Susuad Ndalabm Kentangan Nipuud Ma' Ahibm
18
1 Punga ina Yesus igsusuad ndalabm di lama pegbiaa' nya supaya siga lama na nda' kaya' nguduaa ma' nda' beranti pisiaa.
2 Uubm nya,
“Kiara simbatu ahibm mien di bandar.
Sia nda' molok Itala ma' nda' puduli' lama.
3 Ma' kiara hai nipuud mien di bandar dia.
Sia meseirt na ngua' kituud ahibm na.
Uubm nya,
‘Nua' ou na temampu tidi musu ku.’
4 “Meleid na ahibm na nda' mingin temolukng nya,
tei' di na kimidiadn sia igpihir di soig guakng na,
‘Walaupudn ndou molok Itala ma' ndou mingisiadn lama,
5 ou mistii' nuud nya supaya sia nda' na nusa diaadn malik.
Bakng nda',
sia kahal meseirt na ngua' nusa diaadn.’ ”
6 Uubm Yesus,
“Pikidoor uhu na onu ga bas sinisuad ahibm ndoot na!
7 Pungga' ga' Itala nda' temampu lama pegbiaa' nya,
bakng odu-robi na kitampu nya?
8 Pisiaa uhu na,
Itala tanggas temampu siga lama na.
Ou na nti piniit Itala.
Waktu hu pebalik malik kinditi,
tau bakng kiara pa barabm lama pisiaa di diaadn di dunya' nti.”
Susuad Ndalabm Lama Pirisi Ma' Lama Pegpungut Wakng Kupala
9 Yesus susuad ndalabm di lama mpihir deirdn nda mpia,
tei' musulaadn lama leidn.
10 Uubm nya,
“Kiara dua tuni lama ngua' nguduaa di bali migia nggien simbiaakng.
Simbatu na lama Pirisi ma' simbatu na lama pegpungut wakng kupala.
11 “Lama Pirisi na miusag deirdn na,
sembela' nya nguduaa.
Uubm nya,
‘Ou mantug diha pasal ndou sikng lama leidn,
pengelaba',
pinipu,
nggimung modop ma' libudn.
Ma' ndou sikng lama pegpungut wakng kupala nti.
12 Ou megpuasa kudua siminggu' ma' ou mori di diha simbatu tidi pulu' nentaadn na pendepatadn ku.’
13 “Tei' lama pegpungut wakng kupala na miusag tidi modu' ma' nda' ketogu' ninggeda' langit,
sembela' nya ngelabad kuub nya.
Uubm nya,
‘Itala,
nua' ou na mingisiadn.
Ou na nti lama kidusa.’ ”
14 Uubm Yesus di lama na,
“Ou moro' di dihu waktu siga lama na minili',
leidn ga duaa lama Pirisi na tinirima,
tei' duaa lama pegpungut wakng kupala na tinirima Itala.
Pasal esi ga lama pilibuat deirdn na,
sia nuan pisidukng.
Ma' esi ga lama pisidukng deirdn na,
sia nuan pilibuat.”
Yesus Merahat Peranak
15 Kiara mbarabm lama igiit siga anak na ingua' Yesus supaya sia neronggodn ma' merahat siga lama na.
Pegliid lama pegbiaa' nya,
siga lama na ingerangit lama igiit siga anak na kindia,
16 tei' Yesus inoog siga peranak na.
Uubm nya di lama pegbiaa' nya,
“Biardn na siga peranak na kinditi.
Dei uhu pengerarakng pasal lama singgurua ina na kaap medadi anak Itala.
17 Intomo' nyu esi-esi ga nda' miaa' pirinta Itala singgurua peranak na,
sia nda' kaap kesenangan tidi Itala.”
Susuad Kentangan Lama Kaya
18 Kiara simbatu lama Yuhudi kipanggat kimuat Yesus.
Uubm nya,
“Sigu,
aha mpia.
Pungga' ga' ku ngkaap kibiagadn seleid-leid na?”
19 Yesus miabat,
“Man rati aha moro' diaadn mpia?
Ndara lama simbatu pudn mpia,
bakng nda' Itala.
20 Aha pandi pirinta Itala.
Dei na pigimung modop ma' lama bakng nda' saa nu!
