Petros wan Kornelyus
10
Katkaya se takat pa in Wepweblo Kaysareya,
yewal itokaya Kornelyus in katka kapitan ka 100 gwacho' yewal motokayoltiyaya italyano.
2 Wan yewal katka se takat kwal,
wan moshte yehwante ompa mochantiloya pa ni'icha,
kitankwaketsaliloya Dyos wan momaptiloya ni'ishpa Dyos.
Kornelyus kinpalewiyaya miyak ka nitemakaliste pa masewalme in yudiyo' yehwante amoten kipiyaloya wan hanse tonatim kitahtoltiyaya ka miyak tamawishtiliste Dyos.
3 Pa se tonat kina pa yey ora' pa tyotak,
Kornelyus,
tachiyaya kina tatimiktiyaskya okit se nitanawatilanhelDyos omo'asilti kaha yewal wan kili:
—Kornelyus!
4 Kornelyus kitatikatkaya wan momaptitikatka,
kili:
—Ten tihnek,
Tats?
Wan in tanawatilanhel kili:
—Dyos okikak in yewal ten otiktahtan wan yewal kimat kina tikinpalewi yehwante amoten kipiyal.
5 Wan ashka,
shikintitan masewalme pa yaske Yope,
wan shitatake pa kwalikaske in se itok Shimón yewal niyok kitokayoltil Petros.
6 Yewal ompa moseptikatka pa nikal se itoka Shimón yewal kiyokshiti kwero in katka nikal pa itenko in We'at.
7 Kimani opanoti in tanawatilanhel,
yewal inak otakets,
Kornelyus okinnots omente nitekipanolme wan se gwacho yewal kineltokaya Dyos yewal hanse kitokatinemi.
8 Kwakin okintakichil Kornelyus in mochiten kipanowaya wan okintitan pa Yope.
9 Pa mostatik,
kimani yehwante yaloya pa in ot wan astiyaloya pa in Wepweblo Yope.
Wan Petros tehko ikpak kal pa kitahtoltiskya Dyos,
katkaya takwalispa.
10 Walmayan Petros,
wan kinekiya takwaskya.
Kimani kitayokshitilitikatkaloya Petros,
tachiyaya kina tatimiktiyaskya,
11 okit in takpakIlwikak ishtapotikatka wan temotiwalaya se nesiyaya kina se shashalWe,
katkaya ta'ilpilme pa inik nawi nitehtenko,
temowaya ipa in tal.
12 Pa in shashal katkaloya mochi inik yolikilme ka nawi inintankwam wan mochiten yewal mowilanal ipa tal wan inik moshte pa in ilwikak kishki nesil kina totom.
13 Kwakin omokak se tahtol,
kili:
—Shimokets,
Petros shihmikti wan shikwa.
14 Petros kili:
—Newal amoyok nikchiwaskya,
Tats,
kampa amo nikwas ten yewal tatatsot pa tehwante in yudiyo',
kina kito in tahtol in ten amo chihchipawak.
15 Wan in tahtol oksep kito:
—Ina yewal kili Dyos yewal ten chipawak,
amo shikit kampa katsawak.
16 In opan yeshpa wan haniman in shashal oye ta'ahkokil oksep pa in takpakIlwikak.
17 Yok omoka Petros ki'ilnamikti ten kinek kitoskya in tachiyaya kina tatimiktiyaskya,
kimani inik takam yewal okintitan Kornelyus,
yehwante tahtantikatkaloya pa in tatapoli kaha mokawaya nikal Shimón.
18 Wan ka wehwe otahtanik ta ompa moseptikatkaya se itoka Shimón yewal niyok kitokayoltiloya Petros.
19 Petros ki'ilnamiktikatka ten kinek kitoskya in tachiyaya kina tatimiktiyaskya,
in Espiritu kili:
—Shikit;
yey takam mishtemotikat.
20 Shimokets,
shitem wan shi ka yehwante,
amoten shikintahtanil,
kampa newal onikinwaltitan.
21 Kimani temowaya Petros kaha katkaloya inik takam,
kinmili:
—Shikitak.
Newal ninewal yewal ankitemotikat.
Ka ten anwalal?
22 Yehwante kinankilik:
—Ka se itok Kornelyus,
yewal ininkapitan 100 gwacho',
yewal se takat kwal,
wan kimat momaptiyaya pa ni'ishpa Dyos moshte kimawishtililoya masewalme yudiyo'.
Se nitanawatilanhelDyos chipawak kili pa timishwikaloskya tewal pa ni'icha yewal pa mishkakis in ten tewal tikilis.
23 Kwakin Petros okintake pa kalakiloskya wan ompa panoloskya yowal.
Wan mostatik omokets Petros,
wan panoti inak yehwante,
wan niyok kitokatiyaloya sek ininnohniwan taneltokalme,
mochantiloya ompa Yope.
24 Mostatik asik pa Kaysareya,
ompa kinchishtikatkaya Kornelyus ka ninohniwan wan ninihniwan kintasotaya pa oksek kalme,
kinnichiko pa nikal.
25 Kimani Petros kalaktiyaya,
okis Kornelyus pa kinamikiskya,
omotankwakets pa ni'ikshiwam Petros,
kiliyaya tahtol kwahkwal.
