Si Yohanes Pompot Birta Tidi Itala
3
1 Ringa' bu' kiara raja di bandar Rum,
ngaardn nya si Tibirius.
Sia ipusag i Pintius Pilatus kutua' mintiri' di bunua Yudia.
Sia hai manggat i Herodos pegogot bunua Gililia ma' pusud nya si Pilipus pegogot bunua Ituria ma' bunua Terekenitis.
Sia hai manggat i Lisinias pegogot bunua Ibilin.
Waktu ina hai si Anas ma' i Kayapas kupala pegogot ugama lama Yuhudi.
Pegpulu' lima ntoudn raja Tibirius mirinta,
2 nubu' Itala ipiit biidn di ny Yohanes anak n Jikiria di tenga'-tenga' bunua.
3 Inubu' si Yohanes kindi nentaadn na bunua mingad Sungi Yardan nggien nya mpompot birta tidi Itala.
Sia suru' lama timiligud tidi dusa nda ma' punsuudn,
supaya Itala ngampudn dusa siga lama na.
4 Ina na ndedi onu bas sinuart nabi Yesaya di soig Kitab ringa' bu',
“Kiara lama noog di tenga'-tenga' bunua.
Uubm nya,
‘Sidia' uhu na guakng nyu adi Itala,
sikng uhu ngeloos daidn adi raja nyu matakng!
5 Tiap-tiap ruakng buig nuan nimbudn ma' tiap-tiap buig nuan ngerata.
Daidn tihukng nuan nimpad ma' daidn barabm kurubakng nuan ngunda'.
6 Nubu' nentaadn na lama kiliid pungga' ga' Itala nelamat munusia'.’ ”
7 Kiara barabm lama ingua' kiponsu' ny Yohanes.
Uubm nya,
“Uhu pinipu!
Esi moro' dihu uhu selamat tidi uhuman Itala?
8 Nua' nyu piliid gulu kerai nyu ma' rua gaya nyu bakng baar-baar uhu timiligud tidi dusa nyu!
Dei pengarap deirdn nyu kuturunan ny Abraham!
Ou moro' dihu Itala kiara kuasa mbuat kuturunan ny Abraham tidi batu nti.
9 Uhu singgurua puudn kiou nda' mbua'.
Kida' nyu gulu kapak sinidia' na nggien nobokng kiou sampai kindi pahat!
Beta' ga puudn na nda' mbua' ayad nuan nobokng nubu' nutukng.”
10 Siga lama na ikimuat ny Yohanes.
Uubm siga lama na,
“Pungga' buat gisi ga' mi mbuat,
supaya Itala nda' ngedabu' uhuman di dihi?”
11 Uubm ny Yohanes,
“Esi-esi ga lama kiara dua ngerambar baju' mistii' mori singerambar di lama ndara baju'.
Ma' esi-esi ga lama kiara koon mistii' magi di lama ndara koon.”
12 Kiara hai lama pegpungut wakng kupala miatakng kiponsu' ny Yohanes.
Siga lama na ikimuat ny Yohanes,
“Pungga' buat gisi ga' mi mbuat?”
13 Uubm nya,
“Waktu nyu ngai wakng kupala na,
dei uhu kelaba'!”
14 Kiara hai askar ikimuat nya,
“Pungga' buat gisi ga' mi mbuat?”
Uubm ny Yohanes,
“Dei uhu pemaksa' ngkibori siidn tidi lama!
Ma' dei uhu kai penentabm lama ndara sala'!
Uhu mistii' puas ati ma' gagi nyu na!”
15 Barabm lama dia nigpihir.
Tadn na siga lama na,
si Yohanes Kiristus ginenggi Itala.
16 Ina na,
si Yohanes nigsuad di siga lama na.
Uubm nya,
“Ou mmonsu' dihu ma' beig,
tei' kiara pa lama matakng lobi migia kuasa nya tidi diaadn.
Ndou ketogu' dumuhu' ngiad sigat kasut nya.
Sia matakng mmonsu' dihu ma' Midua Itala ma' api.
17 Sia sidia' na ma' libu nggien miang apa ma' egas.
Egas na ipaadn di soig belatuk ma' apa na tutungun di api nda' pandi mpuda'.”
18 Ina na,
barabm nuan ny Yohanes ngira' lama dia ma' sia pudn pompot birta Itala di siga lama na.
19 Tei' si Yohanes moro' i Herodos,
kupala pirinta di bunua na,
kisala' pasal sia ingagu i Heredias,
saa pusud na,
duma' mbarabm pa kesalaadn binuat nya.
20 Ngonop pa sia mpusuak ny Yohanes di soig giil.
Yesus Pionsu'
21 Waktu ny Yohanes imonsu' lama nentaadn na dia,
Yesus pionsu' hai.
Atakng Yesus nguduaa,
toho na langit na kimbuha'
22 ma' Midua Itala dimua' kindi nya singgurua egsakng.
Inubu' sia ikidoor deroodn tidi suruga' igsuad,
“Aha na anak ku.
Ou baar-baar mingisiadn diha.
Aha mpesenang guakng ku.”
Deptar Ngaardn Apu'-odu' Yesus
23 Waktu Yesus mulei ngira' lama umur nya tolu mpulu' toudn.
Tadn lama sia na anak ny Yusup anak i Heli.
24 Si Heli anak i Matat anak Lewi,
ma' si Lewi anak i Malki anak Yenai,
ma' si Yenai anak ny Yusup anak Metetias,
25 ma' si Metetias anak ny Omos anak Nahum,
ma' si Nahum anak ny Esli anak Negai,
26 ma' si Negai anak i Maat anak Metetias,
ma' si Metetias anak Simei anak Yosok,
ma' si Yosok anak ny Yodo anak Yehanan,
27 ma' si Yehanan anak Resa anak Jerubabil,
ma' si Jerubabil anak Seltiel anak Neri,
28 ma' si Neri anak i Malki anak Adi,
ma' si Adi anak i Kosom anak Elmadam,
ma' si Elmadam anak ny Er anak Yesua,
29 ma' si Yesua anak ny Eliejar anak Yorim,
ma' si Yorim anak i Matat anak Lewi,
30 ma' si Lewi anak Simiun anak Yudia,
ma' si Yudia anak ny Yusup anak Yonom,
ma' si Yonom anak ny Eliakim anak Mela,
31 ma' si Mela anak i Mina anak Metata,
ma' si Metata anak i Natan anak Daud,
32 ma' si Daud anak ny Isai anak Obod,
ma' si Obod anak i Boas anak Salman,
ma' Salman anak i Nehasan anak Eminadab,
33 ma' si Eminadab anak ny Admin anak Arni,
ma' si Arni anak i Esran anak Peres,
ma' si Peres anak ny Yudia anak Yakub,
34 ma' si Yakub anak ny Isak anak Abraham,
ma' si Abraham anak n Tera anak Nahur,
35 ma' si Nahur anak Serub anak Rehu,
ma' si Rehu anak i Peleg anak Eber,
ma' si Eber anak Sela anak Kenan,
36 ma' si Kenan anak ny Erpaksad anak Sem,
ma' Sem anak i Nua anak Lamak,
37 ma' si Lamak anak i Metusela anak Enak,
ma' si Enak anak ny Yarad anak Meheleleil,
ma' si Meheleleil anak i Kenan anak Enos,
38 ma' si Enos anak Set anak ny Adam,
ma' si Adam biantur Itala.