Lama Ngirubm Ahal Mmati Yesus
22
1 Mingad na Ari Raya' Ruti Ndara Ragi',
bitangan lama Ari Raya' Paska,
2 kiara kupala lama pegogot ugama ma' sigu ugama ngirubm ahal nggien mmati Yesus,
tei' nda' ketogu' pasal molok barabm lama.
Si Yudas Ngahudn Nguduraha' Yesus
3 Pungaan ina,
kupala kuakng simuak di ny Yudas Iskeriut,
lama pegbiaa' Yesus tidi pulu' dua tuni na.
4 Nubu' si Yudas ingua' kupala lama pepogot ugama ma' lama pegipat bali migia nggien simbiaakng nggiit gupahat pungga' buat ga' kaap ngedahap Yesus.
5 Siga lama na senang guakng baar-baar ma' ngigenggi mori biaar di nya.
6 Ina na,
si Yudas pudn ingahudn ma' ingirubm daidn nggien ngedahap Yesus waktu ndara kuberaman lama dia.
Yesus Igisuru' Nidia' Ngkoon Ari Raya' Paska
7 Miatakng na odu Ari Raya' Ruti Ndara Ragi' igbiaa' ma' Ari Raya' Paska nggien nimbali ma' mohodn kambikng biri'-biri'.
8 Yesus ipiit i Petrus ma' ny Yohanes.
Uubm nya,
“Kaadn uhu na dii,
ngua' nidia' koon Ari Raya' Paska adi dihiti!”
9 Uubm siga lama na,
“Nggien mi nidia' ngkoon ti?”
10 Yesus miabat.
Uubm nya,
“Pegdatakng nyu di bandar Yurusalam,
uhu megtomu ma' lama nggiit kibut suga' beig.
Uhu simuut nya muli'.
11 Pegdatakng nyu di bali na,
perai nyu di lama sengompu' bali na ou gisuru' dihu kimuat bilik nggien ti megramai ngginohodn Ari Raya' Paska.
12 “Lama sengompu' bali na ninggulu' dihu bilik suhup gia di tingkat dua.
Dia sisidia' na ma' gehoon.
Nua' nyu na nidia' nentaadn na dia adi dihiti!”
13 Siga lama na pudn ipanu.
Pegdatakng di bandar na,
siga lama na igtomu ma' lama singgurua bas sinisuad Yesus na.
Nubu' siga lama na nidia' ngkoon keramaian na dia.
Genggi Baru Binuat Yesus
14 Kompot na waktu iginohodn ramai Paska,
Yesus miupug ma' lama pegbiaa' nya,
pulu' dua tuni na.
15 Inubu' sia igsusuad di siga lama na.
Uubm nya,
“Ou mingin baar-baar gimung ginohodn ramai Paska nti duma' dihu,
ndou pa pitiaadn.
16 Ou moro' di dihu ndou miaa' ngginohodn malik Ari Raya' Paska nti sampai ou pebalik mirinta ma' Itala.
Nubu' kiti ngginohodn malik.”
17 Punga na ina Yesus inganggat gelas suga' beig anggur,
sembela' nya nguduaa.
Inubu' sia igsusuad,
“Ngia' nyu na nti!
Pinginum uhu na tidi gelas nti!
18 Ou moro' di dihu mulei tidi na haa' na ndou nginum beig anggur nti malik sampai ou pebalik mirinta ma' Itala.”
19 Pegpunga ina,
sia ingai ruti pasi,
sembela' nya nguduaa.
Nubu' sia imigakng ruti na ma' imori di siga lama na,
sembela' nya igsusuad.
Uubm nya,
“Nti na sikng tuni hu adi dihu.
Buata' nyu na nti nggien nyu nggintabm diaadn!”
20 Ina hai pegpunga miohodn,
sia imori gelas na di siga lama na,
sembela' nya igsusuad.
Uubm nya,
“Gelas beig anggur nti singgurua raa' hu ibusus adi dihu.
Ina na genggi baru tidi Itala.
21 “Tei' kiara lama mingin nguduraha' diaadn.
Sia kiara igimung iginohodn ma' dihiti kati'.
22 Ou na nti piniit Itala asal pitiaadn singgurua bas na tiotog Itala tidi bu' hai.
Tei' pata' gia uhuman lama nguduraha' diaadn na.”
23 Nubu' siga lama na igkikimuat deirdn nda,
“Esi ga lama mbuat oo' nga rua?”
