Yesus Siunsub Tidi Bandar Nejarat
6
1 Yesus ma' lama pegbiaa' nya miuhad tidia,
minili' kindi bunua nya.
2 Odu lama Yuhudi simbiaakng,
Yesus mulei ngira' barabm lama di bali simbiangan dia.
Nentaadn na lama ikidoor kibunggakng ma' sembela' siga lama na igesab nya.
Uubm siga lama na,
“Nggien nya kimpandi susuad tidi Itala?
Ma' esi ingira' nya mbuat mbisa?
3 Sia tuhakng kiou sei ma' anak i Miria.
Sia senga pusud ma' ny Yakobus,
ma' ny Yusas,
ma' ny Yudas,
ma' Simun.
Kiara pusud libudn hai minien di bunua nti.”
Ina na,
lama dia inunsub Yesus.
4 Uubm Yesus di siga lama na,
“Kiara nabi bakng di bunua nya ndara lama kemengaan nya ma' di waris nya hai ndara lama kemengaan nya.
Tei' mbimbi ga bunua nggien nya matakng,
sia nuan lama kemengaan.”
5 Yesus nda' ikaap igbuat bisa na,
set nya ineronggodn ga ma' ipekemaa' lama dua tolu tuni ga.
6 Sia kibunggakng baar-baar,
pasal siga lama na nda' pisiaa di deirdn na.
Yesus Ipiit Lama Pegbiaa' Nya, Pulu' Dua Tuni
Inubu' Yesus ingeroudn kindi bunua leidn nggien nya ngira' lama.
7 Sia imompodn lama pegbiaa' nya,
pulu' dua tuni.
Sia mulei ipiit siga lama na,
dua-dua tuni,
ipanu kindi bunua leidn nggien ngua' moro' birta tidi Itala.
Sia imori siga lama na kuasa nggien mpuhad kuakng.
8 Uubm Yesus di siga lama na,
“Dei uhu pigiit medoot,
set nyu nggiit sunggud nyu ga!
Ma' dei uhu pigiit lutu' nyu,
atau pudn kupuyu' ma' siidn!
9 Pegkasut uhu na!
Dei uhu pegbaju' dua lempak!
10 Pegdatakng nyu di bunua na,
bakng kiara lama nirima dihu dia,
odop uhu na dia sampai uhu muhad tidi bunua na.
11 Bakng ndara lama nirima dihu,
uhad uhu tidia!
Waktu nyu muhad tidia,
pepaga' abuk di uai nyu,
supaya siga lama na kiliid ma' kempandi siga lama na kidusa,
pasal kabul kidoor susuad tidi Itala!”
12 Ina na,
lama pulu' dua tuni na igbiakng ma' Yesus,
ingua' imoro' lama supaya siga lama na timiligud tidi dusa nda.
13 Siga lama na ipuhad barabm kuakng,
ingisu' suhu lama kiladu ma' lana piasu ma' pekemaa' barabm lama.
Si Yohanes Sininggulu
14 Raja Herodes ikidoor kentangan Yesus,
pasal Yesus kutunduadn lama di nentaadn na bunua Gililia.
Kiara lama susuad,
Yesus ina na si Yohanes.
Ina na,
si Yohanes pegponsu' lama.
Tadn siga lama na,
si Yohanes biag melik,
ina na Yesus kiara kuasa mbuat mbisa.
15 Kiara hai lama susuad,
Yesus ina na nabi Elia.
Tadn siga lama na,
nabi Elia dimua' melik di dunya' nti.
Kiara hai lama susuad,
Yesus ina na sikng nabi ringa' bu'.
16 Pegdoor i Herodes ina,
sia igsuad,
“Sia na si Yohanes bas sininggulu askar ku.
Na haa' na sia biag melik.”
17-20 Si Herodes susuad oo' nga rua,
pasal ringa' na sia igesaa ma' i Heredias.
Tei' si Heredias saa pusud i Herodes,
si Pilipus.
