6
In WeTatsDyos kili Moshé:
―Ashka tikitas in ten nikchiwilis in para'ó,
kampa hanwel ka chikawaliste anmishkistis pa in tal kampa yok yewal isel anmichilis pa ankisaske.
2 Dyos otahto inak Moshé wan kili:
“Ninewal in WeTatsDyos.
3 Nimoneshti ka AbRaham,
Itsak wan Yakob kina in Dyos kipi chikawaliste,
ma yok amo nimomashti ka yehwante ka ni'itokaliste in WeTatsDyos.
4 Nikchi se taketsaliste melawak inak yehwante,
nikinmili melawak kampa nikinmakaskya in tal pa Kanán,
kampa mochantitikatkaloya kina yehwante amo ompa takatiloya.
5 Niyok nikinkak ininyolkokoliste isra'elita',
aki yehwante inik egiptiyo' kintekipanoltitikat wan nikilnamik notaketsaliste melawak.
6 Yok yewal shi wan shikinmil inik isra'elita':
‘Ninewal in WeTatsDyos,
wan nikinkistis pa in miyak tekipanoliste pa in tal Egipto.
Nikinmakawaltis pa in hyero miyak tekipanoliste yewal kichiwal.
Nihneshtis nochikawaliste wan nikinmakawaltis ka wehwe takokoliste.
7 Nikchiwas pa anmehwante nomasewalme wan newal niyes anmoDyos.
Yok ankimatiske kampa ninewal in WeTatsDyos anmoDyos,
yewal okinkisti pa in takokoliste pa nital egiptiyo'.
8 Annimishwikas pa in tal kampa melawak nikintenewil pa nikinmakaskya AbRaham,
Itsak wan Yakob.
Newal in WeTatsDyos,
annimishmakas anmehwante in tal pa anyes anmotal.’”
9 Kwakin Moshé kintakichiliyaya inik isra'elita',
ma yok amo kinekik kikakik kampa amokwal tamatiloya kampa kipiyaloya miyak tekipanoliste pa kichiwaloskya.
10 Kwakin in WeTatsDyos tahto inak Moshé wan kili:
11 ―Shi,
shikil in para'ó in rey pa Egipto.
Shikil ma kintitan pa kisaske pa in tal Egipto inik isra'elita'.
12 Ma yok Moshé kinankili in WeTatsDyos:
―Kina kwal nishkakis para'ó,
ta inik isra'elita' amo nishneltokal?
Kampa newal amo nihmat nitahto kwal.
13 Ma yok in WeTatsDyos otakets inak Moshé wan Arón wan kintake pa yaloskya tahtoloskya inak isra'elita' wan inak in para'ó rey pa Egipto pa yok kwal kinkistiloskya pa in tal Egipto inik isra'elita'.
Niwichalme Moshé wan Arón
14 Ina yewal tatakewalme ka sesen familya pa Isra'El:
Ininpilwam Rubén,
in Rubén ye nikon we,
Isra'El:
Katkaloya Henok,
Palú,
Hesrón wan Karmí.
Inik katkaloya nifamilya Rubén.
15 Ininpilwam Shime'ón yek:
YemuEl,
Yamín,
Óhad,
Yakín,
Tsohar wan Sha'úl,
yewal katka nikonSiwat kananeya'.
Inik katkaloya ka sesen nifamilya Shime'ón.
16 Ina yewal ni'itokalme ininpilwam Lewí yewal aki yok oyol 137 shiwim hanwel kina takatitiyaloya:
Gershón,
Kehat wan Merarí.
17 Ininpilwam Gershón kati omochiwak wehwe pa ininfamilya' oyek:
Libní wan Shimí.
18 Ininpilwam Kehat,
yewal aki oyol 133 shiwim:
Amram,
Itsehar,
Hebrón wan UsiEl.
19 Ininpilwam Merarí oyek Maheli wan Musí.
Inik oyek ininfamilya' Lewita' kina takatitiwalak.
20 Amram,
yewal oyol 137 shiwim,
mosiyawat inak nitiya YoKabed,
kampa yewal okinpi ome ininpilwam Arón wan Moshé.
21 Ininpilwam Itsehar:
Koré,
Népeg wan Sikrí.
22 Ininpilwam UsiEl:
MishaEl,
ElTsapán wan Sitrí.
23 Arón omonamikti inak EliSabet,
nikonSiwat AmiNadab wan ninohniSiwat Nashón,
wan yewal okinpi nawi ininpilwam:
Nadab,
Abiú,
Ele'Asar wan Itamar.
24 Ininpilwam Koré:
Asir,
ElKaná wan AbiAsap.
Ina oyek ininfamilya' Koré.
25 Ele'Asar,
nikon Arón,
mosiyawat ka se nikonSiwat PutiEl wan yewal kitakatilti se nikonTakat,
Pinehas.
Ina oyek wehwetatakewalme pa sesen familya ka inik lewita',
pa kina sesen otakatik.
26 Arón wan Moshé kat inik yewal kintake in WeTatsDyos pa kinkistiloskya pa in tal Egipto inik isra'elita',
pa sesen tanichikolme neshtiyaloya kina gwacho'.
27 Kat yehwante Moshé wan Arón inik tahtok inak in para'ó,
nirey egiptiyo',
pa kinkawaskya pa kisaloskya inik isra'elita' pa sesen tanichikolme.
Dyos okinnots Moshé wan Arón
―Ninewal in WeTatsDyos.
Shikil in para'ó,
rey pa Egipto,
mochi in ten nimichilis.
30 Wan Moshé kili in WeTatsDyos:
―Newal amokwal nitahto ten nikitos,
kwakin kina kwal nikilis in para'ó?