Igtangkar Esi Lobi Milibuat Panggat
24 Lama pegbiaa' Yesus igtangkar esi lobi milibuat panggat tidi siga ibal na.
25 Nubu' Yesus igsusuad di siga lama na.
Uubm nya,
“Raja ma' lama kikuasa di dunya' mantug deirdn nda mpia,
26 tei' nduhu kaap mbuat oo' nga rua.
Leidn ga ina sei,
suhu dihu kipanggat mistii' mpisidukng deirdn nyu singgurua lama ndara panggat.
Ma' lama medadi kutua' mistii' mpedadi deirdn nda sikng dipadn.
27 Esi gisi lobi milibuat panggat,
lama mupug mohodn di mija' na ma' lama mmohodn nya?
Asal lama mupug na kipanggat.
Tei' ou di tenga'-tenga' nyu na haa' na singgurua lama ngkerai adi dihu.
28 “Waktu hu kininam,
uhu meseirt na miaa' diaadn.
29 Si Ama' bas na mori diaadn kuasa nggien mirinta.
Ina hai ou mori dihu kuasa nggien nyu mirinta.
30 Waktu hu medadi raja,
uhu nggimung ngginohodn ma' diaadn di mija' ku.
Ma' uhu biriadn kuasa mirinta pulu' dua bangsa lama Israil.”
Yesus Moro' I Petrus Milia Nya
31 Uubm Yesus,
“Simun,
kupala kuakng pilepas supaya ngua' nginam dihu nggien pibiakng lama pisiaa ma' lama nda' singgurua libudn naap padi miang apa ma' onsi.
32 Tei' bas ku na nguduaa adi diha supaya kipisiaadn nu kemosog.
Waktu nu pebalik malik di diaadn,
aha mistii' ngosog kipisiaadn siga ibal nu.”
33 Si Petrus miabat.
Uubm nya,
“Guruadn,
sidia' ou sumuak pinjara' ma' mati duma' diha.”
34 Uubm Yesus,
“Petrus,
ou moro' diha robi tina nda' pa manuk ninggiriak,
ketolu aha milia diaadn.”
35 Inubu' Yesus kimuat siga lama na.
Uubm nya,
“Waktu hu ipiit dihu,
ou nda' kigiu' dihu nggiit pitaha',
bik,
atau pudn kasut.
Kiara kukurangan nyu?”
Uubm siga lama na,
“Ndara ma' simbatu pudn.”
36 Uubm Yesus,
“Tei' na haa' na esi kiara pitaha' atau pudn bik,
sia mistii' nggiit.
Ma' esi ga lama ndara badi',
sia mistii' peboli baju' na nggien moli badi'.
37 Kiara sinuart di soig Kitab,
‘Sia dekapadn ma' pitiaadn singgurua lama ndoot.’
Ou moro' di dihu nda' na meleid ina medadi di diaadn.”
38 Uubm lama pegbiaa' nya,
“Guruadn,
kida' gulu kati' kiara dua mbobok badi'.”
Yesus miabat.
Uubm nya,
“Ina suhup na.”
Yesus Ingua' Inguduaa Di Buig Jaitun
39 Yesus ma' lama pegbiaa' nya miuhad tidi bandar na kindi Buig Jaitun.
Ina na kubasadn nya.
40 Pegdatakng dia,
sia nigsusuad di siga lama na.
Uubm nya,
“Punguduaa uhu na,
supaya nduhu kinaman!”
41 Punga ina sia kimodu' toyuk tidia kira-kira mompot muntal ma' batu.
42 Nubu' sia igotud-otud ma' inguduaa.
Uubm nya,
“Ama',
bakng maap nua' na ngodu' kesensaraadn nti tidi diaadn,
tei' dei biaa' kendahadn ku,
biaa' na kendahadn nu.”
43 Nubu' kiara meleyhat miatakng ingua' ingosog nya.
44 Pasal kesensaraadn nya lobi pa ga' nya nguduaa sampai umus nya motok di tana' singgurua raa'.
45 Pungaan Yesus nguduaa,
sia pibelik kindi lama pegbiaa' nya.
Sia ikiliid siga lama na ikodop na pasal siga lama na lupugudn ma' susa guakng.
46 Inubu' sia igsusuad di siga lama na.
Uubm nya,
“Dei uhu odop!
Udukng uhu na ma' punguduaa uhu na,
supaya nduhu kinaman.”
