Yesus Nggiit Lama Miaa' Deirdn Na
5
1 Pegodu leidn waktu Yesus gugusag di tempoordn Genesarat,
ina hai di tempoordn Gililia,
mbarabm lama nigpompodn dia mingin kidoor nya pompot birta tidi Itala.
2 Yesus ikiliid dua ngoig di sodi tempoordn nggien lama pegpuhat na dimua' masa' puhat nda.
3 Pegselehei Yesus di oig na,
sia gisuru' Simun nulak oig na kemodu' toyuk tidi biikng.
Pegpunga ina,
sia miupug di soig oig na ma' ingira' kuberaman lama di tempoordn na.
4 Punga na Yesus ingira' lama dia,
sia igsuad di Simun.
Uubm nya,
“Tulaha' oig nti kindi ndalabm!
Gaabm pa uhu ngedabu' puhat nyu nggien nyu ngedahap seda'.”
5 Uubm Simun,
“Guruadn,
kerobi ihi bas na imuhat tei' ndihi ikaap.
Pegka aha gisuru' dihi ngedabu' puhat nti,
ou nginam ga ngedabu'.”
6 Pegdabu' siga lama na puhat na,
pata' barabm seda' nsulukng sampai puhat na kebereit na.
7 Siga lama na ingelambi' siga ibal nda di singoig nggien kitabakng.
Inubu' na siga ibal ingua' timabakng sampai na dua ngoig na iponu' ma' adak metogob.
8 Pegliid Simun aal oo' nga rua,
sia igotud-otud di tingguangan Yesus,
sembela' nya nigsuad,
“Guruadn,
dei na kingad di diaadn!
Ou na nti lama kidusa.”
9 Simun nigsuad oo' nga rua,
pasal sia ma' siga ibal na kibunggakng baar-baar ikiliid barabm seda' inaap na.
10 Ina hai pangan Simun,
si Yakobus ma' pusud nya si Yohanes,
ina na anak n Jebidi.
Uubm Yesus di Simun,
“Dei kolok!
Mulei na haa' na aha muhat munusia' pasi.”
11 Pegdatakng di biikng,
siga lama na ingiriaak oig nda ma' inetak nantaadn na.
Inubu' ndedi lama pegbiaa' Yesus.
Yesus Pekemaa' Lama Kiladu Kusta
12 Pegodu leidn Yesus di bandar nggien kiara lama simbatu tuni kiladu kusta.
Pegliid nya Yesus,
sia ingua' igotud-otud di tingguangan nya ma' ingiriat nya.
Uubm lama na,
“Guruadn,
bakng aha mingin pekemaa' ladu hu nti,
nua' ou na pekemaa'!”
13 Nubu' Yesus ineronggodn lama na.
Uubm nya,
“Ou mingin pekemaa' diha.”
Turus ladu na kimaa'.
14 Yesus ngerarakng lama na.
Uubm nya,
“Dei pemoro' aal nti di lama leidn,
tei' kaadn na kindi lama pegogot ugama supaya sia ngkaap kiliid tuni nu kimaa' ma' nda'.
Nubu' aha mori idia singgurua piit biidn nabi Musa,
supaya lama pandi ladu nu kimaa' na.”
15 Tei' birta kentangan Yesus ikompot kindi bunua leidn sampai barabm lama ngua' kidoor ajaardn nya ma' ikituud pekemaa' ladu nda.
16 Tei' Yesus meseirt na kindi bunua ndara lama nggien nya nguduaa.
Yesus Pekemaa' Lama Kohod
17 Pegodu leidn atakng Yesus ngira' lama,
kiara lama tidi paan Pirisi ma' sigu ugama gugupug dia.
Siga lama na tidi bandar Yurusalam ma' tiap-tiap bunua di Gililia ma' Yudia.
Yesus kimosog ga' kuasa Itala,
supaya ngkaap mpekemaa' lama kiladu.
18 Waktu ina kiara lama miatakng inonggukng lama kohod.
Siga lama na inginam igiit nya sumuak di soig bali na nggien ngudumpal nya di tingguangan Yesus.
19 Tei' siga lama na nda' ikaap kimingad Yesus,
pasal mbarabm lama.
(Bali na kiara tuhad gien kindi libuat libungan.