Ina na,
si Yohanes meseirt na moro' di i Herodes,
si Herodes kisala' pasal ingagu saa pusud nya.
Ina na,
na langu' pasi ndoot ati di ny Yohanes sampai mingin mmati nya tei' nda' maap.
Si Herodes molok ny Yohanes,
pasal sia pandi ny Yohanes ndara sala' ma' miaa' susuad tidi Itala.
Ina na,
si Herodes mingin nelamat nya.
Umbakng-umbakng pena',
sia kahal mingin kidoor susuad ny Yohanes.
Ina na,
si Herodes igisuru' askar nya ngedahap ny Yohanes,
nigat nya,
ma' pusuak nya di soig giil,
pasal na langu' mingin mmati nya.
21 Di na kimidiadn na langu' kiara piluakng kaap mmati ny Yohanes.
Waktu ari jadi i Herodes,
kiara ramai di bali nya.
Sia ngijumput suhu lama migia panggat di bunua Gililia,
siga kutua' pirinta,
siga kutua' askar,
ma' siga lama kaya.
22 Na langu' kiara anak umai.
Sia miniaa' ramai dia ma' jugit dia.
Si Herodes ma' suhu lama dia senang guakng ikiliid umai na jugit.
Ina na,
raja Herodes igsuad di menahadn nya,
“Onu ga kendahadn nu?
Ou mori sei.”
23 Inubu' si Herodes ingigenggi di menahadn na.
Uubm nya,
“Onu-onu ga kibiriidn nu tidi diaadn sampai sintenga' arta' ku ibori hu di diha,
dakng.”
24 Na menahadn ingua' ikimuat indu' nya.
Uubm nya,
“Onu kibiriidn ku tidi saa nu?”
Peguubm indu' nya,
“Kibiria' ulu ny Yohanes!”
25 Na menahadn ingundas pibelik kindi raja na.
Uubm nya,
“Ou mingin diha mori diaadn ulu ny Yohanes na haa' na.
Ipaa' di libuat talabm!”
26 Raja na susa guakng baar-baar,
tei' bas na nya ingigenggi di tingguangan kuberaman lama.
Nda' na sia ngkaap milia,
pasal nentaadn na lama dia ikidoor genggi nya.
27 Ina na,
sia ingundas igisuru' askar nya ininggulu ny Yohanes ma' igiit ulu na kindia.
Askar na pudn ingua' ininggulu ny Yohanes.
28 Inubu' pibelik dia,
igiit ulu na di libuat talabm.
Bineri di menahadn na.
Na menahadn pudn imori di indu' nya.
29 Pegdoor lama pegbiaa' ny Yohanes birta na,
siga lama na ingua' ingelobokng banggi nya.
Yesus Imohodn Lima Ribu Lama
30 Lama piniit Yesus,
pulu' dua tuni na,
pibelik ingua' timomu nya ma' imoro' pungga' ga' siga lama na bas na ipanu ma' ngira' lama leidn.
31 Kiara barabm lama kindia ma' tidia sampai Yesus ma' lama pegbiaa' nya ndara jaabm nggien iginohodn.
Uubm nya di lama pegbiaa' nya,
“Baa,
hiti!
Mpanu hiti na tiditi kindi bunua ndara lama nggien nyu temalakng.”
32 Inubu' siga lama na timulak tidia kindi bunua ndara lama.
33 Tei' barabm lama ikiliid siga lama na timulak tidia ma' iketondu' siga lama na.
Ina na,
barabm lama tidi nentaadn na bandar igulu ingintana' miniaa' di diaa,
miatakng di bunua nggien Yesus ingonong.
34 Pegdua' Yesus tidi oig na,
sia ikiliid barabm lama dia.
Sia pudn mingisiadn siga lama na,
pasal siga lama na singgurua kambikng biri'-biri' mpanu ga kibilu,
ndara lama nggipat.
Ina na,
Yesus mulei ngira' siga lama na barabm susuad tidi Itala.
