Pawlos ya pa in Wepweblo Korintos
18
Otam omotachi in,
Pawlos okis pa Aténa',
oy pa in Wepweblo Korintos.
2 Ompa okit se takat yudiyo itokaya Akwila,
yewal otakatiya pa in mochital itokaya Pontos.
Wan yoliya pa in tal itokaya Italya,
kipiyaya sek tonatim ompa Italya wan nisiwa Periskila walak mochantik pa Korintos walak pa Korintos kampa in weRey itok Kela'udyus otatake pa kisaloskya moshte in yudiyo' pa in Wepweblo Roma.
Yok Pawlos kinpashalowaya Akwila wan Periskila
3 kampa yehwante kimatiloya kichiwaloya in tekipanoliste yewal niyok kimatiya Pawlos,
kimatiloya kitsomaloya shashal tilawak kwakin Pawlos omoka tekipanotik inak Akwila.
4 Wan mochi inik tonatim pa in tonatmosewilyudiyo,
Pawlos kintakichiliyaya pa nityopYudiyo ka in yudiyo' wan yehwante gereko'.
5 Kwah Silas wan TimoTe'os walaloya pa Makedonya,
Pawlos pa hanse tonatim kintakichiliyaya nitahtolmeDyos in yudiyo' kampa Yehshwa melawak katka in Kristo.
6 Ma yok kimani inik yudiyo' kinankililoya yewal wan hyero kililoya,
kwakin Pawlos kitsehtsel nitakemtil kina inintachiwaliste in yudiyo' kampa kichiwaloya amokwal,
kinmili:
—Ashka ta Dyos anmishtakokolti anmehwante ankipiyaske tateshpawiliste wan amo newal.
Wan ashka niyas nikinnawatis yehwante amo yudiyo'.
7 Kwakin okis Pawlos pa nityopyudiyo wan opanoti pa ni'icha se itok Tityus Yustus yewal kitankwaketsaliyaya Dyos wan mochantiyaya seladit kaha nityopYudiyo'.
8 Wan niweRey nityopYudiyo' yewal itokaya Kerispus okineltok in TATS yewal wan moshte pa ni'icha.
Niyok taneltokaloya myak masewalme pa Korintos wan oyek takwatekilme.
9 Pa se yowal in TATS kili Pawlos tachiyaya kina tatimiktiyaskya:
—Amo shimomapti;
tewal shikintakichiliti wan amo shihka pa titahtos.
10 Kampa newal ni'onka ka tewal.
Amo'ak kwal pa mishkitskis pa mishkokoltis,
kampa pa in Wepweblo kat miyak yewal nishneltokal.
11 Yok omoka mochantiti Pawlos ompa pa se shiwit wan chikwase mestim,
kimashtitinem nitahtolDyos.
12 Kwah Galyón reynarowaya pa in mochital itok Ahaya,
wan sek yudiyo' kikwalanililoya Pawlos.
Wan okiwikak kaha monichikoloya pa tahusgaroloya
13 kitoloya:
—In takat kinmashtitik masewalme kina monek pa kitahtoltiske Dyos,
ika yewal kina kito totanawatiliste yewal tikpiyal.
14 Pawlos kinek tahtoskya kwah Galyón okintakichil yoke inik yudiyo':
—Newal annimishkakiskya anmehwante yudiyo' ta kitastiyaloskya se taketsaliste amokwal ta kichiwaskya se tamiktiliste;
15 ma yok in ten anmehwante ankitotikat hanwel kat tahtolme,
wan itokalme wan inik anmoselte anmotahtolme yewal ankipiyal,
shimotalik ka se tahtoliste anmehwante newal amo nihnek pa niyes se hwes ka inik mochiten.
16 Kwakin Galyón otatake pa kinkistiloskya in yudiyo' ompa kaha monichikoloya kaha tahusgaroloya.
17 Kwakin moshte kikitskik SóStenes,
in yewal niweRey in tyopYudiyo',
wan okiwaltehtewik ininishpa kaha monichikoloya kaha tahusgaroloya.
Ma yok Galyón amoten tamatiya.
Pawlos walmokwepaya pa Anti'okya
18 Ompa omoka Pawlos myak tonatim ka ninohniwan taneltokalme pa Korintos kwakin opanoti,
okonan se barko pa Sirya,
inak in Periskila wan Akwila.
Asik pa Kenkereya,
ompa omoshim Pawlos kampa kichiwaya melawak kina kiliyaya Dyos.
19 Wan asik pa Epesos,
Pawlos okinka ompa Akwila wan Periskila,
wan okalak Pawlos pa nityopYudiyo' ompa kintakichiliyaya nitahtolDyos in yudiyo'.
20 Kwah yehwante kitahtaniloya pa mokawaskya Pawlos oksek tonatim ka yehwante,
wan yewal amo kinek.
21 Kwah yayaptiyaya Pawlos kinmili:
—Ta Dyos kinek;
oksep niwalas nika ka anmehwante.
Kwakin okis pa Epesos pa se barko.
22 Kwah o'as pa Kaysareya,
oy pa Yerushalém pa kintahpaloskya inik taneltokalme,
kwakin opanoti pa Anti'okya.
23 Omoka sek tonatim ompa,
oy okinpashal sesen pa sesen kaha monichikoloya inik taneltokalme pa in tal Galatiya wan in tal Perígya,
kinchikawaltiyaya pa ininyolme moshte inik taneltokalme pa Kristo.
Apólos pa Epesos wan pa Ahaya
24 Wan katka se takat yudiyo itoka Apólos,
yewal takatiya pa in Wepweblo Alesandríya.
Yewal kimatiya tamashtiyaya kwal niyok kimatiya kwal nitakwihkwilolisteDyos owal pa Epesos.
25 In Apólos katka taneshtilil pa ni'ot in TATS,
wan taketsaya ka miyak pakiliste wan tamashtiyaya melawak in mochiten ipa Yehshwa,
hanwel kimatiya nitakwatekiliste Yuhanes.
26 In Apólos okipewalti taketsaliste pa nityopYudiyo',
amo momaptiyaya.
Kwah okikak Periskila wan Akwila,
kwakin okiwikak oksela pa kimatiskya kwal yewal ten kinek kitos ni'ot Dyos yewal ayamo'ok kwal kimatiya.
27 Kwah Apólos kinekiya panoskya pa in tal Ahaya,
in ninohniwan taneltokalme pa Kristo kichikawaltiloya wan kinkwihkwiloliloya se amatTakwihkwilol ninohniwan taneltokalme yehwante mochantiloya ompa pa Ahaya kinmililoya pa kinamikiloskya Apólos ka pakiliste.
Kimani o'as pa Ahaya,
okinpale miyak yehwante ka nita'ihniliste toTats inik taneltokaloya,
28 Apólos mo'onanaya ka tahtolme ka in yudiyo' kinneshtiliyaya nitakwihkwilolisteDyos ininishpa moshte kampa Yehshwa katka in Kristo.