Yesus Biag Melik
24
1 Waktu ari minggu' kahal pa sarap,
kilibuan na kindi lobokng igiit amut sinidia' siga lama na.
2 Pegdatakng di lobokng na,
siga lama na ikiliid batu na lulubid na tidi bobo' lobokng na.
3 Inubu' siga lama na simuak di soig lobokng na,
tei' nda' ketomu banggi Yesus dia.
4 Atakng siga lama na igpihir ma' kibunggakng baar-baar,
toho-toho na dua tuni lama gusag mingad di sodi siga lama na.
Pimihaadn dua tuni na mputi' sikng upak.
5 Kilibuan na igegolok ma' igotud-otud sampai ngkadak tana'.
Inubu' lama dua tuni na igsusuad.
Uubm lama dua tuni na,
“Man rati uhu ngirubm Yesus?
Sia biag na melik!
6 Sia ndaardn na hati'.
Sia biniag melik!
Intomo' nyu onu bas sinisuad nya di dihu waktu nya kahal di Gililia!
7 Poro' nya,
sia na piniit Itala nuan lama ngedahap.
Nubu' mori di lama ndoot ma' nuan nalib,
tei' pegodu ngintolu biag malik.”
8 Nubu' kilibuan na ikintabm malik onu bas sinisuad Yesus.
9 Peguli' siga lama na tidi lobokng na,
siga lama na imoro' di lama pegbiaa' Yesus,
pulu' esa' tuni na,
ma' di lama leidn hai onu bas ndedi.
10 Ngaardn kilibuan na si Miria tidi bunua Megdelena,
si Yehana,
ma' si Miria indu' ny Yakobus.
Ma' kiara hai libudn leidn ibal siga lama na.
11 Tei' tadn na lama pegbiaa' Yesus,
pulu' esa' tuni na,
kilibuan na susuad kibilu ma' siga lama na nda' pisiaa kilibuan na.
12 Nubu' si Petrus miusag limompud kindi lobokng na.
Dia na sia limohut nggien kiliid kindi soig na.
Sia kiliid tetak kumut kasa' ga dia.
Nubu' sia minili',
sembela' nya igpihir onu ndedi.
Lama Ipanu Kindi Bunua Emaus
13 Odu ina hai kiara dua tuni lama pegbiaa' Yesus ngintana' kindi bunua Emaus kira-kira turu' batu tidi Yurusalam.
14 Siga lama na ipanu,
sembela' igsusuad kentangan onu bas ndedi.
15 Atakng siga lama na igkikimuat,
Yesus simoik siga lama na ma' igbiaa' na ipanu.
16 Siga lama na ikiliid Yesus,
tei' nda' iketondu' nya sikng pinilipat na.
17 Nubu' Yesus ikimuat di siga lama na.
Uubm nya,
“Onu sinisuad nyu kina?”
Pegdoor susuad nya,
siga lama na beranti ipanu ma' susa guakng.
18 Simbatu lama ngaardn nya si Kelopos igsusuad di Yesus.
Uubm nya,
“Man ga bila' na,
tuadn?
Aha mien di Yurusalam,
tei' aha deirdn nu nda' pandi onu ndedi baru-baru nti?”
19 Yesus miabat.
Uubm nya,
“Onu ga bila' ndedi na?”
Uubm siga lama na,
“Yesus nabi tidi Nejarat.
Susuad ma' kerai nya kikuasa.
Ina na mukti' sia piniit Itala.
Nentaadn na lama pandi nya mpia.
20 Kupala lama pegogot ugama ma' kupala lama bangsa mi bas na imori nya di i Pilatus,
supaya dubuadn uhuman mati ma' silibidn.
21 Ihi bas na ngarap nya bu' mpelepas bangsa Israil tidi pirinta Rum,
tei' odu nti odu ngintolu tidi odu kipitiaadn nya.
22 Ina hai kilibuan tidi paan mi ingondog dihi ma' birta na.
Siga lama na simarap na kina rigiodu kindi lobokng nya,
23 tei' nda' ketomu banggi Yesus dia.
Siga lama na miatakng ingua' imoro' di dihi ikiliid meleyhat mirta Yesus biag malik.
24 Kiara hai sebagi lama tidi paan mi kindi lobokng na ma' iketomu singgurua onu bas sinisuad kilibuan na,
tei' siga lama na nda' kiliid Yesus.”
25 Nubu' Yesus nigsusuad di siga lama na.
Uubm nya,
“Landu' na bobu nyu ma' landu' na leid nyu pisiaa susuad nabi.
