Yesus Pekemaa' Lama Kohod
2
1 Kira-kira siminggu' lobi,
Yesus pibelik kindi Kepernaum.
Inubu' lama kimpandi nya di bali na.
2 Mbarabm lama ingua' nya sampai nda' na keda' di soig bali na ma' di laman bali na pudn nda' na hai keda'.
3 Atakng Yesus ngira' siga lama na birta mpia,
kiara lama miatakng di nya.
Epaat tuni inonggukng lama kohod na.
4 Siga lama na nda' ngkaap kimingad Yesus,
pasal mbarabm lama.
(Bali na kiara tuhad gien kindi libuat libungan.
Libungan na rerata.)
Ina na,
siga lama na ingahas sapu libungan toyuk gien ingulug lama kohod na kindi sidukng,
atakng Yesus ngira' lama di sidukng na.
5 Yesus pandi siga lama na baar-baar pisiaa,
sia pekemaa' lama kohod na.
Uubm nya di lama kohod na,
“Dusa nu inampudn na.”
6 Kiara sigu ugama gupug dia.
Siga lama na mpihir di soig guakng nda,
7 “Nda' kaap sia susuad nga rua.
Sia ngijampa Itala.
Itala sei kaap ngampudn dusa lama.”
8 Yesus pandi pihiardn siga lama na.
Uubm nya di siga lama na,
“Man rati pa' uhu mpihir sikng ina?
9 Uhu mpihir diaadn ndara kuasa ngampudn dusa lama ma' uhu mpihir lobi susa pekemaa' lama kohod nti tidi moro' dusa nya inampudn.
10 Ou suru' nya mudukng,
nggiit sera' nya ma' mpanu,
supaya uhu kempandi ou na nti piniit Itala ma' ou kiara kuasa di dunya' ngampudn dusa lama.”
11 Inubu' Yesus igsuad di lama kohod na.
Uubm nya,
“Udukng na!
Uta' na sera' nu!
Uli' na!”
12 Nubu' sia miudukng,
imoidn sera' na ma' ipanu limuas.
Nentaadn na lama dia ikiliid nya ipanu.
Siga lama na kibunggakng baar-baar ma' ipigia ngaardn Itala.
Uubm siga lama na,
“Ndihi bas ikiliid singgurua nti.”
Yesus Inoog I Lewi
13 Yesus inempoordn melik di Gililia.
Barabm lama ingua' nya ma' sia pudn ngira' siga lama na.
14 Atakng Yesus ipanu melik,
sia ikiliid lama gupug di kustubm.
Ngaardn nya si Lewi anak Alpius.
Uubm Yesus di nya,
“Baa,
biaa' na diaadn!”
Inubu' sia pudn miusag miniaa' Yesus.
15 Yesus ma' lama pegbiaa' nya ingua' miohodn di bali i Lewi.
Barabm lama miniaa' nya miohodn.
Kiara lama pegpungut wakng kupala miniaa' miohodn ma' kiara hai lama leidn kedetaan miniaa' dia.
16 Kiara sigu ugama tidi paan Pirisi.
Siga lama na ikiliid Yesus iginohodn ma' lama pegpungut wakng kupala ma' lama kedetaan.
Uubm siga lama na di lama pegbiaa' Yesus,
“Sia nda' kaap nggimung mohodn ma' lama singgurua ina.”
17 Pegdoor Yesus susuad siga lama na,
sia pudn miabat.
Uubm nya di siga lama na,
“Lama nda' kiladu nda' perlu' duptur,
tei' lama kiladu perlu' duptur.
Ina hai sikng diaadn,
ou nda' matakng noog lama ndara dusa,
tei' ou matakng noog lama kidusa.”
Kimuatadn Pungga' Rua Megpuasa
18 Kiara lama tidi paan Pirisi megpuasa ma' kiara hai lama pegbiaa' ny Yohanes megpuasa.
Ina na,
si Yohanes pegponsu' lama.
Atakng siga lama na megpuasa,
kiara lama ingua' ikimuat Yesus.
Uubm siga lama na,
“Lama pegbiaa' ny Yohanes ma' lama pegbiaa' paan Pirisi megpuasa,
tei' man rati pa' lama pegbiaa' nu nda'?”
19 Uubm Yesus di siga lama na,
“Na haa' na leidn ga masa mi megpuasa,
singgurua waktu koidn mistii' lama ngginohodn sei.
Bakng pengantidn lahi kahal di bali,
lama nda' megpuasa.
20 Tei' kiara masa pengantidn lahi ngien tidi siga lama na,
nubu' siga lama na megpuasa.
21 “Lagi pudn ihi nda' nudukng dihu sikng kedaadn lama nda' nombol kumut mula' ma' kumut baru.
Pasal kumut baru bakng pupuhudn temoyuk ma' kumut mula' temamba bereit migia.
22 “Ina hai ndara lama mubus semsu baru di soig tunggu' mula',
pasal bakng semsu kembakng,
tunggu' mula' na metedak.
Semsu na mbubus ma' tunggu' na pudn metedak,
nentaadn na megrubat.
Tei' semsu baru busudn di soig tunggu' baru.”
Kimuatadn Pungga' Rua Odu Simbiaakng
23 Yesus ma' lama pegbiaa' nya ingindaidn di uma odu lama Yuhudi simbiaakng.
Atakng siga lama na ipanu,
lama pegbiaa' nya miapit ingutu' roo padi na.
24 Nubu' kiara lama tidi paan Pirisi imerapak Yesus.
Uubm siga lama na,
“Kida' gulu lama pegbiaa' nu nda' miaa' undakng-undakng ugama ti.
Nduhu pandi nda' kaap madi odu simbiaakng?”
25 Uubm Yesus di siga lama na,
“Man pa' nduhu bas imasa tidi buk sinuart Samuel?
Ringa' bu',
waktu ny Abiatar ndedi kupala pegogot ugama,
si Daud ma' lama pegbiaa' nya mudapadn ma' nibisadn koon.
26 Sia simuak bali simbiangan lama Yuhudi ma' miohodn ruti inipa' dia.
Inubu' sia pudn imagi ruti na di lama pegbiaa' nya.
Bakng miaa' di undakng-undakng ti,
lama pegogot ugama sei kaap mohodn ruti na,
tei' si Daud ma' lama pegbiaa' nya miohodn hai.