Motalil pa se taketsaliste pa kimiktiske Yehshwa
(Mt. 26:1-5, 14-16; Mk. 14:1-2, 10-11; Yh. 11:45-53)
22
Astiwalaya nitonat in mitotiliste yewal pan amo kipi in motaposhawalti,
itok paskwa.
Lucas 22.1-71
2 In TotatsimWehwe wan in Tamashtinilme NitanawatilMoshé kitemoloya kina kimiktiloskya Yehshwa,
ma yok kinmakasiloya pa in pweblo.
3 Kwakin Satán okalak pa niyol Yudas,
in se ka yehwante in 12,
in yewal kitokayoltik IshKaryót,
4 wan in oy otahto ka in TotatsimWehwe wan in wetatakewalme ka in gwacho',
pa taketsaloskya kina kitemakaskya Yehshwa.
5 Yehwante pakiloya miyak wan mokawak pa kimakaloskya tomi;
6 Yudas ki'onan wan kipewalti pa kitaskya kina kwal kitemakaskya Yehshwa pa amo kimatiloskya pa in pweblo.
TyotakNitakwaliste Tats
(Mt. 26:17-29; Mk. 14:12-25; Yh. 13:21-30; 1 Ko. 11:23-26)
7 O'as in tonat kwah kikwal yudiyo' in pan yewal amo kipi taposhawaliste,
kimani moteshmonek pa yes tamiktili in borrego pa in mitotiliste itok Paskwa.
8 Yehshwa okitetan Petros wan Yuhanes,
ka in tahtolme:
―Shiyak shikyokshitik mochiten pa tikwaske pa in mitotiliste paskwa.
9 Yehwante kitahtanilik:
―Kampa tihnek pa titayokshitiske?
10 Yehshwa kinmili:
―Kwah ankalakiske pa Wepweblo,
ankitaske anmehwante se takat kiwikatiyas se komit ka at.
Shiktokak pa kaha kalakis pa se kal,
11 wan shikilik in nikaltats:
“In tamashtini tahtani kaha onka in kalitik kaha nikwas in Paskwa ka nomoneshtililme?”
12 Kwakin yewal anmishneshtilis se kalitik we pa takpak,
ompa yes mochiten moteshmonek;
shitayokshitik ompa.
13 In moneshtililme oyak wan kitak mochi kina Yehshwa kinmiliyaya,
wan ompa tayokshitik in paskwa.
14 Kwah o'as in ora,
Yehshwa omotal kaha takwal wan in tatitanilme motalik inak yewal.
15 Kwakin kinmili:
―Kishki nihnekiya nitakwaskya ka anmehwante in paskwa kampa ayamo nimokokolti pa nimikis!
16 Kampa newal annimichilis kampa amo oksep nitakwas pa kimani mo'ashilti pa in reynarolisteDyos.
17 Wan Yehshwa okonan se tapalkatonte,
otemak tashtawaliste wan kito:
―Shikonanak in wan shimotemakak tahtahko ka anmehwante;
18 kampa newal annimichilis yahmo oksep nikonis nitakil in uba',
pa kimani asis in tonat yewal walas nireynarolisteDyos.
19 Haniman,
okonan pan wan tahko kishel,
kimak tashtawiliste Dyos,
wan okinmak,
in kitowaya:
―In nokwerpo,
kampa pa anmehwante yes tatemakaliste.
Shikchiwak in ka ta'ilnamikiliste newal.
20 Yok niyok okichi ka in tapalkatonte,
kwah otam takwak pa tyotak,
wan kito:
―In tapalkatonte in se taketsaliste yankwik ka noyEste,
kampa pa anmehwante yes tashawilil.
21 ’In yewal nishtemakas nika onka yowatik kaha takwal inak newal.
22 Melak annimichilis in NitakaTakpakIlwikak yok kina onka takwihkwilol;
ma yok kina kiyas in yewal aki kitemakas!
23 Yehwante walmotahtanilik sek ka oksek ak ka yehwante,
yok mochikawaya pa kichiwaskya in.
Akyewal we monotsaskya
24 In nimonestililme kipiyak ta'ahwaliste ipa ak ka yehwante yeskya in we monotsaskya.
25 Yehshwa kinmili:
―Pa in mochital in weReye' wan in we monotsalme takam kichiwal ka in masewalme kina ta yeloskya nipweblo,
wan tatitanil ka tatakewaliste wan chikawaliste ipa yehwante,
ma yok kat tanotsalme ninihniwan in masewalme.
