8
Kwakin in WeTatsDyos kili Moshé:
“Shi pa ni'ishpa in para'ó wan shikil,
yok kito in WeTatsDyos:
‘Shikinka ma yak isra'elita' pa nishtahtoltiske.
2 Ta amo otikinka pa yaske,
nikchiwas pa temiske myak rana' pa mochi in tal Egipto.
3 In atenko Nilo temiske ka myak rana',
wan kalakiske pa mokal,
mokwarto,
pa mokama wan pa nikalme motekipanolme,
wan pa momasewalme,
wan inik kaha tikyokshiti pan wan kaha tikshakwalo teshte.
4 Inik rana' mishtehkoske tewal wan ipa momasewalme wan ipa inik mowehwetatakewalme.’”
5 In WeTatsDyos kili Moshé:
“Shikil Arón ma kimela nibara ipa atenko',
arroyo' wan kaha we'at temtik,
kampa yewal kishki Egipto temiske ka rana'.”
6 Arón kimela nimahwa ipa inik atim pa in tal Egipto wan inik rana' otimik pa kishki tal Egipto.
7 Ma yok inik tashoshanilme kichiwak yok niyok,
wan kichiwak pa walaloskya myak rana' ipa tal Egipto.
8 Kwakin in para'ó okinots Moshé wan Arón kinmili:
―Shiktahtanik in WeTatsDyos pa kinkistis inik rana' ka newal wan ka nomasewalme wan nikinkawas pa yaske nimasewalme pa yok kitaliliske tatamakaliste in WeTatsDyos.
9 Moshé kinankili para'ó:
―Shinichil kimani tihnek pa niktahtoltis Dyos pa tewal wan pa mowehwetatakewalme wan pa momasewalme pa kisaske inik rana' ka tewal.
Inik rana' han mokawaske pa atenko Nilo,
tewal wan pa mokal amo ankipiyaske inik rana'.
10 Kito para'ó:
―Mosta.
Moshé kinankili:
―Yok motachiwas kina tikito,
yok tihmatis kampa amonka okse kina in WeTatsDyos toDyos.
11 Inik rana' panotiyaske ka tewal wan pa mokalme,
wan pa motekipanolme wan pa momasewalme wan ompa han mokawaske pa atenko Nilo.
12 Kwakin Moshé wan Arón okisak pa i'ishpa para'ó.
Moshé okitahtolti WeTatsDyos pa kishki inik rana' yewal okinwaltitaniya ipa in para'ó.
13 In WeTatsDyos okikak in ten okitahtan Moshé wan inik rana' walmikik pa inik kalme pa inik patyo wan inik kaha tashosholtik.
14 In masewalme kinnichikoloya pa myak tanichikolme wan hyero ahwiyaya tal.
15 Ma yok pa kimani in para'ó okit kampa ayahmo katkaloya rana',
okichikawalti niyol wan amo kinek kinkak,
yok kina in WeTatsDyos kitowaya pa kichiwaskya.
TakokolistePlaga ka moyom
16 Kwakin in WeTatsDyos kili Moshé pa kiliskya Arón:
“Shihmela mobara wan shitawachil talpa,
kampa yok pa mochi Egipto in nipokte tal mochiwaske moyom.”
17 Yehwante yok okichiwak;
Arón kimela nimahwa,
otawachil pa tal ka in bara,
wan ka nipokte tal kisaloya moyom yewal kintsopiniloya masewalme wan yolikilme.
Pa kishki Egipto nipokte tal mochiwaya moyom.
18 Inik tashoshanilme okichiwak yok niyok,
kinekik kinchiwak moyom,
amo okinkis.
Ma yok inik moyom kintsopiniloya masewalme wan yolikilme.
19 Kwakin inik tashoshanilme kilik para'ó:
“Ina yewal kichiptik Dyos”,
yok kililoya tashoshanilme in para'ó ma yok okichikawalti niyol wan amo kinek kinkak,
yok kina in WeTatsDyos kitowaya pa kichiwaskya.
TakokolistePlaga ka sayolme
20 In WeTatsDyos kili Moshé:
“Mosta kwalka,
tikchishtiyas para'ó pa ni'ot pa kimani yas atenko,
wan tikilis:
‘Yok kito in WeTatsDyos: ’
Shikinka ma yak isra'elita' pa nishtahtoltiske.
21 Ta amo tikinka pa yaske,
newal nimishtitanilis ipa tewal,
ipa motekipanolme,
ipa momasewalme wan ipa mokalme mochi inik kalme pa Egipto wan pa in tal yewal kaha tatiliksal,
temiske pa kishki sayolme.
22 Pa inik tonatim,
pa in han kishki tal Goshen amo yeske sayolme,
kampa ompa mochantilme nomasewalme.
Yok tihmatis kampa newal in WeTatsDyos,
ni'onka pa ipanta in tal.
23 Nikchiwas pa nesis kati nomasewalme wan momasewalme.
Mosta yes ina taneshtiliste.’”
24 Wan yok okichi in WeTatsDyos,
owalak myak sayolme kina ayawit pa nikal para'ó wan pa ininkalme yehwante kitekipanoliloya wan pa kishki Egipto,
ika in sayolme hyero motaka pa in tal Egipto.
25 Kwakin para'ó okinots Moshé wan Arón wan kinmili:
―Shiyak shikintenewilik tatamakaliste in anmoDyos,
ma yok amo shikisak ipa in tal.
26 Wan Moshé kinankili:
―Amokwal pa yok tikchiwaske,
kampa in tatamakaliste yewal tikchiwal pa in WeTatsDyos toDyos,
yewal pa in egiptiyo' ten amokwal tatasot.
Ta yok otikchiwak ina,
inik egiptiyo' tishmohmotaske ka tetelme.
27 Monek pa tiyaske pa yey tonatim,
pa se tal kaha amo'ak mochantiyaya ompa tiyaske tiktenewiliste tatamakaliste in WeTatsDyos toDyos,
kampa yok yewal otichil.
28 In para'ó kito:
―Newal annimishkawas pa anyaske kitenewiliske tatamakaliste pa in WeTatsDyos anmoDyos ompa pa se tal kaha tawak,
annimishkawas ta amo anyaptiyal wEhka wan shiktahtanik Dyos pa newal.
29 Moshé kinankili:
―Pa kishki nikisti newal nika ka tewal,
niktahtanis in WeTatsDyos kampa mosta yahmo yeske inik sayolme ka para'ó,
ka motekipanolme wan ka inik momasewalme.
Ma yok tewal amo shitishkwamanti amo shikintsawil pa yaske kitenewiliske tatamakaliste in WeTatsDyos.
30 Kwakin Moshé okis pa ni'ishpa para'ó wan okitahtolti in WeTatsDyos,
31 in WeTatsDyos okichi kina okitahtan Moshé wan okinkisti mochi inik sayolme ka para'ó,
ka inintekipanolme wan pa kishki Egipto.
Wan amoten omoka ka sayolme.
32 Ma yok para'ó okichikawalti niyol wan amo kinka pa yaloskya isra'elita'.