Pawlos wan BarNabás pa Ikonyon
14
Pa in pweblo Ikonyon Pawlos wan BarNabás,
okalakik in omente pa nityopYudiyo,
ompa kintakichililoya nitahtolDyos kampa miyak taneltokaloya yudiyo' wan gereko'.
2 Ma yok sek yudiyo' yehwante amo taneltokaloya pa Kristo,
okichiwak pa kwalaniloskya masewalme amo yudiyo' wan okichiwak pa tamatiloskya amokwal pa yehwante kineltokaloya Kristo.
3 Ma yok Pawlos wan BarNabás ompa mokawaloya miyak tonatim,
wan kintakichililoya in masewalme ka chikawaliste ika nita'ihniliste in TATS;
amo momaptiloya wan in Tats Yehshwa kinneshtiliyaya masewalme pa Ikonyon kampa katkaya melawak in tahtol yewal kitoloya Pawlos wan BarNabás yehwante kichiwaloya tachiwaliste ka ininmahwam wan motapololtiloya.
4 Ma yok amo katkaloya ka se tahtoliste in masewalme,
sek katkaloya ka in ten kitoloya in yudiyo',
oksek ka in ten kitoloya in tatitanilme.
5 Yok kichiwak in yudiyo' se tahtoliste ka yehwante amo yudiyo' wan ka yehwante kipiyaloya poderoliste kichiwak pa kinkokoltiloskya in tatitanilme wan pa kinmohmotaloskya.
6 Kwah okimatik Pawlos wan BarNabás,
kwakin ocholok pa Derbe wan Listera niWehwepweblo Lika'onya,
wan inik katkaloya itehtenko,
7 ompa niyok kintakichililoya nitamashtilisteKwal Yehshwa-Kristo.
Pawlos pa Listera wan Derbe
8 Wan katkaya se takat pa Listera amo nihnemiyaya.
Pa kimani otakat amokwal ki'oliniskya ni'ikshiwam yowatiya han,
amo'ik onihnem.
9 Ompa kikaktikatka ten taketstikatka Pawlos,
yewal omoka kitatik kimat kampa in takat taneltokaya pa niyol kampa Dyos kipahtiskya.
10 Kwakin ka tahtol chikawak Pawlos kili:
—Shimokets melahka ka mo'ikshiwam.
Yewal otsikwin wan haniman onehnem.
11 Yok kwah kitak in masewalme ten kichiwaya Pawlos,
waltsatsik ka tahtol Lika'onya,
kitotikatkaloya:
—Inik dyose' yewal mochiwak kina takam waltimok ka tehwante!
12 Wan kitokayoltiloya BarNabás ka in dyos Se'us,
wan Pawlos ka in dyos Hermes kampa Pawlos katkaya in se yewal tahtowaya.
13 In tyopWe ka Se'us,
katka ta'ishpa in Wepweblo,
in totats pa yewal nityopWe okinwalik sek toro' wan in masewalme kinsalol shochim;
pa kiyawak pa nitatapoli in tyop in masewalme kinekiloya kinmiktililoskya toro' pa yok kitankwaketsaliloskya Pawlos wan BarNabás.
14 Kwah takakik in tatitanilme Pawlos wan BarNabás haniman kintsayanak ininshashalme,
wan motalok itsahtsala in myak masewalme,
kintsatsililoya:
15 —Masewalme!
Pates ankichiwal in?
Tehwante niyok titakam kina anmehwante,
in tamashtilisteKwal yewal titaketsal yok monek pa ankinkawaske in ten amo kipi tashtawaliste wan ankikwepaske anmoyol ka Dyos,
yewal yoltik in okichi takpakIlwikak,
in mochital,
in wehwe'atim wan mochiten ta'onka pa yewal.
16 Ya wehkA Dyos kinmakawalti masewalme pa kinonanaloskya ininotim yehwante,
17 ma yok hanse kineshtiyaya akyewal katka,
kitimowaya ten kwal yeskya pa moshte.
Yewal kichiwaya pa kyawiskya wan timakaya tapishkaliste kwah mo'asiltiyaya nitonat pa kipiyaloskya miyak takwaliste wan kipiyaloskya pakiliste pa toyolme.
18 Ka in mochiten kitoloya Pawlos wan BarNabás mokistililoya ka in masewalme pa amo kinmiktililoskya toro'.
19 Kwakin walak in yudiyo' yehwante mochantiloya pa Anti'okya wan Ikonyon,
wan yehwante kinchikawaltik masewalme,
pa kwalaniloskya ka Pawlos.
Wan kimohmotak ka tetelme kikitskik kiwilanak pa kiyawak in Wepweblo wan ompa kikawak kampa tamatiloya katka mihke.
20 Ma yok kwah monichikok in taneltokalme pa Kristo kiyawaloloya Pawlos,
yewal omokets wan okalak oksep pa in Wepweblo;
Mostatik yewal wan BarNabás oyak pa in Wepweblo Derbe.
21 Kwakin kintakichililoya nitamashtilisteKwal Dyos ka takistiliste pa in poliwiliste pa Derbe,
kampa myak masewalme taneltokaloya pa Kristo,
kwakin mokwepak Pawlos wan BarNabás pa Listera,
wan Ikonyon wan pa Anti'okya.
22 Kintahtaniyaya pa yoliloskya inik taneltokalme pa Kristo amo'ik momakawaltiloskya pa kineltokaloskya Yehshwa-Kristo kinmililoya,
monek pa tipanoske miyak takokoliste pa yok tikalakiske kaha reynaro Dyos.
23 Wan kintokayoltik sek takam Abwelolme pa sesen nintyop yudiyo' kwah tamik kitahtoltik Dyos wan mosawak Pawlos wan BarNabás kitahtanik Dyos pa kinpalewiskya pa yewal in taneltokaloya.
24 Kwakin opanok Pawlos wan BarNabás in tal Pisidya wan asik pa in tal Panpilya.
25 Ompa kintakichilitinemil nitahtolmeDyos pa Perge,
wan temok pa AtalYah.
26 Kwakin oyak pa barko pa Anti'okya pa in mochital Sirya,
ompa kaha in taneltokalme kintitaniloya ka nita'ihniliste Dyos pa kinpalewiskya pa amoten kinpanoskya Pawlos wan BarNabás kampa amo mokwalantiloskya masewalme ka in nitanawatilisteKwal Dyos wan tamik kichiwak in tekipanoliste.
27 Kimani asik pa Anti'okya,
kinnichikok inik taneltokalme pa Yehshwa-Kristo kwakin kintakichilik in mochiten Dyos okichi ka yehwante,
wan kina Dyos ki'ishtapol inik tatapoli kaha kalakiloskya inik taneltokaloskya yehwante amo yudiyo'.
28 Wan ompa omokawak miyak tonatim Pawlos wan BarNabás ka yehwante taneltokalme pa Kristo.