26 Ma yok ika anmehwante amoyok yes;
hanwel,
in wemonotsas ika anmehwante,
monek pa mochiwas kina se yewal amo wemonots;
wan akyewal tatakewas,
monek pa mochiwas kina se tikipanol.
27 Kampa akyewal wemonotsas,
in yewal motali kaha takwal pa takwas,
hanwel in yewal tikipanos?
Hanwel amo in yewal se motalis in kaha takwal?
Ma yok newal ni'onka ika anmehwante kina in tikipanol.
28 ’Anmehwante annishtokatinemil pa in tonatim kimani nipanowaya notakokoliste.
29 Kampa yok,
newal annimishmak se reynaroliste,
yok kina noTats onishmak newal,
30 pa yewal noreynaroliste antakwaske wan antakoniske kaha takwal,
wan anmotaliske pa in siya' kaha motalil wehwetatakewalme pa kiteshpawiliske in 12 tanichikolme Isra'El.
Petros kitos amo ki'ishmat Yehshwa
(Mt. 26:31-35; Mk. 14:27-31; Yh. 13:36-38)
31 In Tats kito niyok:
―Shimón,
Shimón,
shikit kampa Satán otahtan pa anmehwante yeske tatsehtselolme kina ta yeloskya kina trigo;
32 ma yok newal nikchi tahtaniliste ka tahtoliste pa Dyos pa tewal pa amo mishteshmonekis taneltokaliste.
Wan tewal,
kimani tihkwepas moyol ka Dyos,
shikinpale monohniwan pa hanse kipiyaske taneltokaliste.
33 Petros kili:
―TATS,
amo han nihnek niyaskya ka tewal pa in tatsakwal hanwel niyok pa in tamiktiliste.
34 Wan Yehshwa kili:
―Petros,
nimichilis yewal in gayo ayamo tsatsis ashka,
pa kimani tewal tikitos sehpa wan oksep ka yeshpa kampa amo tishishmat.
As in ora kaha Yehshwa panos takokoliste
35 Kwakin Yehshwa kintahtanili:
―Kimani onikintitan amo kiwikaloya ininwangoch,
amo kikwikaloya tomi,
wan amo kikwikaloya warachim,
aso kinteshmonek pekten?
Yehwante tanankilik:
―Amoten.
36 Kwakin Yehshwa kinmili:
―Ashka,
akyewal kipiya niwangoch,
ma konan inak tomi;
wan aki amo kipiya niteposte,
ma kinamak nishashal ma mokowil se.
37 Kampa newal annimichilis kampa monek pa mo'ashiltis in pa newal onka takwihkwilol:
“Wan oye tapowal ika in ta'ihtakolme.”
Kampa ten onka takwihkwilol ka newal,
kipi pa mo'ashiltis.
38 Yehwante kilik:
―TATS,
nika onka ome tepostim.
Wan Yehshwa kinnankili:
―Ya kwal onka.
Yehshwa kitahtahtolti Dyos pa GetSemani
(Mt. 26:36-46; Mk. 14:32-42)
39 Yehshwa okis,
wan kina kimatiloya kichiwaloya oy pa in tepetLom itok Oliwo';
wan nimonestililme kitokaloya.
40 Kimani o'as ompa Yehshwa kinmili:
―Shiktahtoltik Dyos,
pa amo kitilanas anmoyol tawalilot.
41 Kwakin panoti wehkit ka yehwante kina tamotaliste ka se tet,
wan ompa omotankwakets wan kitahtolti Dyos.
42 Wan kitowaya:
―Tats,
ta tihnek,
shinishkishti pa in takoniliste chichik;
ma yok amo mochiwas in yewal newal nihnek,
hanwel shikchi in yewal tewal tihnek.
43 Omoneshti kwakin se Nitanawatilanhel pa in takpakIlwikak pa kimakaskya chikawaliste.
44 Ka miyak takokoliste,
Yehshwa kitahtaniyaya Dyos ka miyak chikawaliste,
wan nitonalmikil wetsiyaya talpa kina yEste wehwe tashikaya.
45 Kimani Yehshwa omokets kwah otam okitahtolti Dyos,
opanoti kaha katkaloya nimonestililme wan okinmit koshtikatkaloya,
kampa moyolkokotikatkaloya.
46 Kinmili:
―Pates ankoshtikat?
Shimoketsak,
wan shiktahtanik Dyos pa amo anmishtilanili tawalilot anmoyol.