26 Wan Petros kikets,
kili:
—Shimokets,
kampa hanwel newal niyok nitakat.
27 Pa kimani kalaktiyaloya taketstiyaya inak Petros wan okinmit nichikotikatkaloya myak masewalme.
28 Kwakin Petros kinmili:
—Anmehwante ankimatil kwal kampa tishneshtili NitanawatilMoshé,
motatasot pa monelos se yudiyo ka yehwante amo kat yudiyo' niyok pa mopashaloske.
Ma yok onishneshtil Dyos kampa amokwal newal pa nikitos amo chipawak pa amo'ak ka in amo yudiyo'.
29 Yok oniwal kampa otitatitan pa niwalaskya,
amoten onikit.
Ashka annimishtahtanilis,
pates antatitanik pa niwalaskya?
30 Kwakin Kornelyus kinankili:
—Kipi nawi tonatim ka in ora',
pa yey ora' pa tyotak,
niktahtoltitikatka Dyos pa no'icha wan shikit omoneshti se takat pa no'ishpa tatakimiltili katka ka shashal tipitak.
31 Wan nichili:
“Kornelyus Dyos okikak ten otiktahtan wan niyok ki'ilnamik in kwal tikinchiwili yudiyo' yehwante amoten kipiyal.
32 Ashka,
shitatitan pa in Wepweblo Yope pa tikchiwas pa walas in Shimón yewal niyok kitokayoltil Petros,
yewal ompa mochantitik pa nikal in okse itok Shimón in yewal kimat kiyokshiti kwero ompa mochanti itenko in wehwe'atim.”
33 Haniman,
onitatitan pa mishnotsaloskya wan tewal otinishchiwil kwal kampa otiwal.
Ashka,
moshte tikat nika pa ni'ishpa Dyos pa tihkakiske mochi in ten TATS omichil pa titichilis.
Kintakichiliyaya Petros yehwante katkaloya pa nikal Kornelyus
34 Yok okipewalti tahtol Petros wan kinmili:
―Ashka melak nihmat kampa Dyos kit se kina kit okse,
35 hanwel yewal pa mochi kishki tal yewal kwal kinmit inik kimatiloya momaptiloya pa ni'ishpa Dyos yewal wan kimatil kichiwal kwal.
36 Dyos okintitanil in tahtolme isra'elita' wan okintakichil in tamashtilisteKwal ka sewiliste pa toyoliliste ika Yehshwa-Kristo,
yewal ininTATS moshte inik masewalme.
37 Anmehwante ankimatil in yewal mochiten opan pa inintal in yudiyo'.
Mochi in omopewalti pa in tal Yudaya,
takwitapit ka in takwatekiliste yewal taketstinem Yuhanes.
38 In Yehshwa nasareteko,
yewal Dyos okitahtolti wan okimak in EspirituSanto,
wan kichiptinem ten kwal ka chikawaliste wan kinpahtitinem moshte yehwante kinkokoltiyaya tawalilot kampa Dyos katka ka Yehshwa.
39 Wan tehwante tikat tatitanilme,
tihmatil kampa melawak tikitak mochiten yewal okichi Yehshwa pa inintal in yudiyo' wan pa Yerushalém,
kimiktik kisalok pa se krusKwawit.
40 Ma yok,
Dyos okiyolti pa yey tonatim,
okimakawalti pa moneshtiskya.
41 Amo moshte masewalme,
hanwel tehwante,
akyehwante Dyos okinonan pa ya wehkA,
hanwel tihmatil kampa melawak tikitak.
Tehwante inik titakwatinemil wan titakontinemil inak yewal,
takwitapit kwah yewal oyol oksep.
42 Wan otishtitan pa tikintakichililoskya in tamashtilisteKwal ka in yudiyo'.
Wan otishtitan pa tikinmililoskya melak kampa in Yehshwa oki'onan Dyos kina se hwes pa yohyolke wan mihmihke.
43 Yoke kitol melak mochi in amatTakwihkwilolme yewal kinkwihkwilok niTaketsalme nitahtolmeDyos,
kampa mochi yewal aki taneltok pa yewal konanas,
ika ka ni'itokaliste yeske ta'ihnililme ka ininta'ihtakoliste.
Inik amo yudiyo' konanaske in EspirituSanto
44 Ayamo'ok tamiyaya kinmiliyaya in tahtolme Petros,
owal in EspirituSanto ipa moshte yehwante kikaktikatkaloya in tamashtilisteKwal.
45 Wan motapololtiloya in taneltokalme yudiyo' yehwante katkaloya pa nitatekiliste ikwerit itenko kaha mashishal yehwante walak inak Petros,
kampa kitak kina owal in EspirituSanto niyok ka in takam amo yudiyo'.
46 Kampa kinkakiloya tahtoloya ka oksek tahtolme wan kililoya tahtolme wehwe Dyos.
47 Kwakin Petros kinnankili:
―Hanwel ak kwal pa kitsakwilis at,
pa amo yeske takwatekil?
Inik yehwante konanak in EspirituSanto niyok kina tehwante?
48 Wan otatake pa yeloskya takwatekilme ka ni'itokaliste Yehshwa-Kristo.
Kwakin kitahtanik pa mokawaskya sek tonatim ka yehwante.