35 Peggibiidn,
lama pegbiaa' Yesus ingua' igsuad di nya.
Uubm siga lama na,
“Nda' na meleid robi.
36 Surua' siga lama na nti kindi bunua leidn,
ngua' moli ngkoon!
Ndara gien moli bunua nti.”
37 Uubm Yesus,
“Pehono' nyu na siga lama nti!”
Uubm lama pegbiaa' nya,
“Leidn ga kiti kiara siidn suhup nggien moli koon adi siga lama nti.
Bengkali gagi walu' buaidn pudn nda' suhup.”
38 Uubm Yesus,
“Kida' nyu ruti na!
Pida nggiou?”
Pegliid siga lama na ruti lima nggiou ma' louk dua mbatu,
nubu' siga lama na imoro' nya.
39 Inubu' Yesus igisuru' lama pegbiaa' nya imompodn suhu lama dia,
miupug di rihut igpaan-paan.
40 Siga lama na miupug igbaris.
Kiara matus tuni,
kiara lima mpulu' tuni.
41 Nubu' Yesus miogot lima nggiou ruti ma' dua mbatu louk na.
Sia ninggeda' langit ma' inguduaa mantug Itala.
Inubu' sia imagi ruti na imori di lama pegbiaa' nya ma' igisuru' mmohodn suhu lama miupug dia.
Inubu' sia imagi dua mbatu louk na adi nentaadn na lama dia.
42 Ruti ma' louk na limobi.
Nentaadn na lama dia miohodn gipad mbiag hai.
43 Nubu' lama pegbiaa' Yesus imompodn opod siga lama na.
Kiara pa pulu' dua raga' bas opod siga lama na.
44 Set lahi ga miohodn dia,
lima ribu tuni,
nda' na kiroodn libudn ma' peranak.
Yesus Ipanu Di Tempak Beig
45 Yesus igisuru' lama pegbiaa' nya semelehei oig na ma' igulu kindi seborokng loud na di bunua Betsaida.
Nubu' sia imuun lama dia.
46 Punga na sia imuun lama dia,
sia timodik buig nggien ingua' nguduaa.
47 Pegrobi,
lama pegbiaa' nya di tenga'-tenga' loud na,
tei' Yesus deirdn na kahal di diaa.
48 Sia ikiliid lama pegbiaa' nya megpati merosi,
pasal siga lama na inunsukng.
Kira-kira mati' odu,
sia ipanu di tempak beig na,
ingua' siga lama na di selakng na.
Ngundakng sia igulu lemalu siga lama na,
49 tei' siga lama na ikiliid nya ipanu di tempak beig na.
Inubu' siga lama na imeragu',
tadn na kuakng.
50 Pegliid siga lama na nya,
nentaadn na molok baar-baar.
Uubm Yesus di siga lama na,
“Ou ba hana!
Dei uhu kolok!”
51 Nubu' sia simelehei oig na.
Pegselehei nya,
dodos pudn beranti.
Lama pegbiaa' nya kinorokng baar-baar.
52 Walaupudn siga lama na bas na ikiliid nya ingonop ruti ma' louk na,
siga lama na nda' pa kerati esi sia.
Yesus Pekemaa' Lama Mbarabm Di Bunua Genesarat
53 Yesus ma' lama pegbiaa' nya miniaa' oig na simeborokng loud na kindi bunua Genesarat.
Pegdatakng dia,
siga lama na inigat oig na ma' dimua'.
54 Pegdua' siga lama na di pasig,
kiara lama dia ketondu' Yesus.
55 Siga lama na dia ingundas na igiit lama barabm kiladu ngua' temomu Yesus.
56 Mbimbi ga bunua gien Yesus ngonong,
siga lama na nggiit barabm lama kiladu,
ipilakng di pasar ma' di tana'.
Nubu' ngiriat Yesus,
supaya lama kiladu na ngkaap ngaming tuntukng pimihaadn nya.
Esi-esi ga ngaming kemaa' na.