TimoTe'os kintokatiyaya Pawlos wan Silas
16
Asik Pawlos wan Silas pa Derbe wan pa Listera.
Ompa katkaya se taneltokaya pa Kristo itoka TimoTe'os,
nikon se siwat yudiya,
nitats se takat gereko.
2 Inik taneltokalme pa Kristo pa Listera wan pa Ikonyon,
taketsaloya kwal ka TimoTe'os.
3 Yok Pawlos okinek okiwik inak yewal,
ma yok okonan wan kikotonili nikwerit kaha mashishal kampa katkaloya miyak yudiyo' pa inik pweblo',
wan kimatiloya kampa nitats TimoTe'os katka gereko.
4 Kwah panoloya Pawlos wan Silas wan TimoTe'os pa inik Wehwepweblo' kampa kintakichililoya inik taneltokalme kina mokawaloya ka in taketsaliste ka inik tatitanilme wan inik Abwelolme Wehwetsim pa Yerushalém,
pa yok kichiptiyaloskya.
5 Yok masewalme taneltokalme kinchikawaltiloya ininyolme ka in Tats Yehshwa,
wan yok hanse tonatim mochiwaloya miyak taneltokalme.
Tachiyaya kina tatimiktiyaskya Pawlos kit se takat yoliya pa Makedonya
6 In EspirituSanto amo okinmakawalti pa kintakichililoskya nitahtol Dyos pa in mochital AsíYah.
Ma yok,
mopanoltik in tal itok Perígya wan in tal itok Galatiya
7 kwakin asik pa in tal itok Misya.
Kinekiloya yaloskya pa in mochital itok Bitinya,
ma yok ni'espiritu Yehshwa amo okinmakawalti.
8 Kwakin opanok hanse pa in tal itok Misya,
wan temok pa Tro'as.
9 Wan pa yowal Pawlos tachiyaya kina tatimiktiyaskya,
okit se takat yewal yoliya pa in tal Makedonya,
moketstikatka wan kitahtaniyaya miyak kiliyaya:
“Shipan pa Makedonya wan shitishpale.”
10 Kwah okit Pawlos in tachiyaya kina tatimiktiyaskya,
haniman tiyaloya pa in tal Makedonya,
tihmatik kampa Dyos tishnotsaya pa tikintakichililoskya in nitamashtilisteKwal ka yehwante pa Makedonya.
Taneltokaloya pa in mochital Lidya
11 Yok tipanotiyak pa barko pa Tro'as,
wan otiyak hanse pa in tal onka ipanta pa in we'atTemtik itok Samotrake,
pa mostatik ti'asik pa in Wepweblo Neá Polis.
12 Wan ompa tikisak otiyak pa in Wepweblo Pilipos yewal onka se Wepwebloromano,
yewal hyero wetanotsal pa ni'ipanta tal Makedonya.
Ompa timokawak sek tonatim.
13 Pa in tonatmosewilyudiyo tikisak pa kiyawak in Wepweblo,
tiyak pa itenko atenko,
ompa titamatiloya tikitaloskya kaha kwal tiktahtoltiloskya Dyos.
Ompa nichikotikatkaloya sek siwam wan timotalik,
tikpewaltik taketsaliste inak yehwante.
14 Katkaya ompa se siwat itoka Lidya,
otakat pa in Wepweblo Tiyatira;
kinamakaya shashalme yewal katkaya chichiltik hame tiltik yewal kitankwaketsaliyaya Dyos,
wan tishkaktikatkaya;
In Tats Yehshwa kimakawilti pa niyol nitaneltokaliste ka in ten yewal kitowaya Pawlos.
15 Wan kimani oye takwatekil,
wan moshte yehwante pa ini'icha yewal,
otishtahtan miyak kitowaya:
—Ta anmehwante antamatil kampa newal melak nihneltok in TATS,
shiwalak pa no'icha ompa shimosewik.
Wan otishtahtan miyak ka chikawaliste.
16 Kwakin katkaya se tonat tiyaloya kaha kitahtaniloya Dyos,
wan pa ot otiskis se siwatYankwik se tekipanol amo kitashtawililoya.
In siwatYankwik,
kipiyaya se yehyekat amokwala yewal tanawatiyaya ten panoskya ka in poderoliste kitaniyaya miyak tomi pa kinmakaskya ininwetatakewan.
17 Yewal tishtokatiyaya tehwante wan Pawlos,
tsatsitiyaya,
kitotiyaya:
—Inik takam yehwante nitekipanolme Dyos HyeroTakpak,
wan yehwante anmishnawatitikat kina kwal anyeske takistiliste pa in poliwiliste.
18 Yewal kichiwaya in pa miyak tonatim,
kwakin okwalan Pawlos,
wan walmomalin oki'ahwa in yehyekat amokwal kili:
—Ka ni'itokaliste Yehshwa-Kristo,
nimichili shikis pa yewal.