Dei na pemati lama!
Dei na penahu!
Ma' dei na pigitoot!
Nua' na kemengaan indu'-ama' nu!”
21 Lama na miabat.
Uubm nya,
“Ringa' hu bu' igkenahadn sampai ma' na haa' na bas ku na miniaa' pirinta ina.”
22 Pegdoor Yesus susuad ina,
sia miabat.
Uubm nya,
“Kiara pa simbatu aal lipatadn nu.
Nua' na peboli nentaadn na arta' nu,
ma' siidn nu na biria' na di lama miskidn.
Nubu' aha ngkaap untukng di suruga'.
Punga ina biaa' na diaadn!”
23 Pegdoor lama na susuad Yesus,
sia susa guakng pasal sia kaya baar-baar.
24 Yesus pandi lama na susa guakng.
Ina na,
sia susuad,
“Susa baar-baar adi lama kaya miaa' kendahadn Itala.
25 Lobi pa susa adi lama kaya miaa' pirinta Itala tidi unta' sumuak gogu' jarubm.”
26 Lama ikidoor susuad Yesus na ikimuat,
“Bakng oo' nga rua,
esi gisi nuan nelamat?”
27 Yesus miabat,
“Ndara lama kaap nelamat deirdn na,
bakng nda' Itala nelamat.”
28 Inubu' si Petrus igsuad di nya,
“Kida' gulu ihi bas na inumang bali mi nggien miaa' diha.”
29 Uubm Yesus,
“Ina berhai.
Ou moro' di dihu esi-esi ga numang bali ma' anak saa nda,
ma' indu'-ama' nda,
atau pudn pusud nda ga' ngkerai adi Itala,
30 lama na biriadn Itala lobi pa migia untukng di dunya' nti ma' biriadn kibiagadn seleid-leid na.”
Yesus Igsuad Melik Kipitiaadn Nya
31 Yesus igiit lama pegbiaa' nya,
pulu' dua tuni na,
kimodu' tidi barabm lama.
Nubu' sia nigsusuad.
Uubm nya,
“Pikidoor uhu susuad ku,
na haa' na kiti ngonong Yurusalam.
Nentaadn na susuad bas sinuart nabi kentangan diaadn asal medadi waktu ti di Yurusalam.
32 Dia na ou nuan mori di lama bangsa leidn.
Siga lama na nggesab diaadn ma' ngejampa diaadn,
sembela' ngilab diaadn.
33 Siga lama na nensara' diaadn ma' ngelapas diaadn.
Punga na ina nubu' mmati diaadn,
tei' pegodu kutuluadn ou biag malik.”
34 Lama pegbiaa' Yesus nda' kerati ma' toyuk pudn onu ga sinisuad nya.
Sikng tiutup na pihiardn siga lama na supaya nda' kerati susuad nya.
Yesus Pekemaa' Lama Buta
35 Waktu Yesus mingad na di bandar Yiriku,
dia kiara lama buta miupug di sodi daidn nggien kibori sudaha.
36 Pegdoor nya barabm lama limalu,
sia ikimuat,
“Man rati pa' mbarabm boros lama?”
37 Siga lama na miabat nya,
“Yesus tidi bandar Nejarat miatakng.”
38 Nubu' sia meragu' ma' inoog.
Uubm nya,
“Yesus,
anak raja Daud,
nua' ou na mingisiadn!”
39 Barabm lama di puguluadn na inagur nya.
Nda' giu' nya mboros,
tei' liomun na sia inoog.
Uubm nya,
“Anak raja Daud,
nua' ou na mingisiadn!”
40 Inubu' Yesus beranti ma' igisuru' lama igiit lama buta na kindi deirdn na.
Pegompot lama buta na,
Yesus ikimuat nya,
41 “Onu kibiriidn nu di diaadn?”
Lama buta na miabat,
“Guruadn,
ou mingin supaya ou kaap kiliid!”
42 Nubu' Yesus igsuad,
“Pasal aha pisiaa di diaadn,
kemaa' aha na.”
43 Pegsuad Yesus,
turus na sia ikiliid ma' miniaa' Yesus,
sembela' nya mantug Itala.
Pegliid barabm lama dia,
siga lama na pudn miniaa' mantug Itala.