Lama Meti Longon Sembela'
3
1 Odu lama Yuhudi simbiaakng,
Yesus pibelik kindi bali simbiangan na.
Di bali simbiangan na kiara lama meti longon sembela'.
2 Ma' kiara hai lama inondu' Yesus,
mingin nentabm nya nda' miaa' undakng-undakng ugama na.
Bakng miaa' di undakng-undakng na,
nda' kaap kerai odu simbiangan.
Tadn na siga lama na,
bakng Yesus pekemaa' lama na,
ina kerai.
3 Yesus igsuad di lama meti longon sembela' na.
Uubm nya,
“Usag na!”
4 Inubu' sia ikimuat di siga lama na,
“Onu nisuru' uhubm ugama ti?
Gisuru' nuud atau pudn ngudusa?
Ma' gisuru' nelamat atau pudn mmati lama?”
Siga lama na nda' miabat.
5 Odu ina sia nggerampus di siga lama na,
pasal siga lama na nda' mingin nya mpekemaa' lama meti longon sembela' na.
Sia ikiliid di sodi nya,
gibakng kuaan na,
sembela' nya mingisiadn.
Uubm nya di lama meti longon sembela' na,
“Nua' na ngosi longon nu!”
Pegkosi nya,
turus na longon nya kimaa'.
6 Inubu' lama tidi paan Pirisi limuas tidi bali simbiangan na.
Pegluas siga lama na,
turus igupahat ma' paan Herodes mingin mmati Yesus.
Barabm Lama Ingua' Yesus Di Tempoordn
7 Yesus ma' lama pegbiaa' nya inempoordn di Gililia.
Barabm lama miniaa' nya.
Kiara lama tidi bunua Gililia,
bunua Yudia,
bunua Idumia,
ma' bunua di seborokng Sungi Yardan.
8 Kiara hai tidi bandar Yurusalam,
bandar Tirus,
ma' bandar Sidun.
Nentaadn na lama ingua' Yesus,
pasal ikidoor nya kiara kuasa ngkaap pekemaa' lama.
9 Barabm lama mingin ngirsak Yesus.
Ina na,
sia gisuru' lama pegbiaa' nya ingai oig gien nya semelehei.
10 Sia bas na pekemaa' barabm lama ma' nentaadn na lama kiladu megsesogir mingin neronggodn nya.
11 Bakng kiara lama nsuahadn kuakng kiliid Yesus,
siga lama na nggotud-otud di tingguangan nya ma' merapak nya.
Uubm siga lama na,
“Aha peidn.
Aha na Anak Itala.”
12 Uubm Yesus di siga lama na,
“Dei pemoro' ou na Anak Itala!”
Yesus Mili' Lama Pitidn Nya, Pulu' Dua Tuni
13 Punga na ina Yesus ingimbuig.
Sia inoog lama pinili' nya.
Inubu' siga lama na ingua' nya.
14 Sia ipusag pulu' dua tuni pitidn nya.
Uubm Yesus di siga lama na,
“Bas ku na imili' dihu medadi pegbiaa' diaadn ma' mpiit ou dihu moro' birta mpia tidi Itala.
15 Ma' ou hai mori dihu kuasa nggien nyu puhad kuakng tidi lama suhu nsuahadn.”
16 Nti na pulu' dua lama pinili' Yesus:
rumbur satu ina na Simun (bitangan Yesus i Petrus);
17 rumbur dua si Yakobus anak Jibidi;
rumbur tolu si Yohanes anak Jibidi (sia senga pusud ma' ny Yakobus;
siga lama na gineraar Yesus Benargas,
rati na “Anak Dudug”;
siga lama na ntaas bidoot ati);
18 rumbur epaat si Andrias;
rumbur lima si Pilipus;
rumbur onom si Bertelemius;
rumbur turu' si Matius;
rumbur walu' si Tumas;
rumbur siabm si Yakobus anak Alpius;
rumbur pulu' si Tedius;
rumbur pulu' esa' Simun (sia mbani guakng);
19 rumbur pulu' dua si Yudas Iskeriut (sia nguduraha' Yesus).
Yesus Ma' Beljabul
20 Punga na ina Yesus ma' lama pegbiaa' nya mili' na.
Mbarabm lama ingua' siga lama na melik sampai ndara jaabm nggien Yesus ma' siga ibal nya iginohodn.
21 Pegdoor indu' nya ma' siga pusud na aal ina,
siga lama na pudn kindi ingua' nya nggiit muli' pasal mbarabm lama moro' Yesus mingi na.
22 Barabm sigu ugama miatakng tidi bandar Yurusalam.
Siga lama na igsuad,
“Sia nsuahadn kupala kuakng,
ngaardn nya Beljabul.”
Barabm lama leidn hai igsuad,
“Kupala kuakng mori Yesus kuasa nggien puhad kuakng na.”
Ina na,
kuberaman lama susuad kibilu.
23 Uubm Yesus di siga lama na,
“Pikidoor uhu susuad ku!”
Inubu' sia igsuad ndalabm.
Uubm nya,
“Pungga' ga' kupala kuakng mpuhad deirdn na?
24 Supama na,
bakng kiara lama simbatu pirinta megloon,
pirinta na medabu',
medadi ndaardn na guna.
25 Atau pudn bakng kiara lama senga anak mbunu' sei,
siga lama na medadi mbiakng.
26 “Ina hai bakng pirinta kupala kuakng megloon deirdn nda,
pirinta na nda' taadn meleid,
medabu' ma' kuasa nya mansur.
27 “Ndara lama ngkaap sumuak di bali lama ngkosog,
ngerampas arta' nya,
bakng nda' sigatadn gulu.
Bakng sisigat na lama kosog na,
nubu' ngkaap ngerampas arta' nya.
28 “Pikidoor!
Ou moro' dihu baar.
Nentaadn na dusa ma' susuad ndoot maap pa Itala ngampudn.
29 Tei' Itala nda' ngampudn esi-esi ngijampa Midua Itala pasal siga lama na mbuat dusa seleid-leid na.”
30 Yesus nigsuad nga rua pasal kiara lama moro' nya nsuahadn kuakng.
Indu' Ma' Pusud Yesus
31 Pegdatakng indu' Yesus ma' siga anak na,
siga lama na igait di laman bali na ma' igisuru' lama moro' di Yesus.
32 Barabm lama gugupug liliput di sodi nya.
Uubm siga lama na di nya,
“Kua' si indu' nu ma' siga pusud nu kii' laman bali nti!
Siga lama na mingin megtomu ma' diha.”