Si Paulus Di Puru' Malta
28
1 Pegompot mi di pasig,
bu' ihi kimpandi ngaardn puru' na Malta.
2 Lama di puru' dia mpia adab di dihi.
Siga lama na ingua' inulukng dihi ma' inuud dihi ingidihit api pasal dolok ma' ramig bunua na.
3 Si Paulus imompodn kiou api.
Atakng nya nguduut api,
taha-taha na kiara ulakng mbisa limuas tidi kiou ipenasadn ma' ininduk pii' nya.
4 Waktu kuberaman lama di puru' dia kiliid ulakng na bibitidn di pii' i Paulus,
siga lama na nigsuad deirdn nda,
“Lama nti bengkali bas imati lama.
Walaupudn sia selamat na tidi loud,
tei' Tuadn Umur nda' mpibiar nya biag.”
5 Tei' si Paulus ingondi' ulakng na kindi soig api na ma' toyuk pudn sia nda' kerasa sahit na.
6 Siga lama na nggait pii' nya nggubara' atau pudn taha na sia mereba' mati.
Tei' pegka meleid na nggait ma' kiliid nya pudn ndara hai onu-onu,
siga lama na mpihir sia lama Midua.
7 Nda' modu' tidia kiara tana' kutua' puru' dia,
ngaardn nya si Publius.
Sia mpia nirima dihi ma' kutuluadn leid mi metak di bali nya.
8 Waktu ina ama' i Publius kiladu.
Sia temodob ma' temoi raa'.
Si Paulus ingahap nya ma' inguduaa sembela' nya ineronggodn ama' i Publius ma' ipekemaa' nya.
9 Pasal ina,
nentaadn na lama kiladu di puru' dia ingua' kindi i Paulus supaya ga sida nuan mpekemaa'.
10 Siga lama na imori di dihi mbarabm medoot.
Ma' waktu mi mingad na tumulak,
siga lama na nidia' medoot adi dihi nggien mi limiaag.
Si Paulus Tidi Puru' Malta Kindi Bandar Rum
11 Tolu mbuaidn leid mi mien dia,
inubu' ihi limiaag miniaa' ihi kapal tidi bandar Iskandaria.
Meleid na lelabu dia,
leid igait kosog.
Kapal na kiara saap gambar Giidn Apid.
12 Ihi ikompot di bandar Sirakusa ma' belabu dia kutuluadn leid.
13 Tidia ihi limiaag pa kindi bandar Regium.
Sikng suub dodos mulei ingiup tidi selatadn,
inubu' ihi timulak.
Sengolu senggerobi nubu' ihi ikompot di bandar Putioli.
14 Dia na ihi nigtomu ma' kuberaman lama pisiaa di Yesus.
Siga lama na igiit dihi minien di bali nda kuturuadn leid.
Inubu' ihi limombus kindi bandar Rum.
15 Suhu lama pisiaa di Yesus di bandar Rum ikidoor birta mi matakng kindi Rum.
Siga lama na ingua' timomu dihi di bandar Apius ma' simbatu bunua bitangan lama Tolu Bali Nggien Temalakng.
Waktu i Paulus ikiliid siga lama na,
sia senang guakng ma' megsuhur di Itala.
Si Paulus Ipompot Birta Tidi Itala Di Bandar Rum
16 Pegompot mi di Rum,
si Paulus pinisuru metak di bali dia singgurua bali na deirdn na ma' simbatu sojar ngijaga nya.
17 Odu kutuluadn si Paulus igisuru' suhu kupala lama Yuhudi di Rum ingua' ingahap deirdn na.
Pegpompodn siga lama na dia,
si Paulus nigsuad,
“Suhu dihu singgurua pusud ku,
walaupudn ou ndara sala' di bangsa ti atau pudn ndou bas ingeranggar adat bineri apu'-otud ti di dihiti,
tei' ou diahap di Yurusalam ma' bineri di lama Rum.
18 Siga lama na imeriksa' diaadn ma' ngundakng mpelepas diaadn pasal ndara keselaadn ma' nda' patut uhuman mati.
19 Tei' lama Yuhudi nda' ngahudn ma' ou piaksa' ikiuhubm di raja migia kuasa di bandar Rum walaupudn ou nda' bas ngadu aal kentangan bangsa ti.
20 Ina na,
ou igisuru' dihu kinditi supaya ga ou kaap susuad ma' dihu.
Ou riohod duma' ranti kati' pasal ou pisiaa di Kiristus pinili' Itala nuan bangsa Yuhudi ngarap.”
21 Siga lama na miabat,
“Ihi nda' bas nirima suart tidi bunua Yudia.
Ndara ma' simbatu pudn lama Yuhudi miatakng nggiit birta mpia atau pudn ndoot kentangan diha.
22 Tei' ihi pudn mingin kai kidoor kentangan pungga' ga' nu pisiaa pasal ihi pandi mbimbi ga bunua lama musulaadn ajaardn kentangan Kiristus.”
23 Inubu' siga lama na ma' i Paulus inotog odu nggien megtomu malik.
Pegompot odu pegtumuan na,
mbarabm pa lama miatakng di bali nggien i Paulus metak.
Tidi rigiodu sampai na nunsul salakng sia imoro' siga lama na pungga' buat Itala mogot lama pisiaa di deirdn na.
Si Paulus mahi Kitab sinuart nabi Musa ma' nabi leidn ringa' bu' nggien nya inginam igiit siga lama na pisiaa di Yesus.
24 Sebagi pisiaa susuad i Paulus ma' sebagi nda'.
25 Pihiardn siga lama na nda' nigsuat,
tei' nda' pa siga lama na miuhad tidia,
si Paulus nigsuad di siga lama na.
Uubm nya,
“Asal kebenaardn onu bas sinisuad Midua Itala di nabi Yesaya ringa' bu' kindi apu'-otud ti:
26 ‘Panu na ma' perai di bangsa nti,
“Uhu meseirt na kidoor birta ku,
tei' nduhu kerati.
Uhu meseirt na kiliid onu nuan ku mbuat,
tei' nduhu ketondu'.
27 Pasal bangsa nti ngkotul ati,
siga lama na nutup tilinga nda supaya ga nda' kidoor,
ma' siga lama na nutup mata nda supaya ga nda' kiliid.
Siga lama na nda' kerati sampai ndara ati timiligud tidi dusa nda maa' ga ou ngua' nelamat siga lama na.”
’ ”
28 Si Paulus inambukng malik susuad na.
Uubm nya,
“Ina na,
uhu mistii' kempandi pasal bangsa Yuhudi nda' nirima birta kentangan pungga' ga' Itala nelamat munusia',
Itala bas na ipiit dihi kindi bangsa leidn ma' moro' siga lama na.”
[
29 Pegpunga i Paulus susuad oo' nga,
minili' na lama Yuhudi sembela' siga lama na nigtangkar deirdn nda.]
30 Dua ntoudn leid i Paulus metak di bandar Rum di bali sewa na deirdn na.
Sia nirima nentaadn na lama ngua' ngahap deirdn na.
31 Sia ketogu' mpompot Birta Mpia pungga' buat Itala mogot lama pisiaa di deirdn na ma' ngira' kentangan Yesus Kiristus Guruadn munusia'.
Pirinta Rum pudn nda' ngerarakng nya.