Yesus Diahap
47 Kahal pa Yesus igsusuad miatakng na barabm lama iniit ny Yudas lama pegbiaa' nya tidi pulu' dua tuni na.
Si Yudas turus ingua' ingadak Yesus.
48 Tei' Yesus igsusuad di nya,
“Yudas,
aha ngadak diaadn,
ina na tanda' aha mingin nguduraha' diaadn.”
49 Waktu lama pegbiaa' nya ikiliid onu ndedi,
siga lama na igsuad,
“Guruadn,
bakng oo' nga rua,
biardn na ihi lemoon mahi badi'!”
50 Nubu' kiara lama simbatu dia ingilimpiakng tilinga kuaan dipadn kupala ugama na.
51 Tei' Yesus igsuad.
Uubm nya,
“Sedakng na!”
Nubu' sia ipekemaa' tilinga lama na.
52 Punga ina Yesus igsuad di kupala lama pegogot ugama,
ma' kupala lama pegipat bali simbiangan,
duma' kutua' lama Yuhudi miatakng dia ingua' ingedahap nya.
Uubm nya,
“Man rati uhu nggiit badi' ma' bongol nggien nyu ngedahap diaadn singgurua hu lama ndoot?
53 Odu-odu ou ngira' dihu di bali migia nggien simbiaakng,
tei' nduhu ngedahap diaadn.
Nti na masa nyu mmati diaadn,
pasal masa kuakng mirinta.”
Si Petrus Imilia Yesus
54 Siga lama na ingedahap Yesus ma' igiit nya kindi bali kupala lama pegogot ugama.
Si Petrus simuut tidi kimidiadn.
55 Di tenga'-tenga' laman na kiara api dinihit.
Si Petrus miniaa' lama dia miupug ingua' ngindarakng di sodi api na.
56 Kiara libudn kuli' dia ikiliid i Petrus miupug di sodi api na.
Sia inondu' i Petrus,
sembela' nya igsusuad,
“Lama nti ibal Yesus.”
57 Tei' si Petrus imilia.
Uubm nya,
“Ou baar-baar nda' ketondu' lama na,
dakng.”
58 Nda' ga keleid kiara lama leidn ikiliid i Petrus ma' nigsuad.
Uubm nya,
“Aha na lama ibal Yesus!”
Tei' si Petrus miabat.
Uubm nya,
“Nda'!
Leidn ga ou!”
59 Kira-kira simbatu jaabm kiara lama leidn igsuad.
Uubm nya,
“Asal sia na lama pegbiaa' Yesus pasal sia pudn lama tidi bunua Gililia.”
60 Tei' uubm i Petrus,
“Onu tigoodn nu?
Baar-baar ndou kerati!”
Kahal pa si Petrus igsuad,
manuk ininggiriak.
61 Yesus ingilingu i Petrus.
Nubu' si Petrus ikintabm onu bas sinisuad Yesus di nya.
Poro' nya,
“Nda' pa manuk ninggiriak mati' odu,
ketolu aha moro' nda' ketondu' diaadn.”
62 Inubu' si Petrus limuas tidia,
sembela' nya temeis igsidak-sidak.
Yesus Inanu Igesab Ma' Ingeladu
63 Lama tuhakng ngejaga Yesus igesab ma' ingeladu nya.
64 Siga lama na ingelobod mata nya ma' ikimuat.
Uubm siga lama na,
“Duu nohod!
Esi ingeladu diha?”
65 Ma' barabm pa susuad siga lama na ngejampa nya.
Yesus Sinuwal Di Mekama
66 Kahal pa sarap Yesus iniit kindi mekama nggien kutua' lama Yuhudi,
kupala lama pegogot ugama,
ma' sigu ugama iginompodn dia.
67 Siga lama na ikimuat,
“Berhai aha na Raja ginenggi Itala?”
Yesus miabat,
“Bakng ou moro' dihu,
uhu asal nda' pisiaa.
68 Ma' bakng ou balas kimuat dihu,
asal uhu nda' moro'.
69 Ou na nti piniit Itala ma' tidi na haa' na ou mupug di sembela' kuaan nya.
Sia na kikuasa.”
70 Nentaadn na siga lama na igsusuad,
“Aha na Anak Itala?”
Yesus miabat,
“Berhai singgurua tigoodn nyu.”
71 Siga lama na igsusuad,
“Ndihiti na ngirubm bukti' leidn,
pasal bas ti na ikidoor onu sinisuad nya.”