Si Pilatus Ikimuat Yesus
23
1 Siga lama na nentaadn na miusag di mekama igiit Yesus kindi tingguangan i Pilatus.
2 Dia na siga lama na inentabm nya.
Uubm siga lama na,
“Ihi kuturupa' lama nti nesat rayat.
Sia nda' giu' biaar wakng kupala di raja Rum,
ma' sia hai moro' sia na Raja piniit Itala.”
3 Nubu' si Pilatus ikimuat Yesus,
“Berhai aha na raja lama Yuhudi?”
Yesus miabat,
“Berhai singgurua tigoodn nu.”
4 Nubu' si Pilatus nigsusuad di kupala lama pegogot ugama ma' barabm lama dia.
Uubm nya,
“Ndou ketomu sala' di lama nti,
ma' simbatu pudn nggien nguhubm nya.”
5 Tei' siga lama na lobi pa ga' ngiriat.
Uubm siga lama na,
“Tidi ajaardn nya sia na nupahat barabm lama tidi bunua Yudia lemoon pirinta.
Bu'-bu' di bunua Gililia ikompot na kati' bunua Yudia.”
Si Herodos Ikimuat Yesus
6 Pegdoor i Pilatus ina,
sia ikimuat siga lama na.
Uubm nya,
“Lama nti lama Gililia?”
7 Pegpandi nya Yesus tidi bunua nggien i Herodos mirinta,
sia ipiit Yesus kindi i Herodos.
Waktu ina si Herodos pudn kiara di Yurusalam.
8 Sia senang guakng baar-baar ikiliid Yesus,
pasal meleid na sia ikidoor kentangan Yesus ma' mingin kiliid Yesus mbuat mbisa.
9 Ina na,
sia mbarabm kimuatadn di Yesus,
tei' Yesus nda' miabat ma' simbatu pudn,
10 walaupudn kupala lama pegogot ugama ma' sigu ugama kahal ngiriat nentabm nya.
11 Si Herodos ma' askar nya igubu igesab Yesus ma' ingejampa nya.
Inubu' ipepahi nya pimihaadn raja ma' ipupuli' nya melik kindi i Pilatus.
12 Waktu odu ina hai si Herodos ma' i Pilatus mulei igpangan,
walaupudn na bu' bas nigbunu'.
Yesus Diabu' Uhuman Mati
13 Si Pilatus inimung kupala lama pegogot ugama,
kupala lama Yuhudi,
ma' rayat na.
14 Nubu' sia igsuad di siga lama na.
Uubm nya,
“Uhu nggiit lama nti kindi diaadn.
Poro' nyu,
lama nti nggiit rayat lemoon pirinta.
Bas ku na miriksa' nya,
tei' ndou ketomu sala' nya singgurua bas tientabm nyu di nya.
15 Ina hai pihiardn i Herodos,
pasal sia bas na ipiit Yesus malik kinditi.
Lama nti nda' bas nigbuat sala' sampai maap ngedabu' uhuman mati.
16 Pasal ina,
set ku ga ngedabu' uhubm ngelapas nubu' ou mpelepas nya.”
17 Tiap-tiap toudn Ari Raya' Paska si Pilatus mpelepas simbatu lama tidi soig giil.
18 Nentaadn na lama nigpompodn dia imeragu'.
Uubm siga lama na,
“Pitiaa' na sia!
Pelepasa' na si Berabas adi dihi!”
19 Si Berabas pisuak di giil pasal limoon pirinta di bandar na ma' imati lama.
20 Si Pilatus mingin mpelepas Yesus.
Ina na,
sia igsuad di barabm lama dia malik,
21 tei' siga lama na imeragu',
“Siliba' na sia!”
22 Kali ketolu na si Pilatus susuad di siga lama na.
Uubm nya,
“Onu sala' lama nti?
Ndou ketomu sala' nya sampai maap ngedabu' uhuman mati,
set ku ga gisuru' askar ku ngelapas nya.
Inubu' ou mpelepas nya.”
23 Siga lama na turus imeragu' suru' nalib Yesus.
Di na kimpusadn siga lama na menang.
24 Nubu' si Pilatus miniaa' kendahadn siga lama na ngedabu' uhuman mati di Yesus.
25 Ma' sia ipelepas lama kiniberi siga lama na.
Ina na lama bas pininjara' pasal limoon pirinta ma' imati lama.
Nubu' sia igisuru' askar nya mmati Yesus,
miniaa' onu ga kendahadn lama Yuhudi.
Yesus Sialib
26 Askar na igiit Yesus limuas tidi istana' na.
Atakng siga lama na ipanu,
siga lama na igtomu ma' lama tidi bunua Kirena,
ngaardn nya Simun.
Sia ngundakng na sumuak kindi bandar na,
tei' askar na maksa' nya imihul salib Yesus ma' sia suru' sumuut tidi kimidiadn.
27 Mbarabm lama simuut Yesus,
libudn lahi na.
