Yesus Imohodn Epaat Ribu Lama
8
1 Di na kimidiadn kiara barabm lama ingua' Yesus.
Pegabis ngkoon siga lama na,
Yesus imompodn lama pegbiaa' nya.
Uubm nya,
2 “Ou mingisiadn siga lama nti.
Kutuluadn na siga lama na ingibal dihiti.
Na haa' na inibisadn na ngkoon.
3 Bakng ou nggisuru' siga lama nti muli' nda' pa mohodn,
kiara lama nda' ngkompot pasal modu' bunua.”
4 Lama pegbiaa' nya ikimuat nya.
Uubm siga lama na,
“Nggien ti ngai suhup ngkoon kati' di tenga'-tenga' bunua nti nggien ti mmohodn siga lama na?”
5 Uubm Yesus,
“Pida nggiou ruti kuii' dihu na?”
Uubm siga lama na,
“Turu' nggiou.”
6 Inubu' Yesus igisuru' lama dia miupug di tana'.
Nubu' sia miogot turu' nggiou ruti na ma' inguduaa mantug Itala.
Uubm nya,
“Itala,
aha mpia mori dihi ruti nti.”
Inubu' Yesus imagi ruti na ma' imori di lama pegbiaa' nya,
igisuru' mmohodn lama dia.
Nubu' lama pegbiaa' nya imagi di lama dia.
7 Kiara hai anak louk dia nda' barabm.
Yesus inguduaa melik di Itala,
inubu' igisuru' lama pegbiaa' nya imori di lama dia ma' miohodn.
8 Ruti ma' louk na limobi.
Nentaadn na lama dia miohodn gipad mbiag hai.
9 Inubu' lama pegbiaa' Yesus imompodn opod siga lama na miohodn.
Kiara turu' raga' iponu' ga' opod na.
Kira-kira epaat ribu lama miohodn.
10 Pegpunga siga lama na miohodn,
Yesus igisuru' siga lama na mili'.
Nubu' sia ma' lama pegbiaa' nya simelehei oig,
timulak tidia mindi bunua Delmenuta.
Lama Pirisi Igisuru' Yesus Piliid Kuasa Na
11 Kiara lama tidi paan Pirisi ingua' Yesus igiit nya igbunu'.
Siga lama na mingin mpisidukng nya.
Nubu' gisuru' nya piliid kuasa nya,
supaya siga lama na kempandi bakng sia piniit Itala ma' nda'.
12 Yesus ingiriaak intakng na pasal susa ati.
Inubu' sia miabat siga lama na.
Uubm nya,
“Man rati pa' uhu mingin diaadn piliid kuasa ku?
Baar-baar ou moro' dihu ndou piliid kuasa ku di dihu!”
13 Sia inumang siga lama na ma' simelehei oig na ma' lama pegbiaa' nya.
Siga lama na timulak tidia kindi seborokng loud na.
Ragi' Lama Pirisi Ma' Raja Herodes
14 Lama pegbiaa' Yesus ikilipat igiit lutu',
set kiara singgiou ruti ga di soig oig na.
15 Yesus igsuad ndalabm di lama pegbiaa' nya.
Uubm nya,
“Ingat uhu ragi' lama Pirisi ma' ragi' raja Herodes!”
16 Nubu' lama pegbiaa' nya igsuad deirdn nda.
Uubm siga lama na,
“Sia susuad oo' nga rua,
pasal kiti ikilipat igiit ruti.”
17 Yesus pandi onu ga sinisuad lama pegbiaa' nya.
Uubm nya,
“Man rati pa' uhu nda' pa kerati?
Undakng ku pihiardn nyu kahal ngadal.
18 Uhu kiara mata ma' tilinga,
tei' nduhu pandi kiliid ma' kidoor!
19 Nduhu kintabm ringa' diti,
pungga' ga' ku imagi lima nggiou ruti nggien imohodn lama lima ribu tuni?
Pida raga' gisi opod piompodn nyu?”
Uubm siga lama na,
“Pulu' dua raga'.”
20 Yesus ikimuat melik di siga lama na,
“Waktu ku imagi turu' nggiou ruti nggien imohodn lama epaat ribu tuni,
pida raga' opod piompodn nyu?”
Uubm siga lama na,
“Turu' raga'.”
21 Uubm nya,
“Man rati gisi uhu kahal nda' pa kerati?”
