TakokolistePlaga ipa yolikilme
9
Kwakin in WeTatsDyos kili Moshé pa yaskya tahtoskya inak para'ó pa kiliskya:
“Yok kito in WeTatsDyos,
niDyos hebreteko':
‘Shikinka ma yak isra'elita' pa nishtahtoltiske.’
2 Ta amo tikinnek tikinkawas pa yaske,
wan tikintsakwilitik,
3 nimahwa in WeTatsDyos kitalis ipa moyolikilme yehwante kat pa tashosholtik,
kabayo',
burro',
kameyo',
baka',
wan borrego',
kichiwas ipa yehwante pa kinwetsiskya takokoliste ka plaga.
4 Ma yok in WeTatsDyos kichiwas se tasheloliste ika niyolikilme isra'elita' wan niyolikilme egiptiyo',
kampa yok amo miki ni se niyolikil inik isra'elita'.”
5 In WeTatsDyos okital se tonat pa kichiwaskya wan kito:
“Mosta WeTatsDyos kichiwas in,
pa Egipto.”
6 Wan pa mostatik in WeTatsDyos okichi pa mikiloskya moshte niyolikilme inik egiptiyo',
ma yok ininyolikilme inik isra'elita' amo omik nise.
7 Kwakin para'ó okintitan sek masewalme pa yaloskya kinmitaloskya ininyolikilme isra'elita',
kampa nise niyolikilme inik isra'elita' mikiya.
Ma yok niyol para'ó okichikawalti wan amo okinek okinka pa yaloskya isra'elita'.
TakokolistePlaga itik barriga ka sarnoso tapitsinilme
8 Kwakin in WeTatsDyos kinmili Moshé wan Arón:
“Shikonanak neshte se mahwa kaha tayokshitil wan ma kitas Moshé pa yehyekat pa ni'ishpa para'ó.
9 In neshte mochiwas se pokte kwishtik in yehyekat kiyehyekalti pa kishki in weTal wan kipiyaske sarnoso tapitsinilme pa masewalme wan yolikilme pa kishki Egipto.”
10 Moshé wan Arón okonanak neshte ompa kaha tayokshitil wan oyak ni'ishpa para'ó.
Ompa Moshé okitas pa yehyekat wan nesik sarnoso tapitsinilme pa masewalme wan yolikilme.
11 Inik tashoshanilme amokwal pa moketsaloskya ni'ishpa Moshé kampa kipiyaloya sarnoso tapitsinilme yehwante wan moshte inik egiptiyo'.
12 Ma yok in WeTatsDyos okichikawalti niyol para'ó yok kina in WeTatsDyos kiliyaya Moshé,
amo kinek kinkak para'ó in Moshé wan Arón.
TakokolistePlaga ka teshiwit
13 Kwakin in WeTatsDyos kili Moshé pa kwalka yaskya mostatik wan kinamikiskya para'ó pa kiliskya:
“Yok kito in WeTatsDyos wan niDyos hebreteko':
‘Shikinka ma yak isra'elita' pa nishtahtoltiske.
14 Kampa newal niktitanis ashka mochi nokokoliste ipa moyol,
ipa motekipanolme wan ipa momasewalme,
kampa yok tihmatis kampa amo onka okse kina newal pa mochi kishki tal.
15 Ta pa ashkit niktasaskya newal nochikawaliste,
wan tewal wan momasewalme anmishwetsiskya se kokoliste wan poliwiloskya pa in tal.
16 Ma yok nimishkaptik ka yoliliste,
nimishneshtilitik nochikawaliste kampa yok no'itokaliste ma ye tanawatiliste pa kishki tal.
17 Tewal,
ma yok tikintsakwilitik nomasewalme wan amo tikinka pa yaske.
18 Kampa yok mosta kina ashkit,
nikchiwas pa kyawis ka miyak teshiwit yewal amo'ik ankitaloya pa kimani ankalchiwak nika pa Egipto.
19 Shikinmil pa haniman ma kinwikak itsinta kal moyolikilme wan mochiten titapi pa in tashosholtik,
kampa mochi masewalme wan moyolikilme yehwante yeske pa tashosholtik,
kampa in teshiwit wetsis ipa inik nehnemtiyaske pa kiyawak wan kinmiktis.’”
20 Sek inintekipanolme para'ó kimakasik nitahtolme in WeTatsDyos wan mo'isiwiltik pa kintalik itsinta in kal inintekipanolme wan ininyolikilme,
21 ma yok oksek amo kikakik nitahtolme in WeTatsDyos wan kinkawak inintekipanolme pa tashosholtik wan niyolikilme.
22 Kwakin in WeTatsDyos kili Moshé:
“Shikinahkok momahwam pa takpakIlwikak,
kampa pa mochi Egipto wetsis teshiwit ipa masewalme wan yolikilme wan ipa mochi in ten mo'apa pa tashosholtik.”
23 Moshé oki'ahkok nibara pa in takpakIlwikak wan in WeTatsDyos okichi pa komoniskya wetsiskya tapitaniliste wan wetsiskya teshiwit ipa mochi tal Egipto.
In WeTatsDyos okichi pa kyawiskya teshiwit pa mochi Egipto.
24 Kyawiyaya ka teshiwit wan ka in teshiwit wetsiyaya tapitaniliste,
hyero we katka,
in yewal amo'ik oye pa in tal Egipto pa kimani omochantik.
25 In teshiwit okishitin mochi kishki ten katka pa nitashosholtik Egipto,
wan ka masewalme wan yolikilme,
okishitin mochi inik tatokalme wan mochi inik kwawim okintahtapan.
26 Hanwel kaha amo owets teshiwit oye pa in tal Goshen kampa katkaloya inik isra'elita'.
27 Kwakin in para'ó otatake pa kinotsaloskya Moshé wan Arón kinmili:
―Onikchi katsawiliste.
In WeTatsDyos kichiptik ten kwal,
nomasewalme wan newal amokwal tikchiptikat.
28 Shiktahtanik in WeTatsDyos ma kitsakwil in teshiwit wan takomonaliste,
kampa nikinkawas pa yaske,
wan amo nikintsakwilis.
29 Moshé kinankili:
―Pa haniman nikisti pa in Wepweblo,
nihmelawas nomahwam pa niktahtoltis in WeTatsDyos inik komonaliste yahmo komoniske,
yahmo wetsis teshiwit.
Yok tihmatis in WeTatsDyos yewal nital.
30 Ma yok newal nihmat kampa tewal wan inik motekipanolme amo kimakasil Dyos in WeTatsDyos.
31 Inik tatokaliste ka lino wan sebada mochiwak tahtahko,
kampa in sebada kipiyaya nimiyawal wan in lino shotatikatka.
32 Ma yok in trigo wan senteno amoten okinpan kampa ayamo'ok shotaya.
33 Kimani Moshé kisti ka para'ó wan kisaya pa in Wepweblo,
oki'ahkok nimahwam ka tahtolme pa WeTatsDyos pa haniman,
yahmo takomoniyaya yahmo wetsiyaya teshiwit yahmo kyawiyaya ipa in tal.
34 Kwah okit para'ó in kyawit,
in teshiwit wan in komonaliste yahmo nawatiloya,
oksep kichiwaya katsawiliste wan yok kina yewal wan kina inintekipanolme okichikawaltik ininyolme.
35 Yok kina in WeTatsDyos kiliyaya ika Moshé,
in para'ó okichikawalti niyol wan amo kinka pa yaloskya inik isra'elita'.