Yesus Duma' N Jikius
19
1 Waktu Yesus lemalu miaa' di bandar Yiriku,
2 dia kiara lama kaya,
ngaardn nya si Jikius.
Sia kutua' lama pegpungut wakng kupala.
3 Sia mingin kiliid esi Yesus,
tei' nda' kaap kiliid pasal barabm lama ma' sia mpuhu'.
4 Ina na,
sia limompud ingua' ingindahad kiou supaya kaap kiliid Yesus lemalu.
5 Pegompot Yesus di puudn kiou na,
sia ninggeda' n Jikius di libuat na ma' susuad di nya,
“Aha peidn Jikius.
Pugundas na dumua' pasal odu nti ou nyumpakng di bali nu.”
6 Si Jikius pudn igundas dimua' ma' inirima Yesus duma' senang guakng.
7 Nentaadn na lama dia ikiliid ma' igilimut.
Uubm siga lama na,
“Lama noo modop di bali lama kidusa.”
8 Tei' si Jikius miusag ma' igsuad di Yesus.
Uubm nya,
“Guruadn,
ou magi setenga' arta' ku ma' nudaha di lama miskidn.
Nubu' ou biaar siidn lama bas tinipu ku paat kali lipat.”
9 Yesus igsuad di nya,
“Na haa' na Itala nelamat diha ma' nentaadn na waris nu.
Aha kai kuturunan ny Abraham.
10 Ou na piniit Itala ma' matakng ngirubm duma' nelamat lama kidusa.”
Susuad Ndalabm Kentangan Siidn Emas
11 Kahal lama kidoor susuad nya,
Yesus igsuad ndalabm di siga lama na pasal sia mingad na kompot di Yurusalam ma' siga lama na mpihir Itala nda' na meleid mpusag pirinta na di dunya' nti.
12 Uubm Yesus,
“Kiara lama kuturunan raja kindi bunua modu' nggien nya lintihidn medadi raja.
Pegpunga ina,
sia muli' malik.
13 Tei' nda' pa sia ipanu,
sia inoog pulu' dipadn nya.
Nubu' sia imori singgiab siidn emas simbatu lama.
Uubm nya,
‘Nua' nyu na begbedagakng siidn nti waktu ku dii!’
14 “Tei' rayat nya medetadn nya ma' ipiit lama pompot biidn nda.
Uubm siga lama na,
‘Ihi nda' mingin nya medadi raja mi.’
15 “Tei' sia pudn nedi kai raja ma' pebelik melik kindi bunua nya.
Nubu' sia imiidn dipadn bas biniriadn nya siidn supaya sia kempandi pida untukng siidn inaap siga lama na.
16 “Dipadn buu' na miatakng igsuad,
‘Tuadn,
siidn inaap ku pulu' giab tidi singgiab bas bineri nu.’
17 “Uubm raja na,
‘Ayad kerai nu!
Pasal aha pandi ngejaga pirihara' toyuk,
ou mori diha kuasa mirinta pulu' bandar.’
18 “Dipadn ngindua na miatakng igsuad,
‘Tuadn,
siidn inaap ku lima nggiab tidi singgiab bas bineri nu.’
19 “Uubm raja na,
‘Aha biriadn ku kuasa mirinta lima bandar.’
20 “Inubu' dipadn leidn na miatakng igsuad,
‘Tuadn,
naa,
nti na siidn nu.
Piusut ku ma' tulungas!
21 Ou molok diha pasal susa ngkerai di diha.
Aha mengai medoot leidn ga aha sengompu' ma' aha pandi mengai asil leidn ga tinaman nu.’
22 “Uubm raja na di nya,
‘Aha dipadn ndoot.
Bakng oo' nga rua susuad nu,
ou nguhubm diha.
Pandi aha kai susa ngkerai di diaadn.
Ou mengai medoot leidn ga ou sengompu' ma' mengai asil leidn ga tinaman ku.
23 Man rati ndaha naru' siidn ku di bing supaya ou kaap nirima siidn ku ma' bunga na waktu ku muli'?’
24 “Punga ina raja na igsuad di lama dia.