Na kilibuan temeis igongi-ongi,
28 tei' Yesus inginonong siga lama na,
sembela' nya nigsusuad.
Uubm nya,
“Suhu dihu kilibuan di Yurusalam,
dei uhu tangis diaadn!
Tangis uhu na adi deirdn nyu ma' siga anak nyu!
29 Pasal kiara pa waktu lama susuad sikng nti,
‘Senang suhu libudn nda' pa bas kianak ma' nda' pa bas mpudu' peranak!’
30 Waktu kesensaraadn ina,
lama mingin mburumbuan buig,
supaya mati burumbuan.
31 Bakng siga lama na mmati diaadn,
onu pasi buatadn siga lama na di dihu?
Pasal ou na nti sikng kiou merata' ma' uhu sikng riu.”
32 Kiara hai dua lama ndoot igbiaa' sialib ma' Yesus.
33 Pegdatakng siga lama na di bunua ngaardn na “Tuhurukng Ulu,”
askar na inalib Yesus ma' na dua lama ndoot na.
Simbatu di sembela' kuaan nya ma' simbatu pa di sembela' gibakng nya.
34 Nubu' Yesus inguduaa.
Uubm nya,
“Ama',
umpuna' na siga lama na pasal siga lama na nda' kerati onu binibuat nda!”
Askar na igbagi pimihaadn Yesus nggien igundi' esi ga menang.
35 Lama dia miusag ikiliid nentaadn na.
Waktu ina hai kupala lama Yuhudi igesab Yesus.
Uubm siga lama na,
“Sia bas na nelamat lama leidn.
Bakng sia baar-baar Raja piniit Itala,
sia mistii' nelamat deirdn na tidi kiou salib na.”
36 Askar na ingua' ipinum nya beig anggur,
sembela' siga lama na igesab Yesus.
37 Uubm siga lama na,
“Bakng aha na raja lama Yuhudi,
penelamat na deirdn nu!”
38 Di libuat salib Yesus kiara sinuart,
“Nti na raja lama Yuhudi.”
39 Simbatu lama ndoot sialib dia ingejampa Yesus.
Uubm nya,
“Bakng aha na Raja ginenggi Itala,
duu gisi na haa' na nelamat deirdn nu ma' dihi!”
40 Tei' lama ndoot simbatu na ingerarakng ibal na.
Uubm nya,
“Man pa' ndaha molok Itala?
Kiti nentaadn na dibuadn uhuman mati.
41 Uhuman ta ngam egat ma' sala' ta,
tei' lama nti ndara sala'.”
42 Nubu' sia nigsusuad di Yesus.
Uubm nya,
“Intomo' ou waktu nu medadi raja!”
43 Yesus nigsusuad di lama na.
Uubm nya,
“Ou moro' di diha odu nti hai aha sama-sama ma' diaadn di suruga'.”
Kipitiaadn Yesus
44 Kira-kira sampak tengodu,
mata odu limintuabm ma' bunua timuang nentaadn na sampai puhul tiga gibiidn.
45 Waktu ina tabir di soig bali migia nggien simbiaakng ibereit dua.
46 Inubu' Yesus imeragu'.
Uubm nya,
“Ama',
nua' na mogot nyawa hu!”
Punga ina nyawa nya irupus.
47 Kupala askar na ikiliid onu ndedi.
Sia mantug Itala.
Uubm nya,
“Lama nti mpia baar-baar!”
48 Lama iginompodn dia ikiliid kai onu bas ndedi.
Siga lama na minili',
sembela' ngelabad kuub nda pasal nonsol deirdn nda.
49 Kiara hai mbarabm lama ketondu' Yesus,
simuak na libudn miniaa' nya tidi bunua Gililia.
Siga lama na miusag tidi modu' ikiliid onu ndedi.
Yesus Liobokng
50-51 Kiara lama ngaardn nya si Yusup tidi bandar Erimetia di bunua Yudia.
Sia lama mpia ma' nggait Raja ginenggi Itala mirinta.
Walaupudn sia tidi mekama migia,
sia nda' ngahudn padu siga lama na mmati Yesus.
52 Sia ingua' timomu i Pilatus kibori banggi Yesus.
53 Nubu' si Yusup ipudua' banggi Yesus tidi libuat kiou salib na ma' ipukumut nya ma' kasa'.
Pegpunga ina,
inipa' di lobokng binuat tidi batu nda' pa bas piahi.
54 Odu ina odu ari lima,
mingad na ari onom nggien lama simbiaakng.
55 Suhu kilibuan bas miniaa' Yesus tidi Gililia na sumuut ny Yusup ingua' ikiliid pungga' buat banggi Yesus pinilakng di soig lobokng na.
56 Punga na ina siga lama na minili' ingua' inidia' amut nggien ngamut banggi Yesus.
Pegsikng suub,
odu ari onom,
siga lama na beranti kerai miaa' adat lama Yuhudi.