Si Petrus Pinelepas Tidi Giil
12
1 Waktu ina raja Herodes mulei iniksa' sebagi lama pisiaa di bandar Yurusalam.
2 Sia igisuru' lama ininggulu ny Yakobus,
pusud ny Yohanes.
3 Pegpandi raja Herodes aal ina mpesenang guakng lama Yuhudi,
sia igisuru' lama ngedahap i Petrus pasi.
Waktu ina ngam-ngam Ari Raya' Ruti Ndara Ragi'.a
4 Pegdahap i Petrus,
raja Herodes igisuru' nuga' nya di soig giil gigipatadn epaat lusidn sojar.
Sungulusidn epaat tuni megganti-ganti ngijaga.
Sia mingin ngedabu' uhuman mati di i Petrus di tingguangan kuberaman lama dia bakng punga na Ari Raya' Paska.
5 Si Petrus tinaadn di soig giil,
tei' suhu lama pisiaa dia nguduaa baar-baar di Itala adi nya.
6 Na robi nda' pa raja Herodes nguhubm i Petrus di tingguangan kuberaman lama dia,
si Petrus ikodop di oit-oit dua tuni sojar.
Sia riohod ma' ranti atakng sojar ngijaga di bobo' pintu' na.
7 Taha-taha na meleyhat Guruadn miusag dia ma' singgurua siur ntelak di soig giil na.
Meleyhat na ingilinggakng i Petrus ma' iniag nya sembela' nya igsuad,
“Taas udukng na!”
Waktu ina hai iloput na ranti tidi longon i Petrus.
8 Pegpunga ina,
nigsuad na melik meleyhat na,
“Sigata' na tali pinggakng nu ma' pegkasut na.”
Si Petrus miniaa' singgurua siuru' meleyhat na.
Inubu' meleyhat na igisuru' nya malik,
“Pemahi na juba nu ma' biaa' na diaadn!”
9 Inubu' si Petrus miniaa' meleyhat na limuas tidi soig giil,
tei' sia nda' pandi ina kebenaardn ndedi ma' nda'.
Tadn na nya pa' pingidadn na ga.
10 Peglalu siga lama na nggien ngijaga bu' ma' ngindua ikompot na siga lama na di pintu' bosi daidn nggien lumuas kindi bandar.
Taha na pintu' na kimbuha' deirdn na,
inubu' siga lama na limuas.
Pegpanu siga lama na di simbatu daidn,
taha na meleyhat na nigliap ga.
11 Pegliman i Petrus,
sia nigsuad,
“Na haa' na bu' ou pandi kebenaardn peidn Guruadn igisuru' meleyhat na nelamat diaadn tidi kuasa raja Herodes duma' nentaadn na kingein lama Yuhudi.”
12 Inubu' si Petrus turus ipanu kindi bali i Miria,
indu' ny Yohanes.
Si Yohanes nti hai bitangan lama i Markus.
Dia mbarabm lama nigpompodn atakng nguduaa.
13 Ma' kiara libudn kerai di bali na,
ngaardn nya si Roda.
Si Petrus inuntug pintu' ruar ma' si Roda ingua' ikiliid osi lama di ruar.
14 Pegtondu' nya deroodn i Petrus,
sia ingindangin sampai nda' muha' pintu' tei' simuak melik imoro' lama si Petrus gusag kuii' ruar noo.
15 Uubm siga lama na,
“Mingi aha.”
Tei' sia nda' ingahudn.
Uubm siga lama na,
“Bengkali ina meleyhat pegipat i Petrus.”
16 Tei' si Petrus kahal pa inuntug pintu'.
Waktu siga lama na imuha' pintu',
siga lama na eyradn ikiliid nya.
17 Si Petrus inirdikng ma' pii' na supaya ga siga lama na nda' mboros.
Inubu' sia ingatur di siga lama na pungga' buat Guruadn ipelepas deirdn na tidi soig giil.
Uubm nya,
“Perai nyu na onu ga bas ndedi nti di ny Yakobus ma' lama leidn pisiaa.”
Inubu' sia limuas tidia ipanu kindi bunua leidn.
18 Sikng suub rigiodu sojar ngijaga dia igundas.
Nentaadn na siga lama na nigkikimuat deirdn nda,
“Onu bas ndedi di i Petrus?”
19 Raja Herodes igisuru' ingirubm i Petrus,
tei' nda' ntomu.
Sia ikimuat suhu sojar dia nubu' siga lama na peti.
Pegpunga ina,
bu' raja Herodes ipanu tidi bunua Yudia kindi bandar Keseria ma' metak meleid dia.
Raja Herodes Meti
20 Raja Herodes baar-baar ndoot ati di lama bandar Tirus ma' Sidun.
Siga lama na nentaadn na nigsupahat ingua' timomu nya.
Pegpunga ina,
siga lama na ingupadn lama pengerapadn raja miniaa' deirdn nda,
ngaardn nya si Belastus.
Inubu' siga lama na ikibori aman pasal bunua nda nda' ngkaap ngkoon bakng nda' tidi kuasa raja Herodes.
21 Pegompot odu ginenggi na,
raja Herodes igpemahi pihaadn raja.
Inubu' miupug di libuat gupugadn raja sembela' nya nigsuad di suhu lama dia.
22 Waktu nya kahal pa susuad,
siga lama na imeragu'.
Uubm,
“Nti na deroodn Itala,
leidn ga deroodn munusia'.”
23 Waktu ina hai meleyhat Guruadn ingeladu raja Herodes pasal sia nda' ngurmat Itala.
Sia inohodn giuk inubu' meti.
24 Mbarabm lama kimpandi kentangan birta tidi Itala ma' kimonop na tuni lama pisiaa di Yesus.
25 Pegpunga i Barnabas ma' Saul ingatad buntuadn di bandar Yurusalam,
siga lama na minili' kindi bandar Antiokia ma' igiit ny Yohanes bitangan lama i Markus.