—Anmehwante ankitenamikik in EspirituSanto,

kimani antaneltokak pa Dyos?

Yehwante kinankilik:

—Amo'ik tihkakil ta onka se EspirituSanto.

3 Wan Pawlos kintahtanili:

—Wan ten takwatekiliste ankonanak anmehwante?

Wan yehwante tanankilik:

—Pa nitakwatekiliste Yuhanes.

4 Pawlos kinmili:

—Yuhanes kinmiliyaya masewalme pa mokwatekiloskya pa kinmitaloskya kampa yehwante yahmo kinekiloya kichiwaloskya ten amokwal yok kineshtiloskya kampa kikweptikatkaloya ininta'ilnamikiliste wan kineshtitikatkaloya kampa kikweptikatkaloya ininyolme pa Dyos ka inintachiwaliste kwahkwalme.

Kinmiliyaya masewalme pa kineltokaloskya yewal walaya takwitap ka yewal,

in kinek kito in Yehshwa.

5 Kwah kikakik in,

oyek takwatekilme pa ni'itokaliste in TATS Yehshwa;

6 kwah kintalili Pawlos nimahwam ipa yehwante,

in EspirituSanto owal ipa yehwante wan kipewaloya tahtolme ka oksek tahtolme yewal amo kimatiloya tahtoloya wan taketsaloya nitahtolmeDyos.

7 Katkaloya moshte kina 12 takam.

8 Okalak Pawlos pa nityopYudiyo' ompa yewal kintakichiliyaya nitahtolmeDyos pa yey meste,

amo tamakasiyaya wan kinnawatiyaya kina reynarowaya Dyos.

9 Ma yok sek kichikawaltik ininyolme pa amo kineltokaloskya in tahtolme.

Hanwel pa ininishpa in masewalme kipewaloya taketsaliste amo kwahkwalme inak ni'ot Dyos.

Kwakin Pawlos okinka yehwante,

wan okinwik inik nimoneshtililme pa ni'eskwela se yewal itokaya Tiranos,

wan pa hanse tonatim kimashtiyaya nitahtolmeDyos.

10 Yok oye Pawlos pa ome shiwim,

kampa yok moshte kishki ompa mochantiloya pa AsíYah,

inik yudiyo' wan niyok inik gereko' kikakiloya nitahtolmeDyos in TATS.

11 Dyos kichiwaya wehwe taneshtiliste ika ka ininmahwam Pawlos,

12 in masewalme kinwikaloya miyak paño' wan shahsalme yewal Pawlos kinkitskiyaya wan kintalililoya ipa kokoshkim,

yehwante pahtiloya niyok yehwante kipiyaloya yehyekatim amokwahkwalme kisaloya pa yehwante.

13 Wan niyok katkaloya sek yudiyo' amo motaliloya,

yehwante kinkistililoya yehyekatim amokwahkwalme kinekiloya tanotsaloskya ka ni'itokaliste in TATS Yehshwa,

kitoloya:

—Annimishtake ankisaske ka ni'itokaliste Yehshwa,

in yewal Pawlos tamashti.

14 Yehwante katkaloya chikome ininpilwam se yudiyo itokaya Eskéwa,

yewal katka se ka in TotatsimWehwe.

15 Pa se tonat in yehyekat amokwal kinnankili:

—Melak in Yehshwa nikishmat,

wan niyok nikishmat in Pawlos;

ma yok anmehwante,

ak anmehwante pa yok annichilitikat?

16 Wan in takat yewal kipiyaya in yehyekat amokwal,

otsikwin ipa yehwante wan omomikti ka miyak chikawaliste moshte takam kisaloya pa in kal katkaloya nakatilme wan takokoltilme.

17 Kimani omomat in,

pa moshte in yudiyo' wan in gereko' yehwante ompa mochantiloya pa Epesos,

momaptiloya moshte yehwante wan yok katkaya tanotsaliste we ni'itokaliste in TATS Yehshwa.

18 Wan inik myak yehwante taneltokaloya pa Yehshwa asiloya wan motapohpowililoya ininta'ihtakoliste in ten yewal kichiwaloya,

19 wan myak katkaloya yehwante kichiwaloya tashoshaliste kinnichikok ininamamtakwihkwilolme,

kinchichinoloya ininishpa moshte;

kimani kinpowak kishki kostaroloya inik amattakwihkwilolme,

wan hame katka 50 mil tomiPlata.

20 Mochiptiyaya ka miyak chikawaliste nitahtolme in TATS wan myak masewalme taneltokatiyaloya.

21 Kwan opan in,

Pawlos okital ni'espiritu pa kimani panowaya pa in talme Makedonya wan Ahaya,

pa yaskya Yerushalém.

