ nuinũ
tsatsakapetãwanẽ mia ea akĩ
yukatiru mĩ shinaĩ?
4 Hawẽ hiwea dasibi mĩ dayaru escravo hau ikũkaĩshanũ
mĩ habe yubakatiru mĩ shinaĩ? Haskatimahairaki!
5 Isa pishtabe mĩ beyusmis keskai
ha tsatsakapetãwãbe mĩ beyus shanai?
Mĩ aĩbu bakebube hau habe beyusnũbũ
mĩ hatu neshashũshanai?
Mĩ haska watirumahairaki!
6 Piti inananaĩ biananãmisbu hiwe anu tsatsakapetãwã iyua
hati hawẽ karuwẽ taea binũ ika ibube ha itirubumẽ?
Hatu inãkĩ hawẽ yura mĩ meshte meshte atirumẽ?
Pubẽhairakẽ mĩ haska watirumahairaki!
7 Pia kuĩ itxapawẽ hawẽ bitxi pesakĩ
ukeri kaĩmakĩ mĩ teshũ wãtirumẽ?
Hawẽ bushkaki hashiwẽ mĩ txatxitirumẽ?
Mĩ atirumahairaki!
8 Atxinũ, iwanã, mĩ mamepia hawẽ kushipawẽ mia binukĩ
maemashanikiki, mia isĩ tenemakinã.
Hanushũ mĩ ana metirumahairaki.
9 Tsuabũra tsatsakapetãwã hawẽ yura uĩ besti
date paepai shinanẽtirubuki.
10 Tsuãra tsatsakapetãwã bestẽ wãkĩ
betxima sinatahairaya
tsua ha bebũ katirumahairaki, binubaunirã.
Ea Deus kushipahaira dasibi binuatũ
besti ẽ binutiruki.
11 Dasibi nai namã haya enaski.
Haskawẽ taeshũ haska betxipaikĩ ẽ amiskiri
tsuãra ea txitetirumaki.
12 Tsatsakapetãwã hawẽ pabu tibi inũ
hawẽ yura kushipahaira yuinaka betsã binuamawẽ taea
ẽ hakiri yui henetirumaki.
13 Hawẽ bitxi shaka keshtuhaira txatxikĩ
tsuã pesatirumẽ?
Hawẽ bitxi kushipahaira babuma tsuã dashpetirumẽ?
14 Hawẽ deta txaipa sheta itxapa mapua mesehaira
tsuã hashpa watirumẽ?
15 Hawẽ yura shaka tsami keku dakabaina
kushihaira mishki keskaki.
16 Hawẽ shaka tsamiarã,
hanus kekubaina niwe hikikaĩtirumaki.
17 Ha hawẽ shaka tsami mestẽhairabainawẽ taeshũ
tsuã besha wakĩ pashkatirumaki.
18 Hawẽ hui aũ aũ iki kana bakai keskamiski.
Hawẽ beru txashahaira tashipa bari tashnikirani
txashamis keskaki.
19 Hawẽ dekĩ anua txi here kaĩ
dekẽ bishi bishi imiski.
20 Hawẽ dekĩ anua kuĩ kaĩmiski,
kẽti pitxã kukatsa iki kuĩ puamis keskairã.
21 Hawẽ hashpa anua txi here shũ akĩ
tsiste keti wamiski.
22 Hawẽ teshu kushipahairawẽ taea
dasibi ha bebũ mapua datehairamisbuki.
23 Hawẽ yura nami tibi hawa babu hayama dasibi kushihairaki,
mane ferro payua keska tsuã txatxikĩ pesatiruma keskarã.
24 Hawẽ huĩti mãkã keska kushihairaki,
mishki deneti keskarã.
25 Tsatsakapetãwã benikĩ hatu datea
haki mesei yushibubu date paepai pashamisbuki.
26 Nupe txaipa kenuhaira inũ, hashi kenuhaira inũ,
pia kuĩ hawẽ debu mane kenuhaira denetamea inũ,
detenameti betsa dardo habu sharabuwẽ
tsuã tenãtirumaki.
27 Hatũ shinanã, mane ferrorã, tawa shana keska inũ
mane bronze hi txapui keskakẽ
tsatsakapetãwã hatiki dateismahairaki.
28 Pia kuĩwẽ tsakabiabu hawẽ datei pashatirumaki.
Mãkã tũku haki puta puta abiabu hawẽ dateama
basi shana puta puta akaibu keska shinãmiski.
29 Binu ewapa kushipawẽ hatu makush makush aka
tawa shanawẽ hatu kusha kusha aka keska inũ
txatxiti haki putabu hawẽ hui nĩkai
hawa dateama usãmiski.
30 Hawẽ nuta shakawẽ pupus anu sharakaĩkĩ
bai tapĩbaĩkĩ tsispubaĩmiski.
31 Hawẽ yura itamamawẽ taea
ianẽwã nua merã hikikaĩkinã,
kẽti kukatsa ikai keskai inũ
dau sheniya kapamana buspuai keska wabaĩmiski.
32 Hanua hene shatebaina
hatxũ hene betxũkaini
hawẽ betxũ hushupahaira henebaina
bu hushupa niwe shũku ikaĩkĩ
pexa wabaina keskamiski.
33 Mai hirabi anua tsatsakapetãwã keska
yuinaka betsa hayamaki.
Hau tsuaki date taskayamashanũ ẽ dami waniki.
34 Yuinaka betsa pianã mesebia dasibi hau haki dateshanũbũ
hatũ shanẽ ibu wakĩ yuinaka dasibi ẽ binumaniki”, aka