Uubm nya,
‘Ngia' nyu na siidn na tidi nya!
Biria' nyu di dipadn kiara pulu' giab siidn na!’
25 “Uubm siga lama na di raja na,
‘Tuadn,
sia kiaardn na pulu' giab siidn.’
26 “Raja na miabat.
Uubm nya,
‘Ou moro' di dihu esi-esi ga kiaardn na untukng,
sia biriadn pa lobi mbarabm,
tei' esi-esi ga ndara untukng,
inien tidi nya walaupudn toyuk.
27 Na haa' na uta' nyu na kinditi lama musulaadn diaadn nda' mingin diaadn medadi raja nda.
Pitiaa' nyu siga lama na di tingguangan ku!’ ”
Yesus Simuak Yurusalam
28 Punga Yesus susuad,
sia ipanu ingonong kindi Yurusalam.
29 Pegompot Yesus di Buig Jaitun,
sia mingad na bandar Baitpagi ma' bandar Baitani.
Dia na sia ipiit lama pegbiaa' nya dua tuni nggulu.
30 Uubm nya,
“Panu uhu na kindi bunua kuii' tingguangan ti noo.
Pegsuak nyu dia,
uhu kiliid anak keledai sisigat nda' pa bas inanu lama miudadn.
Iada' nyu na keledai na ma' uta' nyu kinditi.
31 Bakng kiara lama kimuat dihu,
‘Man rati uhu ngiad keledai na,’
perai nyu Itala mingin mahi nya.”
32 Lama pegbiaa' nya dua tuni na pudn ipanu.
Pegdatakng siga lama na dia,
siga lama na iketomu onu ga bas pioro' Yesus.
33 Atakng siga lama na ngiad,
lama sengompu' keledai na ikimuat,
“Man rati keledai noo pa' iniad nyu?”
34 Uubm siga lama na,
“Itala mingin mahi nya.”
35 Nubu' siga lama na igiit keledai na kindi Yesus ma' ingelapik arag keledai na ma' kumut.
Nubu' peselehei Yesus.
36 Atakng Yesus mudadn keledai na,
barabm lama ingelad baju' ma' kumut nda di tenga' daidn na.
37 Pegingad Yesus di Yurusalam,
sia ikompot di simpiangan daidn Buig Jaitun.
Dia na mbarabm lama pegbiaa' nya mulei mantug Itala.
Ai na boros siga lama na pasal bas na ikiliid kuasa nya.
38 Uubm siga lama na,
“Sia na Raja kiberahat piniit Itala!
Itala baar-baar mingisiadn dihiti!
Mpia baar-baar Itala di suruga'!”
39 Nubu' barabm lama Pirisi dia igsuad di Yesus.
Uubm siga lama na,
“Sigu,
surua' na lama pegbiaa' nu beranti mboros.”
40 Yesus miabat.
Uubm nya,
“Ou moro' di dihu bakng siga lama na nda' mboros,
batu nti pasi meragu'.”
Yesus Mingisiadn Lama Di Yurusalam
41 Waktu Yesus kimingad Yurusalam,
sia ikiliid bandar na ma' temeis mingisiadn siga lama na.
42 Uubm nya,
“Toyuk baar senang bakng uhu kerati kiara aman odu nti.
Tei' na haa' na nduhu pa kaap kiliid.
43 Kiara pa odu leidn musu nyu matakng ngua' ngabukng dihu supaya nduhu ngkelepas.
44 Ma' siga lama na pudn minasa dihu nentaadn na di soig bandar nti.
Ndara batu metak ma' simbatu pudn pasal uhu nda' pandi waktu Itala bas na miatakng nelamat dihu.”
Yesus Simuak Di Soig Bali Migia Nggien Simbiaakng
45 Yesus simuak di soig bali migia nggien simbiaakng na ma' inunsub lama bedagakng medoot dia.
46 Uubm nya,
“Kiara susuad di soig Kitab,
‘Bali ku gien nguduaa.’
“Tei' uhu bas na nuhar bali nti nggien nyu nipu lama.”