Yesus Pekemaa' Lama Bulag Di Bunua Betsaida
22 Yesus ma' lama pegbiaa' nya miatakng di bunua Betsaida.
Kiara lama ingua' nya igiit simbatu lama bulag ma' ingiriat nya,
supaya neronggodn lama bulag na.
23 Yesus miogot pii' lama bulag na ma' igiit nya limuas tidia.
Pegilab nya,
sia imiil di mata lama bulag na ma' ineronggodn mata lama na,
sembela' nya ikimuat bakng kiliid na ma' nda' pa.
24 Lama na ngindadn mata na ma' ikisipat lama ipanu.
Uubm nya,
“Oo',
kiliid ou na lama ipanu,
tei' siga lama na singgurua kiou.
Mata hu nda' pa ntelak.”
25 Yesus ineronggodn mata nya melik.
Mata lama na timelak ma' kimaa' na.
26 Inubu' Yesus igisuru' nya mili'.
Uubm nya,
“Dei pebalik moro' lama di bunua Betsaida!”
Susuad I Petrus Kentangan Yesus
27 Yesus ma' lama pegbiaa' nya ipanu kindi bunua mingad Keseria Pilipi.
Atakng siga lama na ipanu,
sia ikimuat lama pegbiaa' nya.
Uubm nya,
“Esi ou nti,
poro' lama?”
28 Uubm siga lama na,
“Kiara lama moro' diha si Yohanes,
sia biag melik.
Ma' kiara hai moro' diha nabi Elia,
sia dimua' melik di dunya' nti.
Ma' kiara hai moro' diha nti nabi ringa' bu'.”
29 Uubm nya,
“Tei' bakng di dihu,
esi ou nti?”
Uubm i Petrus,
“Aha na Kiristus Guruadn piniit Itala.”
30 Uubm Yesus di siga lama na,
“Dei uhu na pemoro' di lama leidn kentangan diaadn.”
Yesus Moro' Pungga' Ga' Kipitiaadn Nya
31 Yesus mulei ngira' lama pegbiaa' nya,
sia mistii' pitiaadn.
Uubm nya,
“Ou na nti piniit Itala.
Ou nuan nensara',
ou nuan mmati.
Suhu kutua' lama Yuhudi,
ma' kupala lama pegogot ugama,
ma' sigu ugama nda' nirima diaadn.
Siga lama na musulaadn diaadn.
Ina na,
ou pitiaadn,
tei' pegodu kutuluadn ou biag malik.”
32 Lama pegbiaa' nya kerati,
pasal susuad nya mpintas.
Ina na,
si Petrus igiit nya kimodu' tidia nggien nya ngerarakng susuad na.
33 Nubu' Yesus ingilingu kindi lama pegbiaa' nya,
sembela' nya imunu' i Petrus.
Uubm nya,
“Petrus,
dei kiboros!
Aha susuad singgurua kupala kuakng!
Pihiardn nu singgurua munusia',
leidn ga singgurua pihiardn Itala!”
34 Nubu' Yesus imompodn lama pegbiaa' nya ma' nentaadn na lama dia.
Uubm nya,
“Bakng kiara lama mingin miaa' diaadn,
sia nda' kaap miaa' kendahadn deirdn na.
Sia mistii' nonggukng salib nya ma' miaa' diaadn,
35 pasal esi-esi ga lama miaa' kendahadn deirdn na,
sia na nda' ngkaap kibiagadn seleid-leid na.
Tei' esi-esi ga lama mati,
pasal sia pisiaa di diaadn ma' ngira' lama birta mpia tidi Itala,
sia na ngkaap kibiagadn seleid-leid na.
36 “Onu guna bakng lama kiara nentaadn na arta' ma' siidn di dunya' nti,
tei' nda' ngkaap kibiagadn seleid-leid na
37 pasal leidn ga maap moli bakng kibiagadn?
38 Na haa' na lama nda' miaa' kendahadn Itala ma' meseirt na mbuat ndoot.
Ou na nti piniit Itala ma' di na kimidiadn ou pebalik kinditi ma' meleyhat nya.
Waktu hu pebalik,
migia kuasa hu tidi ny Ama'.
Bakng lama melou di diaadn ma' melou susuad ku,
ou pudn nda' ketondu' siga lama na,
waktu ku pebalik.”