26 Raja ginenggi Itala na mistii' musuat kesensaraadn gulu,
inubu' sia ngkaap mupug di sembela' kuaan Ama' na.”
27 Nubu' Yesus mperati siga lama na onu bas sinuart nabi Musa ma' nabi leidn di soig Kitab kentangan deirdn na.
28 Mingad na siga lama na kompot di bunua nggien siga lama na ngonong,
Yesus pegbalu' mpanu,
29 tei' siga lama na imogokng nya.
Uubm siga lama na,
“Dei na lombus pasal bunua mingad na robi!”
Ina na,
Yesus pudn miapit dia.
30 Waktu siga lama na miupug iginohodn,
Yesus ingai ruti ma' inguduaa imigakng ruti na.
Nubu' bineri di siga lama na.
31 Turus na siga lama na iketondu' nya,
tei' Yesus nigliap tidi tenga'-tenga' siga lama na.
32 Siga lama na nigsuad,
“Pata' senang guakng ta waktu nya perati dihita susuad tidi soig Kitab di tenga' daidn kina.”
33 Robi ina hai siga lama na turus na pibelik kindi Yurusalam.
Dia na siga lama na nigtomu ma' lama pegbiaa' Yesus pulu' esa' tuni na iginompodn ma' lama leidn.
34 Pegdatakng siga lama na dia,
turus na lama pegbiaa' Yesus igsusuad,
“Asal baar-baar Yesus biag malik.
Sia bas na ipiliid deirdn na di Simun.”
35 Nubu' lama pegbiaa' Yesus dua tuni na pasi imoro' di siga lama na onu bas ndedi di tenga' daidn ma' pungga' ga' siga lama na iketondu' nya waktu imigakng ruti na.
Yesus Ipiliid Deirdn Na Di Lama Pegbiaa' Nya
36 Kahal pa siga lama na igsusuad,
toho-toho na Yesus gusag di tenga'-tenga' siga lama na ma' igsuad.
Uubm nya,
“Itala merahat dihu.”
37 Siga lama na ikondog ma' igegolok.
Tadn na siga lama na ikiliid punggua',
38 tei' Yesus igsuad di siga lama na.
Uubm nya,
“Dei uhu kondog!
Man rati pa' uhu nda' pisiaa ou na Yesus?
39 Kida' nyu gulu ma' tiliha' nyu na pii' ma' uai hu,
pasal bakng punggua' ndara onsi tei' ou kiara.”
40 Waktu ina sia pitilik pii' ma' uai na.
41 Siga lama na kahal pa nda' pisiaa ga' kibunggakng ma' landu' na senang guakng.
Ina na,
Yesus kimuat di siga lama na.
Uubm nya,
“Man ga bila' uhu kati' na kingkoon?”
42 Siga lama na imori nya senggotop louk tiunu.
43 Yesus ingai louk na,
inubu' miohodn di tingguangan siga lama na.
44 Punga ina sia igsuad di siga lama na.
Uubm nya,
“Nti na pirihara' bas pioro' ku di dihu waktu hu kahal gimung ma' dihu.
Nentaadn na kentangan diaadn sinuart nabi Musa,
ma' nabi leidn,
ma' di soig Kitab Masmur ndedi na.”
45 Nubu' Yesus imuha' pihiardn siga lama na supaya siga lama na kerati onu rati di soig Kitab.
46 Punga na ina sia igsuad di siga lama na.
Uubm nya,
“Kiara sinuart di soig Kitab,
Raja ginenggi Itala asal nuan nensara' ma' pitiaadn,
tei' pegodu ngintolu biag malik.
47 Ma' ina hai lama mistii' pompot birta kentangan nya di nentaadn na bangsa mulei tidi Yurusalam,
supaya bakng siga lama na timiligud tidi dusa nda Itala kaap ngampudn dusa siga lama na.
48 “Perai nyu di nentaadn na bangsa onu ga bas ndedi.
49 Ou deirdn ku mpiit di dihu onu ga bas ginenggi ny Ama',
tei' uhu mistii' nggait di bandar nti sampai Itala mpudua' kuasa nya adi dihu.”
Yesus Inanggat Kindi Suruga'
50 Punga ina Yesus igiit siga lama na limuas tidi bandar.
Mingad na Baitani sia ipusag pii' na,
sembela' nya imerahat siga lama na.
51 Waktu ina sia inetak siga lama na ma' sia inanggat kindi suruga'.
52 Siga lama na igotud-otud simbiaakng di nya.
Nubu' pibelik melik kindi Yurusalam,
sembela' siga lama na senang guakng.
53 Siga lama na meseirt na nguduaa ma' mantug Itala di bali migia nggien simbiaakng na.