Kimiktik Yakobo wan kitsakwal Petros
12
Pa inik tonatim otatake Herodes in weRey pa kinkitskiloskya sek taneltokalme pa kintakokoltiloskya.
2 Otatake pa kikotonililoskya ka teposte in Yakobo,
yewal katka ninohni Yuhanes,
3 okit Herodes kina kwal pakiloya in yudiyo',
wan otatake niyok pa kikitskiloskya Petros.
Katkaya inik tonatim ka mitotiliste kwah kikwaloya pan yewal amo kipi taposhawalti pa in mitotiliste itok Paskwa.
4 Yok kikitskik Petros,
wan kitsakwak wan kitemakak ka nawi tanichikolme ka nawi gwacho'.
Kinek mochiyaskya pa kimani motamiskya in mitotiliste itok paskwa kwakin tatakewaskya pa kwalikaloskya pa ininishpa in masewalme.
5 Kimani Petros katkaya tatsakwal,
in taneltokalme hanse motahtaniloya wan mochikawaltiloya pa Dyos ika yewal.
Dyos kikisti Petros pa in tatsakwal
6 Pa in yowal katkaya pa kimani Herodes mostatik kikistiskya Petros pa kiwikaskya pa ininishpa in masewalme pa kihusgaroloskya,
koshtikatka Petros ipanta ka ome gwacho',
ilpitikatka ka kadena niyok takwitaptikatkaloya gwacho' pa nitatapoli in kal kaha tatsakwaloya.
7 Kwakin ones se nitanawatilanhel in TATS,
ka se tawiliste tipitak pa in kalitik.
Wan in tanawatilanhel kikitski Petros kampa nakastikatka,
ki'isilti,
kili:
—Shimokets shimo'isiwilti.
—Shimotakemilti wan shikintal mowarachim.
Yok okichi Petros,
wan in tanawatilanhel kili:
—Shiktal motakemtil wan shinishtok.
9 Yok in tanawatilanhel kisaya Petros kitokatiyaya ikwitap.
Amo kimatiya ta melawak panotikatkaya ta tachishtikatkaya kina tatimiktiyaskya.
10 Wan panok in ta'ishpa kaha takwitaptikatkaloya katkaloya in nawinte gwacho' yok asik kaha katkaloya in oksek gwacho' kwakin asik pa in tatapoli tatachiwali ka fyerro yewal kisaya pa in Wepweblo.
In tatapoli mo'ishtap isel,
wan kisak,
panok se kaye,
hanse yaloya pa kimani asik pa okse kaye pa hani yahmo ones in tanawatilanhel ka Petros.
11 Kwakin Petros walmo'ilnamik wan mo'il:
—Ashka nihmat melak;
in TATS okiwaltitan se nitanawatilanhel pa nishkistiskya pa nichikawaliste rey Herodes wan mochi in yewal masewalme yudiyo' kinekiloya nishchiwililoskya.
12 Kimani Petros kimat in mochiten,
oy pa nikal Marya,
ninantsi Yuhanes,
in niyok kitokayoltiloya Markus,
ompa nichikotikatkaloya miyak wan kitahtoltikatkaloya Dyos.
13 Kitehtewi Petros in tatapoli pa kiyawak,
wan owal se tekipanol siwatYankwik itok Rode oy tachi ak katka.
14 Wan ki'ishmat nitahtol Petros,
kwakin omopakilti miyak amo ki'ishtapol in tatapoli,
han motaloti omokwep pa kinnawatiskya inik oksek kampa Petros katkaya pa kiyawak in tatapoli.
15 Yehwante kilik:
—Amo tikpi ta'ilnamikiliste.
Ma yok yewal kitowaya kampa katkaya melak.
Kwakin yehwante kilik:
—Yewal nitanawatilanhel Petros.
16 Wan Petros moka tatehteptik pa in tatapoli.
Kimani oki'ishtapok in tatapoli wan okitak motapololtik.
17 Ka nimahwa Petros kichiwaya taneshtiliste pa amo nawatitiyaloskya,
kwakin okintakichil kina in TATS okikisti pa in tatsakwal,
niyok kinmili:
—Shiyak shikinnawatik Yakobo wan tonohniwan taneltokalme inik yewal mochiten onishpan.
Kwakin okis wan panoti oksela.
18 Kwakin kwah tanes,
in gwacho' amo kimatiloya ten kitoloskya ten yewal kipanowaya Petros.
19 Yok tatake Herodes pa kitemoloskya Petros,
amo kitak,
kwakin kintahtanili Herodes in gwacho',
yehwante amoten kinankilik.
Kwakin otatake pa kinmiktiloskya in gwacho' wan opanoti Herodes pa in tal Yudaya temo pa Kaysareya ompa omoka.
Herodes omik
20 Wan hyero kwalantikatka Herodes ka yehwante pa in Wepweblo Tiros wan in Wepweblo Tsidón,
yehwante mokawak pa yaloskya tahtoloskya ka Herodes.
Wan kitinewilik tomi in Belastos,
se nitekipanol in rey Herodes,
inik mochantiloya pa tiroteko' wan pa sidoneyo' kitahtaniloya pa kintahtanililoskya sewiliste ka Herodes,
kampa yehwante motakowililoya pa inintal Herodes.
21 Pa se tonat mokawak pa mo'italoskya Herodes inak yehwante,
motakemilti ka nishashalme kwahkwal kina motakemilti se weRey,
wan motali ipa nisiyawe kaha tahosgarol kwakin kintakichili ka miyak tahtolme in masewalme.
22 In masewalme tsatsiloya kililoya:
—Yewal tahtotik se dyos,
amo se masewal!
23 Wan haniman se nitanawatilanhel in TATS,
okikokolti Herodes kampa amo okimak tahtolme wehwe Dyos,
kwakin okikwak okwilme nikwerpo walmik.
24 Ma yok nitahtolmeDyos momiyaptitiyaya,
wan katka tanawatiliste kaha han.
25 Wan BarNabás wan Sha'ul,
kimani omotamik inintekipanoliste,
walmokwepak pa Yerushalém kinwalikaloya ka yehwante Yuhanes,
wan yewal kitokayoltiloya Markus.