Kimuatadn Tangga Yesus Kaap Kuasa
20
1 Odu leidn Yesus ngira' lama ma' mpompot birta mpia tidi Itala di bali migia nggien simbiaakng.
Dia na kiara kupala lama pegogot ugama,
ma' sigu ugama,
ma' kutua' lama Yuhudi ingua' ikimuat nya.
2 Uubm siga lama na,
“Perai di dihi tangga nu ikaap kuasa nggien mbuat oo' nga rua ma' esi mori diha kuasa na?”
3 Yesus miabat,
“Ou pudn kimuat di dihu.
Duu nyu moro' di diaadn
4 tangga gisi ny Yohanes ikaap kuasa mmonsu' lama tidi Itala atau pudn tidi munusia'?”
5 Nubu' siga lama na mpihir.
Uubm siga lama na,
“Onu nuan ti mabat di nya?
Bakng kiti moro' tidi Itala,
bangkali sia kimuat dihiti man rati kiti nda' pisiaa di ny Yohanes?
6 Tei' bakng kiti moro' tidi munusia',
nentaadn na lama kati' muntal dihiti ma' batu pasal siga lama na pisiaa si Yohanes nabi.”
7 Inubu' siga lama na imoro' di Yesus,
“Ndihi pandi tangga nya ikaap kuasa na.”
8 Uubm Yesus,
“Ou pudn nda' moro' di dihu esi mori diaadn kuasa mbuat oo' nga rua.”
Susuad Ndalabm Lama Nggipat Kabudn Anggur
9 Yesus ngira' lama dia susuad ndalabm.
Uubm nya,
“Kiara lama sengompu' kabudn anggur pinipat di lama leidn.
Punga na ina sia ipanu kindi bunua leidn,
tei' meleid pa sia pebalik.
10 Pegbua' anggur na,
lama sengompu' kabudn na ipiit dipadn nya ingua' mengai bigiadn adi deirdn na tidi lama pegipat kabudn na.
Tei' siga lama na ingeladu dipadn na ma' inunsub nya minili' ndaardn na iniit.
11 Nubu' lama sengompu' kabudn na ipiit dipadn na leidn,
tei' lama pegipat kabudn na ingeladu dipadn na ma' ingelou nya.
Suru' minili' lumbi pii'.
12 Inubu' lama sengompu' kabudn na ipiit dipadn nya ngintolu,
tei' dipadn na pudn liadu hai siga lama na ma' inendi' kindi luar kabudn na.
13 “Di na kimpusadn lama sengompu' kabudn na susuad di soig guakng na,
‘Pungga' ga' hu mbuat?
Ndaardn na leidn isuru' hu,
seleidn tangga di anak kisiangan ku.
Bangkali siga lama na kemengaan ny eli'.’
14 “Pegliid lama pegipat kabudn na anak lama sengompu' kabudn na miatakng,
siga lama na susuad deirdn nda,
‘Sia na anak lama sengompu' tana' nti.
Gaabm kiti mmati nya,
supaya maap ti ngerampas tana' nti.’
15 “Inubu' siga lama na ingondi' nya di luar kabudn na ma' imati nya.”
Yesus kimuat lama dia.
Uubm nya,
“Onu pasi buatadn lama sengompu' kabudn anggur na di lama pegipat tana' na?
16 Sia asal kindia ngua' mmati lama igipat kabudn nya na ma' ingai kabudn na mpipat di lama leidn.”
Pegdoor siga lama na susuad Yesus na,
uubm siga lama na,
“Ihi ngarap pirihara' ina nda' medadi.”
17 Yesus inginonong siga lama na ma' ikimuat,
“Bakng oo' nga rua,
onu rati gisi di soig Kitab?
‘Kiara batu nda' pihaadn lama mbuat bali batu pasal tadn na siga lama na ndara guna.
Tei' siga lama na nda' pandi batu na palikng ayad ma' kiara guna.’
18 “Esi-esi ga lama medabu' di batu na,
sia mansur.
Tei' bakng lama mudubuadn batu na,
mpiak medadi abu.”
19 Waktu ina sigu ugama ma' kupala lama pegogot ugama ngundakng na ngedahap Yesus pasal siga lama na kerati susuad ndalabm nya kentangan deirdn nda.
Tei' siga lama na molok barabm lama dia.
Kimuatadn Kentangan Wakng Kupala
20 Ina na,
sigu ugama ma' kupala lama pegogot ugama inuap lama nggien gisuru' masukng Yesus.
Siga lama na ngirubm piluakng ngedahap nya ma' nggiit kindi kutua' pirinta bunua na.