Kitowaya kwah niyas pa Yerushalém,

niyok monek pa niyas nikitas in Wepweblo Roma.

22 Kwakin okintitan pa Makedonya ome nitapalewilme,

TimoTe'os wan Erastos,

wan Pawlos mokawaya sek tonatim pa in tal AsíYah.

23 Pa inik tonatim katkaloya sek masewalme yehwante hyero kichiwaloya ika ni'ot in TATS,

24 katka se itoka Demetriyos,

yewal kinchiwaya takopinalme ka plata yewal nesiloya kina in se tyopWe kaha kitankwaketsaliloya in dyosa Artemis,

wan miyak tomi kitaniloya moshte kishki tekipanoloya inak yewal.

25 Kwakin okinnichik ka oksek yehwante kichiwaloya in tekipanoliste,

wan kinmili:

—Takam,

ankimatil kina miyak tomi tiktanil ka in tekipanoliste yewal tikchiwal;

26 kina ankitak wan ankikakik yewal in Pawlos pek kintakichilitinem kampa in dyose' tachiwalme ka takam amo dyose';

wan yok myak masewalme taneltokaloya,

amo hanwel nika han pa Epesos hanwel pa mochi kishki tal AsíYah.

27 Wan amo hanwel onka poliwiliste pa in totekipanoliste,

hanwel niyok tami niwetanotsal pa nityopWe in wedyosa Artemis onka pa se poliwiliste in kal kaha kitankwaketsalil moshte yehwante pa AsíYah wan pa mochi kishki tal.

28 Kwah kikakik in,

hyero mokwalantik,

wan tsatsiloya:

—Ma ye we in Artemis nidyosa in Epesos!

29 Pa haniman in Wepweblo moshte masewalme hyero kichiwaloya,

yok moshte oyak pa in weKal te'atro,

wan kiwilanaloya Gayus wan Aristarko',

in omente takam pa Makedonya yehwante yaloya inak Pawlos.

30 Wan Pawlos kinekiya kalakiskya pa tahtoskya ka in masewalme,

ma yok in moneshtililme amo kimakawaltik.

31 Wan niyok sek ka ininmasewalme in wehwetatakewalme pa in tal yewal katkaloya ninihniwan Pawlos,

kititanilik sek tahtolme,

kitahtaniloya pa amo kalakiskya pa in wekal te'atro.

32 Wan katkaya miyak taketsaliste pa in tanichikoliste kaha motahusgarowaya,

sek tsatsiloya se tachiwaliste wan noksek oksek tachiwaliste,

wan myak masewalme amo kimatiloya pates ompa nichikotikatkaloya.

33 Ma yok sek yehwante katkaloya itsala masewalme taketsaloya kina takatkaya pa in taketsaliste ka Alesandros,

akyewal inik yudiyo' kitopewaloya pa yaskya ta'ishpa ka moshte.

Alesandros kichiwaya taneshtiliste ka nimahwa pa amo nawatitiyaloskya,

kinekiya tahtoskya pa kinpalewiskya ni'ishpa in masewalme.

34 Ma yok kwah kimatik kampa yewal katka yudiyo,

moshte tsatsiloya pa se tahtol kina pa ome ora kitoloya:

—Ma ye we in Artemis pa in Epesos!

35 Kwakin owal yewal kinkwihkwilo in amam ka in wetatakewan,

kinyolsewi in masewalme,

kinmili:

—Takam epeseyo',

moshte ankimatil kampa in Wepweblo Epesos yewal kikwitawi in wetyop ka in dyosa Artemis,

wan in takopinal yewal walwets pa in takpakIlwikak.

36 Amo'ak kwal kitos kampa in amo melawak,

ma yok simoyolsewik wan shihmatik kwal ten ankinekil ankichiwaske.

37 Pates ankinwalikak inik takam,

yehwante amo ta'ishtikiyanilme pa inik tyopalme wan amoten kitol ka nityop todyosa tehwante.

38 Ma yok,

ta Demetriyos wan inik yehwante tekipanol inak yewal kipiyal tateshpawiliste ika pek ak,

kampa kat hwese' wan kaha motahusgaro';

shiyak wan shiktenewak moteshpawiliste sek ika oksek.

39 Ta ankipiyal oksek tachiwaliste pa kitenewaske,

niyok monek pa yes tatenewiliste ompa kaha monichikol inik tatakewalme pa in Wepweblo;

40 ka in ten opan ashka,

tikpiyal tamaptiliste kampa tiyeske ka tateshpawiliste kampa tikchiptikat se momiktiliste we,

kampa amo tikpiyal ten tikitoske ika ka in we kwalaniliste ka in masewalme.

41 Kwah otam okinmil in,

oyek tatamiliste inik taketsaliste pa in tanichikoliste kaha motahusgarowaya.