Yesus Kininam Kupala Kuakng
4
1 Yesus kimosog ga' Midua Itala ma' iniit nya tidi Sungi Yardan kindi tenga'-tenga' bunua epaat pulu' rubian.
2 Dia na sia kininam kupala kuakng.
Leid Yesus dia sia nda' bas miohodn.
Ina na,
sia pudn kerasa na deirdn na mudapadn.
3 Kupala kuakng nigsuad di nya.
Uubm kupala kuakng na,
“Pasal aha Anak Itala,
nua' na batu nti pedadi ruti!”
4 Uubm Yesus,
“Kiara sinuart di soig Kitab,
‘Munusia' leidn ga biag ga' koon ga.’ ”
5 Pegpunga ina,
kupala kuakng igiit Yesus kindi limpak buig landu' na libuat.
Nda' ketorop mata sia ipitilik Yesus nentaadn na bunua ayad ma' kekayaadn di dunya' nti.
6 Uubm kupala kuakng di Yesus,
“Nentaadn na nti ou sengompu',
pasal bineri na di diaadn.
Ou kiara kuasa mori di esi-esi ga lama kingein ku.
7 Nentaadn na nti biriidn ku di diha,
bakng aha nggotud-otud simbiaakng di diaadn.”
8 Yesus miabat.
Uubm nya,
“Kiara sinuart di soig Kitab,
‘Gaabm aha simbiaakng di Itala Raja nu ma' miaa' kendahadn nya sei.’ ”
9 Nubu' kupala kuakng igiit Yesus melik kindi tempak libungan bali migia nggien simbiaakng di Yurusalam na.
Uubm nya di Yesus,
“Pasal aha Anak Itala,
tupa na tiditi!
10 Kiara sinuart di soig Kitab:
12 Yesus miabat.
Uubm nya,
“Kiara sinuart di soig Kitab,
‘Dei pinginam Itala Raja nu!’ ”
13 Pegpunga kupala kuakng inginam Yesus,
sia miuhad igait piluakng odu leidn.
Yesus Mulei Ngira' Lama Di Bunua Gililia
14 Yesus pibelik kindi bunua Gililia.
Sia kimosog ga' Midua Itala ma' birta kentangan nya ikompot di nentaadn na bunua na.
15 Sia ngira' susuad tidi Itala di barabm bali simbiangan di bunua Gililia ma' nentaadn na lama mantug nya.
Yesus Siunsub Tidi Bandar Nejarat
16 Punga na ina Yesus pibelik kindi bandar Nejarat nggien nya nigkenahadn.
Asal kubasadn nya,
odu lama Yuhudi simbiaakng,
sia kindi bali simbiangan.
Inubu' sia miusag di tingguangan siga lama na nggien nya masa Kitab.
17 Sia biniriadn Kitab sinuart nabi Yesaya ringa' bu'.
Nubu' sia ingedahar gulungan Kitab na ma' iketomu suad na.
Inubu' sia imasa:
18 “Midua Itala kiara di soig guakng ku.
Sia ipusag diaadn mpompot birta mpia di lama miskidn.
Ou pudn piniit nya,
supaya ga pelepas lama tidi kususaadn ma' pekemaa' lama buta.
19 Ou na inisuru' moro' toudn nti na Itala nelamat lama.”
20 Pegpunga Yesus masa Kitab na,
sia ingugulukng ma' ipupuli' di lama pegipat Kitab.
Inubu' sia miupug.
Nentaadn na lama di soig bali simbiangan na inondu' nya.
21 Nubu' Yesus igsuad di siga lama na.
Uubm nya,
“Odu nti ndedi na susuad tidi Kitab ndengoordn nyu hina.”
22 Siga lama na kibunggakng kidoor susuad nya mpia baar-baar,
tei' sembela' siga lama na igesab nya.
Uubm siga lama na,
“Bu' sia na bila' anak Yusup.”
23 Uubm Yesus di siga lama na,
“Asal uhu susuad dalig nti di diaadn,
‘Duptur,
nua' na pekemaa' deirdn nu!