Libungan na rerata.)
Ina na,
siga lama na ingahas sapu libungan toyuk gien ingulug lama kohod na kindi tingguangan Yesus di tenga'-tenga' barabm lama.
20 Pegliid Yesus siga lama na baar-baar pisiaa di nya,
uubm nya di lama kohod na,
“Dusa nu inampudn na.”
21 Pegdoor sigu ugama ma' lama Pirisi na,
siga lama na igpihir di soig guakng nda,
“Osi sia pa' berani ngampudn dusa lama?
Sia ngejampa ngaardn Itala,
pasal Itala ga ngkaap ngampudn dusa lama!”
22 Yesus pandi pihiardn siga lama na.
Uubm nya di siga lama na,
“Man rati uhu mpihir sikng ina di soig guakng nyu?
23 Onu lobi senang susuad,
‘Dusa nu inampudn,’
atau pudn ‘Udukng na ma' panu na?’
24 Ou mpiliid dihu,
ou na nti piniit Itala ma' kiara kuasa di tempak dunya' nti nggien ngampudn dusa lama.”
Inubu' Yesus igsuad di lama kohod na.
Uubm nya,
“Udukng na!
Uta' na sera' nu!
Uli' na!”
25 Waktu ina hai lama kohod na turus na miudukng,
imoidn sera' na,
ma' minili',
sembela' nya mantug Itala.
26 Nentaadn na lama dia kibunggakng baar-baar,
sembela' siga lama na mantug Itala.
Uubm siga lama na,
“Migia baar-baar kuasa Itala nidadn ti odu nti.”
Yesus Nggiit I Lewi Miaa' Deirdn Na
27 Pegpunga ina,
Yesus limuas tidia ma' ikiliid lama pegpungut wakng kupala gugupug di kustubm.
Ngaardn nya si Lewi.
Uubm Yesus di nya,
“Baa,
biaa' na diaadn!”
28 Si Lewi miusag,
inetak nentaadn na kerai nya ma' ndedi lama pegbiaa' Yesus.
29 Punga na ina si Lewi imuha' ramai adi Yesus di bali na.
Kiara lama pegpungut wakng kupala ma' lama leidn miniaa' miohodn dia.
30 Barabm lama Pirisi ma' sigu ugama tidi paan Pirisi nigsuad di lama pegbiaa' Yesus.
Uubm siga lama na,
“Man rati uhu iginohodn ma' lama pegpungut wakng kupala ma' lama leidn kedetaan?”
31 Yesus miabat siga lama na.
Uubm nya,
“Bakng lama nda' kiladu,
leidn ga perlu' duptur;
lama kiladu na bu' na perlu' duptur.
32 Ina hai sikng diaadn,
ou nda' matakng adi lama ndara dusa,
tei' ou matakng adi lama kidusa,
supaya siga lama na timiligud tidi dusa nda.”
Kimuatadn Kentangan Megpuasa
33 Kiara lama ikimuat Yesus.
Uubm siga lama na,
“Lama pegbiaa' ny Yohanes ma' lama pegbiaa' paan Pirisi megpuasa ma' nguduaa.
Man rati lama miaa' diha mohodn ma' nginum sei,
nda' megpuasa?”
34 Uubm Yesus di siga lama na,
“Lama ngua' koidn ndara megpuasa leid pengantidn lahi na kahal di bali,
35 tei' matakng na masa pengantidn lahi na utudn tidia,
nubu' siga lama na megpuasa.”
36 Yesus nigsuad ndalabm melik di siga lama na.
Uubm nya,
“Ndara lama mereit kumut baru nggien nombol kumut mula'.
Bakng sia mbuat oo' nga rua,
sia minasa kumut baru na pasal kumut baru ma' kumut mula' na nda' ngam.
37 Ina hai ndara lama mubus semsu baru di soig tunggu' mula',
pasal bakng semsu kemambakng,
tunggu' mula' na metedak,
semsu na mbubus megrubat,
ma' tunggu' na pudn binasa.
38 Tei' semsu baru mistii' busudn di soig tunggu' baru.
39 Ina hai ndara lama mingin nginum semsu baru,
bakng bas na nginum semsu mula'.
Poro' nya,
‘Semsu mula' na lobi ayad.’ ”