7
In WeTatsDyos kili Moshé:
―Shikit,
nimishchiwas pa ni'ishpa para'ó kina se dyos.
Monohni Arón yes motaketsal nitahtol Dyos.
2 Monek pa tikilis in ten nimichilis monohni Arón wan yewal kili para'ó pa kinkawas pa kisaske inik isra'elita' pa in tal Egipto.
3 Newal nikchiwas kampa para'ó kichikawalti niyol wan nikchiwas myak taneshtiliste wan tapololtiliste pa in tal Egipto,
4 in para'ó amo anmishkakis,
kwakin nihmakawaltis nochikawaliste ipa Egipto wan yok nikinkistis ka sesen tanichikolme neshtiyaloya kina gwacho' nomasewalme inik isra'elita',
yehwante kisaske pa in tal Egipto ka wehwe takokoliste!
5 Kimani newal nihneshti nochikawaliste ipa egiptiyo' wan nikinkistis ompa inik isra'elita',
inik egiptiyo' kimatiske kampa ninewal in WeTatsDyos.
Nibara Arón
6 Moshé wan Arón kichiwak mochi in ten kinmiliyaya in WeTatsDyos.
7 Kimani tahtok inak in para'ó,
Moshé kipiyaya 80 shiwim wan Arón 83 shiwim.
8 In WeTatsDyos kili Moshé wan Arón:
9 “Kimani in para'ó anmishtahtani pa ankichiwaske se tapololtiliste,
tewal tikilis Arón,
ma konan in bara ma kitas ni'ishpa in para'ó,
yok in bara mochiwas kowat.”
10 Moshé wan Arón oyak okitak in para'ó yok kina kinmiliyaya in WeTatsDyos.
Arón okitas pa talpa in bara pa ni'ishpa para'ó wan inik nitekipanolme,
pa yok in bara mochiwaskya kowat.
11 Ma yok para'ó otatake pa walaloskya moshte inik tashoshanilme wan inik takam kimatiloya ten panoskya pa Egipto wan kichiwaloya pa walmoneshtiloskya wan walmopololtiloskya yok kina yehwante kichiwaloya:
12 Pa sesen yehwante okintasak ininbara talpa,
inik mochiwak kowam.
Ma yok,
nibara Arón okintol ininbara moshte yehwante.
13 In para'ó okichikawalti niyol wan amo kinek okinkak,
yok kina in WeTatsDyos kitowaya.
In at mokatsawalti ka yEste
14 In WeTatsDyos kili Moshé:
“In para'ó kichikawalti niyol wan amo kinek kinmakawas pa kisaske inik isra'elita'.
15 Shi shikit watsinko para'ó pa kimani kisas pa yas malti atenko wan shikchi pa itenko atenko Nilo wan shi shiknamik,
amo shikilka pa tihwikas in bara yewal mochi kowat.
16 Kwakin tikilis:
“In WeTatsDyos,
niDyos hebreteko' onishwaltitan pa nimichilis:
‘Shikinka ma yak isra'elita' pa nishtahtoltiske ompa pa se tal kaha tawak!’
Ma yok tewal amo tihnek tishkakis,
17 yok kito in WeTatsDyos:
‘Ashka tihmatis kampa ninewal in WeTatsDyos!’
Ka in bara yewal nikpi pa nomahwa nihwetekis at pa in atenko Nilo wan mochiwas yEste.
18 Inik michim mikishke yehwante kat pa in atenko,
in atenko hyero ahwiyak yes wan inik egiptiyo' amokwal kina koniske at ompa.’”
19 Niyok in WeTatsDyos kili Moshé:
“Shikil Arón ma konan nibara wan ma kimela nimahwa ipa in atim pa Egipto,
pa mochiwaske yEste ipa inik atenko' wan inik kaha totokatiyaske wan inik kaha temtiyaske wan kaha kintemiltil.
Yes yEste pa mochi Egipto,
niyok pa komim tachiwalme ka kwawit wan ka tetelme!”
20 Moshé wan Arón kichiwak in ten kinmili WeTatsDyos.
Arón oki'ahkok nibara wan kiwitek at pa in atenko Nilo pa i'ishpa para'ó wan inintekipanolme.
Mochi in atenko omochi yEste!
21 Wan mochi inik michim pa atenko omikik.
In atenko Nilo hyero ahwiyaya potoniyaya wan amo'ak ka egiptiyo' kwal pa koniskya at ompa.
Pa kishki Egipto katkaya yEste.
22 Ma yok nitashoshanilme egiptiyo' yok niyok kichiwak ka inik ten kimatiloya kichiwaloya kina yehwante.
Kampa yok para'ó okichikawalti niyol wan amo kinek kinkak in Moshé wan Arón,
yok kina WeTatsDyos kinmiliyaya.
23 In para'ó omokwep icha omochi kina amoten okit.
24 Moshte inik egiptiyo' kichiwaloya poso pa itenko atenko pa kitaloskya at pa koniloskya kampa amokwal kina koniloskya at pa in atenko Nilo.
TakokolistePlaga ka in rana'
25 Opanok chikome tonatim pa kimani yewal in WeTatsDyos okichi pa mochiwaskya yEste in atenko Nilo.