Nua' na hai mbuat bisa di bunua nu nti singgurua bas mi na kidoor diha mbuat di bandar Kepernaum!’ ”
24 Uubm Yesus di siga lama na,
“Ou moro' dihu baar kiara nabi bakng di bunua na ndara lama kemengaan nya.
25 Intomo' nyu waktu nabi Elia kiara musibm karu di bunua Israil seleid tolu ntoudn lobi sampai bunua na suat udap.
Barabm nipuud minien dia,
26 tei' Itala nda' igisuru' nabi Elia kindia.
Sia igisuru' kindi nipuud minien di bandar Serapat di bunua Sidun.
27 Ina hai waktu nabi Elias mbarabm lama Israil kiladu kusta,
tei' ma' simbatu pudn nda' inanu Itala ipekemaa'.
Si Naman ga tidi bunua Siria pinikimaa'.”
28 Nentaadn na lama di soig bali simbiangan na munu' nya baar-baar ikidoor susuad nya oo' nga rua.
29 Siga lama na miusag ingua' ingiriaak Yesus,
ipuluas nya tidi bandar na kindi limpak buig nggien ngedabu' nya kindi ubakng na.
30 Tei' Yesus ikelebat tidi tenga'-tenga' siga lama na ma' turus ga ipanu.
Lama Nsuahadn Kuakng
31 Punga na ina Yesus kindi bandar Kepernaum di bunua Gililia.
Odu lama Yuhudi simbiaakng sia ingira' lama di soig bali simbiangan na.
32 Siga lama na kibunggakng kidoor ajaardn nya pasal suad nya kiara kuasa.
33 Kiara lama di soig bali simbiangan na nsuahadn kuakng.
Sia imeragu' ma' imerapak Yesus.
34 Uubm nya,
“Aha peidn Yesus.
Aha na lama tidi Nejarat ngua' minasa dihi.
Ou pandi aha na piniit Itala ma' ndara dusa.”
35 Uubm Yesus,
“Dei kiboros!
Luas na tidi lama nti!”
Kuakng na igiribuk ipereba' lama na di tingguangan lama dia.
Nubu' na kuakng limuas,
tei' lama na nda' kiladu.
36 Nentaadn na lama dia kibunggakng baar-baar ma' nigsusuad deirdn nda.
Uubm siga lama na,
“Ali'!
Lama nti kiara kuasa mpuhad kuakng sampai kuakng na pudn limuas.”
37 Birta kentangan Yesus ikompot di nentaadn na bunua dia.
Yesus Pekemaa' Barabm Lama
38 Yesus miuhad tidi bali simbiangan na kindi bali Simun.
Pegdatakng nya di bali na,
siga lama na ikituud nya pekemaa' todob mentamang Simun libudn.
39 Inubu' Yesus miusag di sodi mentamang Simun ma' igisuru' todob na muhad.
Turus todob na kimaa' ma' mentamang Simun na pudn miudukng ingua' imohodn siga lama na dia.
40 Pegseronsobm na bunua,
barabm lama ingua' Yesus igiit nentaadn na lama kiladu nggien kituud nya pekemaa' ladu nda.
Yesus ineronggodn siga lama na nentaadn na dia ma' ipekemaa' ladu siga lama na.
41 Barabm kuakng na pudn limuas tidi tuni lama nsuahadn na,
sembela' kuakng na meragu',
“Aha na Anak Itala!”
Tei' Yesus nda' kigiu' kuakng na mboros,
pasal kuakng na kerati sia na Kiristus piniit Itala.
Yesus Ngira' Lama Di Soig Bali Simbiangan
42 Kahal pa rabudn rigiodu,
Yesus miuhad tidia kindi bunua ndara lama.
Inubu' barabm lama ingirubm nya.
Pegtomu siga lama na Yesus,
siga lama na nda' giu' nya muhad tidia.
43 Tei' uubm Yesus di siga lama na,
“Ou na piniit mengkati',
supaya ou ngira' lama di bunua leidn hai birta mpia nti:
na haa' na Itala muha' daidn nggien munusia' kempandi kentangan pirinta nya.”
44 Nubu' Yesus ngira' birta mpia tidi Itala di soig bali simbiangan di nentaadn na bunua Yudia.