Kentangan Mbuat Dusa
17
1 Uubm Yesus di lama pegbiaa' nya,
“Asal tetap na kiara lama nggiit lama leidn mbuat dusa.
Landu' na doot lama mbuat oo' nga rua.
2 Lobi ayad pa sia sigatadn batu migia di gorokng nya,
nubu' gindidn di loud tidi sia mbuat lama leidn nda' pisiaa di diaadn.
3 Undaa'-undaa' nyu!
Dei uhu pigiit lama leidn mbuat dusa!
“Bakng pusud nyu di soig Itala mbuat dusa,
nua' na nagur.
Bakng sia kiampudn,
nua' na ngampudn.
4 Bakng sia kisala' di diha turu' kali singolu ma' ngua' kibori maap di diha,
umpuna' na sia!”
Kentangan Kipisiaadn
5 Uubm lama pegbiaa' Yesus,
“Yesus,
nua' na ngosog kipisiaadn mi!”
6 Uubm Yesus,
“Bakng uhu kiara kipisiaadn sigia linsag sesawi,
uhu kaap susuad di puudn nunuk nti,
‘Pigindur na di loud!’
Kiou na pudn miaa' susuad nyu.”
Pekerojodn Dipadn
7 Uubm Yesus,
“Supama na,
bakng kiara dipadn kerai di perook tohi nya atau pudn ngintatakng kambikng biri'-biri',
peguli' nya tidi perook na,
leidn ga tohi na nggisuru' nya nggulu na mohodn.
8 Anggur sei,
sia suru' nya sikng nti,
‘Nua' na nidia' ngkoon ku ma' pemahi na pimihaadn birisi!
Nua' ou na ngintatakng sampai ou punga na mohodn,
nubu' aha mohodn.’
9 “Dipadn na nda' paya buntugudn pasal sia miaa' pirinta tohi na.
10 Oo' nga rua hai uhu.
Pungaan nyu miaa' pirinta beri di dihu,
uhu susuad sikng nti,
‘Dei uhu pemantug dihi,
ihi set ga dipadn miaa' pirinta.’ ”
Yesus Pekemaa' Pulu' Tuni Lama Kiladu Kusta
11 Waktu Yesus ingonong Yurusalam,
sia limalu simpadadn bunua Samaria ma' Gililia.
12 Ngundakng na sia sumuak di bunua na,
miatakng na pulu' tuni lama kiladu kusta timomu nya.
Siga lama na miusag tidi modu',
13 sembela' siga lama na meragu' inoog,
“Yesus,
nua' ihi na mingisiadn!”
14 Pegliid Yesus siga lama na,
sia igsusuad.
Uubm nya,
“Kaadn uhu na di lama pegogot ugama!
Surua' nyu na siga lama na miriksa' tuni nyu!”
Kahal pa di tenga' daidn lama kikusta na kimaa' na.
15 Kiara simbatu lama tidi siga lama na pebelik kindi Yesus.
Sia baar-baar mantug Itala,
16 sembela' nya igotud-otud di tingguangan Yesus ma' megsuhur di nya.
Sia lama Samaria.
17 Uubm Yesus,
“Koo ga na,
pulu' tuni hina pinekemaa' nggien na siabm tuni na?
18 Man rati lama bangsa leidn nti ga pebelik mantug Itala?”
19 Nubu' Yesus igsusuad di lama na.
Uubm nya,
“Usag na!
Panu na!
Ladu nu kimaa' na ma' Itala nelamat diha,
pasal aha pisiaa di diaadn.”
Waktu Itala Mpusag Pirinta Na
20 Kiara lama Pirisi ikimuat Yesus mipa' Itala mpusag pirinta na.
Uubm Yesus,
“Pirinta Itala nda' toho-toho na midadn lama.
21 Pirinta nya di soig guakng lama.
Ina na,
ndara lama kaap susuad kati' pirinta Itala atau pudn kuii' pirinta Itala.”
22 Inubu' Yesus igsuad di lama pegbiaa' nya.
Uubm nya,
“Ou na nti piniit Itala.
Di na kimidiadn kiara odu uhu ngarap diaadn pebalik malik kinditi,
tei' nduhu na kaap kiliid.
23 Bakng kiara lama moro' di dihu ou matakng na diti atau pudn dii,
dei uhu luas ngirubm diaadn.
24 Waktu ku pebalik kinditi,
ina singgurua minyait di langit nelak dunya' nentaadn na tidi puudn sampai tuntukng dunya'.
25 Tei' ou mistii' nuan gulu nensara' ma' nda' tirimoon lama na haa' na.
26-27 “Ringa' bu' waktu i Nua kahal biag,
lama dia ngginohodn,
nginum,
ma' nggesaa sampai na odu i Nua simuak di soig ajukng na.
Nubu' miatakng na liud migia ingelomos lama nentaadn na.
Ina hai rua waktu hu pebalik malik kinditi.
28 “Ina hai ringa' bu' waktu i Loot kahal biag,
lama dia ngginohodn,
nginum,
bedagakng,
ntinaman,
ma' mbuat bali.
29 Tei' waktu odu i Loot miuhad tidi bandar Sodom,
dimua' na baar api tidi langit nutukng lama nentaadn na dia.
30 Ina hai rua waktu hu pebalik malik kinditi ma' ou midadn lama.
31 “Waktu odu ina lama payakng-ayakng di kahi lima nda' kaap sumuak ngamas medoot na.
Ina hai lama ngkerai di perook nda' kaap muli' kindi bali na.
32 Pigintabm uhu na onu ndedi di saa i Loot!
33 “Esi-esi ga lama miaa' kendahadn na deirdn na,
sia nda' kaap kibiagadn seleid-leid na.
Tei' esi-esi ga lama miaa' kendahadn Itala,
sia kaap kibiagadn seleid-leid na.
34 “Ou moro' di dihu waktu hu pebalik malik kiara dua lama kodop di gilangan,
simbatu utudn ma' simbatu tetahadn.
35 Ma' kiara hai dua libudn atakng lemobok gandubm,
simbatu utudn ma' simbatu tetahadn.
36 Ma' kiara pa dua lahi atakng ngkerai di perook,
simbatu utudn ma' simbatu tetahadn.”
37 Nubu' lama pegbiaa' Yesus kimuat nya.
Uubm siga lama na,
“Guruadn,
nggien ina medadi?”
Yesus miabat.
Uubm nya,
“Mbimbi ga kiara banggi medoot,
dia na nggien beli' ginompodn.”