Kikitskil Yehshwa
(Mt. 26:47-56; Mk. 14:43-50; Yh. 18:2-11)
47 Kwah Yehshwa tahtotikatkaya,
asiloya myak masewalme.
In ta'ishpa yewal yawiya Yudas,
yewal katka se ka 12,
wan mo'ashilti ka Yehshwa pa kitenamikiskya.
48 Yehshwa kili:
―Yudas,
ka se tenamikiliste titemakas NitakaTakpakIlwikak?
49 Kimani yehwante katkaloya inak yewal kimatik ten panowaya,
kilik:
―TATS,
timomiktiske ka teposte?
50 Se ka yehwante kikokoltik nitikipanol in totatsWe,
wan okikotonil ninakakwal.
51 Yehshwa kinmili:
―Ya kwal onka;
shikinkawak.
Kwakin kikitski ninaka in takat wan okipahti.
52 Haniman Yehshwa kinmili in TotatsimWehwe,
in wetatakewalme gwacho' pa in TyopWe wan in Abwelolme Wehwetsim,
in walaloya kiwikaloya yewal:
―Anwalal ka anmotepostim wan anmokwawim,
kina newal niyeskya se ta'ishtikyan?
53 Hanse tonatim nikatkaya ka anmehwante pa in tyopWe,
wan amo annishkitskik;
in onka ora ka anmehwante,
in ni'ora Satán ka nichikawaliste kaha tatikomat.
Petros kitos amo ki'ishmat Yehshwa
(Mt. 26:57-58, 69-75; Mk. 14:53-54, 66-72; Yh. 18:12-18, 25-27)
54 Yehwante kikitskik Yehshwa,
wan kiwikak pa nikal TotatsWe;
Petros kitokatiyaya wehkit.
55 Pa ipanta ni'ishtawak in kal tatatik wan motalik kiyawalok tetsoshte;
niyok Petros omotal ika yehwante.
56 Se tikipanolSiwat,
okit yowatikatka ta'ishpa pa in teshoshte,
kitaya kwal yewal wan kito:
―In niyok katka ka yewal.
57 Petros tikwaman,
wan kito:
―Siwat,
newal amo nikishmat.
58 Hani takwitapit,
okse okit wan kili:
―Tewal niyok se ka yehwante.
Petros kili:
―Takat,
amo ninewal.
59 Kina pa se ora,
okse kito:
―Melak,
in katka inak yewal,
kampa niyok Galileyo.
60 Wan Petros kili:
―Takat,
amo nihmat ten titakestik.
Wan haniman,
kimani Petros tahtowaya,
in gayo waltsats.
61 Haniman in TATS momalin okit Petros,
kwakin Petros ki'ilnamik nitahtolme in TATS kimani kili:
“Ayamo tsatsis in gayo,
tikitos yeshpa kampa amo tishishmat.”
62 Haniman Petros okis ompa wan chokaya ka miyak yolkokoliste.
Yehshwa tawetskilil wan tawitekil
(Mt. 26:67-68; Mk.14:65)
63 Wan in takam yewal kikwitaptikatkaloya Yehshwa kiwetskililoya yewal wan kiwitekiloya.
64 Niyok kitsakwilik nishtololwam kiwachililoya pa nishayak,
wan kililoya:
―Shitichil akyewal omishte!
65 Wan hyero kililoya myak tahtolme pa mochiten.
Yehshwa ininta'ishpa in kaha tahosgaroloya in tanichikolme tatakewalme yudiyo'
(Mt. 26:59-66; Mk.14:55-64; Yh. 18:19-24)
66 Kimani otanes,
monichikok in Abwelolme Wehwetsim pa in pweblo in TotatsimWehwe,
wan in Tamashtinilme NitanawatilMoshé,
wan kiwikak Yehshwa kaha tahosgaroloya in tanichikolme tatakewalme yudiyo' wan kitahtanilik:
67 ―Titewal in Kristo?
Yewal kinmili:
―Ta annimichiliskya haha,
amo annishneltokaloskya.
68 Wan ta annimishtahtaniliskya,
amo annishnankililoskya.
69 Pa ashka haniman in NitakaTakpakIlwikak motalis pa nimahwakwalDyos ka nichikawaliste.
70 Moshte kitoloya:
―Yok yewal tewal nikonDyos?
Yehshwa kinnankili:
―Anmehwante anmoselte ankitol kampa ninewal.
71 Kwakin yehwante kitok:
―Yahmo monek titahtantiyaske?
Kampa tehwante toselte tihkakik ka isel ikamak.