Sudaha Nipuud
21
1 Yesus kiliid lama kaya nudaha siidn nda di soig bahu' di bali migia nggien simbiaakng.
2 Sia ikiliid kai libudn nipuud miskidn mpusuak dua nggiab siidn tembaga'.
3 Uubm Yesus,
“Kida' nyu gulu libudn nipuud nti!
Ou moro' di dihu libudn nti bas na nudaha lobi migia tidi nentaadn na lama leidn.
4 Barabm lama nudaha siidn nda kahal pa opod,
tei' libudn nti nudaha nentaadn na ndaardn na opod di deirdn na.”
Bali Simbiangan Nuan Ngurumbak
5 Kiara lama susuad kentangan bali migia nggien simbiaakng.
Uubm siga lama na,
“Pata' ayad bali simbiangan nti binuat tidi batu ma' piriasadn bineri di Itala!”
Inubu' Yesus miabat siga lama na.
Uubm nya,
6 “Nentaadn na inidadn nyu nti nuan ngurumbak ma' simbatu pudn ndara metak.”
Susuad Kentangan Kususaadn
7 Siga lama na ikimuat Yesus.
Uubm siga lama na,
“Sigu,
mipa' bali simbiangan nuan ngurumbak?
Ma' onu tanda' di puguluadn nggien lama kempandi mingad na medadi?”
8 Yesus susuad di siga lama na.
Uubm nya,
“Undaa'-undaa' nyu!
Dei uhu mitipu pasal barabm lama matakng mahi ngaardn ku ma' moro' deirdn nda sida na Kiristus ma' odu nya ikompot na.
Dei uhu biaa' siga lama na!
9 Dei uhu kolok kidoor birta perakng ma' kususaadn pirinta.
Ina asal medadi nggulu,
tei' leidn ga ina rati dunya' mingad na kiamat.”
10 Yesus inambukng malik susuad nya.
Uubm nya,
“Kiara hai mbarabm bangsa di dunya' nti megloon ma' bangsa leidn.
Ma' kiara hai pirinta megloon ma' pirinta leidn.
11 Ma' kiara hai dunya' nggisik di mbimbi ga bunua.
Leidn na musuat udap migia.
Ma' kiara hai leidn musuat lumu migia.
Di na kimidiadn kiara kususaadn migia ma' tanda' di langit nggien lama gegolok.
12 “Tei' nda' pa nentaadn na medadi,
uhu dekapadn ma' nuan nensara'.
Uhu kai utudn kindi bali simbiangan nggien nuwal dihu ma' mpusuak dihu di soig pinjara'.
Punga na ina siga lama na nggiit dihu malik kindi tingguangan raja ma' kupala pirinta pasal uhu miaa' diaadn.
13 Ina na piluakng nyu mirta birta mpia di siga lama na.
14 Dei uhu pihir pungga' ga' nyu ngedawa waktu nyu musuat uhubm!
15 Pasal ou na mori dihu kipindiaadn susuad sampai ma' simbatu pudn musu nyu nda' ngkeloon susuad nyu.
16 Uhu kusulaadn indu'-ama' nyu,
pusud nyu,
waris nyu,
ma' barabm pangan nyu.
Sebagi tidi dihu pitiaadn siga lama na.
17 Barabm lama musulaadn dihu,
pasal uhu miaa' diaadn.
18 Walaupudn oo' nga rua,
tei' ma' simbatakng pudn obuk di ulu nyu nda' meteirdn.
19 Bakng uhu taadn ma' sabar,
uhu kaap kibiagadn seleid-leid na.”
Yesus Susuad Bandar Yurusalam Nuan Ngurumbak
20 “Bakng uhu kiliid Yurusalam ubungun musu,
dia na nggien nyu kempandi bandar na nda' na meleid mbinasa.
21 Waktu ina lama mien di bunua Yudia mistii' merari kindi mbimbi ga bunua kiara buig.
Lama di soig bandar na mistii' netak bandar na ma' lama di luar bandar na nda' kaap sumuak di soig bandar na.
22 Pasal waktu ina Itala ngedabu' uhuman nya,
singgurua bas na kiara sinuart di soig Kitab.
23 Migia ngasi loobm libudn ntogi' waktu ina.
Susa gien merari.
Ina na hai libudn peganak.
Migia kususaadn bunua nti ma' Itala ngedabu' uhuman di bangsa ti.
24 Sebagi na lama pitiaadn,
sebagi na dekapadn utudn kindi bunua leidn.
Ma' kiara hai bangsa leidn minasa bandar Yurusalam sampai suhup na masa bangsa na mirinta.”
Sia Piniit Itala Matakng Malik
25 “Di na kimidiadn mata odu,
buaidn,
ma' bituudn medadi tanda' di langit.
Mbarabm lama di dunya' kemeloukng ma' molok kidoor tiorub kourd tidi loud.
26 Munusia' molok baar-baar sampai demoot kerasa,
atakng siga lama na nggait onu medadi di dunya' nti,
pasal kuasa di langit nda' temotog.
27 Ou na nti piniit Itala.
Waktu hu matakng,
migia kuasa ma' panggat ku tidi Itala.
Ou miaa' di toi landas midadn munusia'.
28 Waktu nyu kerasa kususaadn na,
sidia' uhu na pasal nda' na meleid ou matakng nelamat dihu.”
Susuad Ndalabm Kentangan Tultu' Nggoig-oig
29 Yesus nigsuad di lama pegbiaa' nya.
Uubm nya,
“Kida' nyu puudn tultu' ma' kiou leidn!
30 Bakng uhu kiliid tultu' na nggoig-oig,
uhu pandi mingad na musibm karu.
31 Ina hai mipa'-mipa' nyu kiliid kususaadn migia na,
uhu kempandi mingad na ou pebalik malik ma' mirinta.
32 “Ou moro' di dihu nentaadn na ina medadi kahal pa lama biag na haa' na.
33 Langit ma' dunya' nti mpuda' pa sikng salakng,
tei' susuad ku nti nda' mpuda' sampai seleid-leid na.”
Kiti Mistii' Sidia'
34 “Undaa'-undaa' nyu!
Dei uhu pengondi' masa nyu megramai sei ma' nginum medoot ngkelu!
Ma' dei uhu pegpihir kibiagadn nyu sampai uhu nda' na kisidia' odu nggien ku matakng.
35 Pasal odu ina lama di dunya' nti medesadn ku singgurua di soig singgulub.
36 Pegingat-ingat uhu na!
Ma' punguduaa uhu na,
supaya uhu ketaadn nentaadn na kususaadn duma' nduhu molok megtingguakng ma' diaadn.”