21 Punga na ina lama sinuap na ingua' ikimuat Yesus.
Uubm siga lama na,
“Sigu,
ihi pandi diha ngira' baar.
Ndaha padul panggat lama misidukng atau pudn milibuat.
Aha ngira' baar kendahadn Itala di munusia'.
22 Bakng miaa' utuardn undakng-undakng ugama ti,
kiti ngkaap biaar wakng kupala di raja di bunua Rum ma' nda'?”
23 Tei' Yesus pandi ahal siga lama na.
Ina na,
sia nigsuad.
Uubm nya,
24 “Duu nyu pitilik siidn pirak na singgiab di diaadn!
Esi gisi gambar ma' ngaardn ina?”
Uubm siga lama na,
“Raja Rum.”
25 Uubm Yesus,
“Bakng oo' nga rua,
biara' nyu na di raja Rum onu ga sia sengompu',
ma' biara' nyu hai di Itala onu ga sia sengompu'!”
26 Siga lama na nda' ikaap imasukng Yesus di kuberaman lama dia ma' ikibunggakng susuad nya sampai nda' ikabat.
Kimuatadn Pungga' Rua Lama Mati Biag Malik
27 Kiara lama tidi paan Suduki ingua' ikimuat Yesus.
Siga lama na nda' pisiaa lama mati biag malik di suruga'.
Uubm siga lama na,
28 “Sigu,
ringa' bu' nabi Musa bas na inuart undakng-undakng nti adi dihiti:
‘Bakng kiara lama kisaa,
na saa lahi mati,
tei' ndara anak,
mistii' na pusud ngesaa ma' ipag nya,
supaya ngkaap anak adi pusud nya meti na.’
29 “Kiara lama turu' senga pusud lahi.
Na kaha' na kisaa,
tei' meti ndara pa anak.
30 Nubu' na pusud ngindua igesaa ma' ipag na,
tei' sia pudn meti hai ndara pa anak.
31 Pegpati nya,
na pusud ngintolu na pasi igesaa ma' ipag na.
Sia pudn meti hai sampai ma' tuntukng adi pudn meti ndara anak.
32 Di na kimpusadn na libudn na pudn meti na hai.
33 Esi gisi medadi saa libudn na odu dunya' kiamat ma' odu Itala miag lama mati malik nentaadn na?
Pasal na turu'-turu' na bas saa nya sei.”
34 Yesus miabat,
“Leid biag di dunya' libudn lahi na nggesaa,
35 tei' waktu Itala miag lama malik di suruga' siga lama na nda' na nggesaa.
36 Siga lama na sikng meleyhat di suruga' nda' pandi mati.
Ma' medadi anak Itala,
pasal biniag Itala malik.
37 Di soig buk sinuart nabi Musa,
sia moro' lama mati biag malik.
Waktu api miabag di puudn kiou na,
nabi Musa imoro' Itala,
ina na Itala nuan ny Abraham,
ny Isak,
ma' ny Yakub simbiaakng.
38 Ina rati na,
sia na Itala lama biag,
leidn ga Itala lama mati.
Pasal bakng di Itala,
nentaadn na lama mati biag malik.”
39 Kiara hai sigu ugama dia mabat.
Uubm siga lama na,
“Sigu,
ayad baar-baar tigoodn nu.”
40 Pasal susuad Yesus,
siga lama na nda' na ketogu' kimuat nya malik.
Yesus Ikimuat Kentangan Raja Ginenggi Itala
41 Yesus kimuat di lama dia.
Uubm nya,
“Man rati uhu moro' Raja ginenggi Itala na kuturunan n Daud
42 sedakng pudn si Daud bas na susuad di soig Kitab Masmur:
‘Itala igsuad di Raja ginenggi nya.
Uubm nya,
“Upug na di sembela' kuaan ku
43 sampai ou ngala musu nu ma' ngelou siga lama na di tingguangan nu.” ’
44 “Pasal leidn ga Raja ginenggi Itala kuturunan n Daud sei,
pa' si Daud deirdn na bas na inoog nya Itala.”
Yesus Pukunda' Lama Kentangan Sigu Ugama
45 Kahal pa lama kidongor susuad Yesus na,
sia igsusuad di lama pegbiaa' nya.
46 Uubm nya,
“Undaa'-undaa' nyu pisiaa di sigu ugama!
Siga lama na mingin mpanu ma' pimihaadn ayad,
supaya barabm lama kemengaan.
Ma' siga lama na mili' gipugadn lama migia di bali simbiangan na atau pudn di ramai.
47 Siga lama na ngulujubm mohodn umus libudn nipuud.
Ma' siga lama na hai sidikng nguduaa meleid.
Tei' Itala ngedabu' uhuman lobi megat di siga lama na.”