Wan haniman in yehyekat okis pa yewal.
19 Kimani okitak ininwetatakewalme in siwatYankwik kampa yahmo mochistiyaloskya pa kitaniloskya tomi kwakin kinkitskik,
Pawlos wan Silas okinkwikak pa in plasa kaha katkaloya in masewalme pa ininishpa inik wehwetatakewalme.
20 Wan ompa kinwikak ka yehwante wehwetatakewalme Pawlos wan Silas,
kitoloya:
—In takam,
kat yudiyo',
kichiptikat kwalaniliste ka toWepweblo,
21 kimashtitikat kina kimatil kichiwal,
kampa tehwante tiromano onka tatasotal pa yok titaneltokaske wan tikchiwaske.
22 Kwakin moshte in masewalme okwalanik ka yehwante,
wan in hwese' tatakewak pa kintsayanililoskya ininshashalme wan pa kinwitekiloskya ka barehon.
23 Kwah tamik kinwitekik,
kinwikak pa in tatsakwal,
wan kitakewak yewal takwitawiyaya pa in tatsakwal pa kinkwitawiskya kwal pa amo kisaloskya.
24 Kwah kikak in tahtaniliste yewal okintsakwa pa wehkat kalitik,
wan kinilpil ininikshiwam ka sek yewal kohkoyonki kaha kalakiloya ininikshiwam tachiwal ka kwawit.
25 Ma yok,
pa ipanta yowal,
kitahtoltitikatkaloya Dyos Pawlos wan Silas wan kikantarolitikatkaloya Dyos,
wan in oksek tatsakwalme pa kalitik kinkaktikatkaloya,
26 haniman hyero omolin tal kampa ompa kalitik hyero omotamolin,
haniman mo'ishtapok mochi tatapolilme,
wan in tatsakwalme ninkadena motapok.
27 In nitakwitawil in tatsakwal o'is,
wan okit inik tatapolilme pa in tatsakwal tapotikatkaloya,
kwakin okikisti niteposte katka han pa tipit pa momiktiskya,
kampa tamatiya kampa inik tatsakwalme chololoya.
28 Haniman Pawlos okitsatsil kiliyaya:
—Amo shimomikti,
kampa moshte nika tikat.
29 Otahtan in nitakwitawil in tatsakwal pa kwalikililoskya tawiliste,
mo'isiwiltiyaya pa kalakiskya wan omotankwakets ka yoyokaliste pa nitankwa Pawlos wan Silas.
30 Haniman okinkisti pa kiyawak wan kintahtanili:
—Totatsim,
ten nikpi pa nikchiwas pa niyes takistiliste pa in poliwiliste?
31 Wan yehwante kilik:
—Shihneltok in Tats Yehshwa-Kristo wan tiyes takistiliste pa in poliwiliste,
tewal wan moshte pa mo'icha.
32 Wan okintakichilik nitahtolmeDyos yewal wan moshte kishki ompa katkaloya ni'icha.
33 Wan haniman in yowal okinwik in nitakwitawil tatsakwal,
okinpakil kaha tatikilme katkaloya,
wan haniman mokwatekik yewal wan moshte kishki mochantiloya pa ni'icha.
34 In nitakwitawil kaha tatsakwalme okinwik pa ni'icha,
wan okintalil takwal wan kipiyaloya pakiliste moshte pa ni'icha kampa ashka kineltokaloya Dyos.
35 Mostatik,
in wehwetatakewalme okintitanik sek gwacho' ka nitakwitawil kaha kintsakwal ka in tahtolme.
36 In nitakwitawil kaha kintsakwal kinmili Pawlos wan Silas:
—Inik wehwetatakewalme tatakewak pa annimishmakawas yok kwal shiyaptiyak ka sewiliste.
37 Ma yok Pawlos kinmili yehwante:
—Inik wehwetatakewalme tatakewak pa tishwitekiloskya pa ininishpa yehwante pa anmopweblo,
amo tahtanik ta tikchiwak ten amokwal,
kampa tikat romano',
kwakin antishtsakwak wan ashka ankinekil pa tiyaske wan amoten tikitoske?
Amoyok!
Ma walak yehwante in wehwetatakewalme,
ma tishmakawak yehwante.
38 Inik gwacho' kinnawatik inik wehwetatakewalme in ten yewal kito Pawlos kwah kimatik inik wehwetatakewalme kampa Pawlos wan Silas takatiloya pa roma momaptik.
39 Yok oyak kaha Pawlos wan Silas,
kintahtaniloya pa kinihnililoskya kwakin kinkistik pa in kalitik kaha tsaktikatkaloya wan kintahtanik pa kisaloskya pa in Wepweblo.
40 Kwah kisak pa in kalitik kaha kintsakwal,
kwakin oyak pa ni'icha Lidya,
ompa kinmitak inik taneltokalme wan kinchikawaltiloya miyak chikawaliste,
kwakin opanotiyak.