Moshé wan Arón ni'ishpa para'ó
5
Panok sek tonatim Moshé wan Arón oyak tahtok inak in para'ó wan kilik:
―In WeTatsDyos,
niDyos isra'elita' kito:
“Shikinka nomasewalme pa yaske ompa pa se tal kaha amo'ak mochantiyaya pa kichiwaske mitotiliste fyesta pa newal.”
2 Ma yok para'ó kinnankili:
―Akyewal in WeTatsDyos,
pates nihneltokas wan nikinmakawas pa yaske inik isra'elita'?
Amo nikishmat in WeTatsDyos wan amo nikinkawas pa yaske!
3 Kwakin yehwante kitoloya:
―NiDyos inik hebreteko' owal otishpashal.
Shitishka ma tiyak ompa pa se tal kaha tawak,
pa se ot ka yey tonatim,
pa tiktaliliske tatamakaliste in WeTatsDyos toDyos,
pa amo walas ipa tehwante pa tishkokoltis ka hyero ta'ihyaliste wan tamiktiliste ka teposte.
4 Ma yok in rey Egipto kinmili:
―Moshé wan Arón,
pates amo kinkawal inik masewalme pa tekipanoske?
Ma mokwepak pa inintekipanoliste!
5 Niyok kito para'ó:
―Shikitak nika kat myak masewalme wan anmehwante amo ankinkawal pa tekipanoske.
6 Pa in se tonat in rey para'ó okintake inik egiptiyo' inik tatakewaloya ipa inik isra'elita' wan inik isra'elita' tatakewaloya ipa sek tanichikolme ka tekipanoliste,
kinmiliyaya:
7 “Yahmo shikinmakak inik masewalme sakat pa kichiwaske ladriyo'.
Ma yak kwalikak yehwante iselte!
8 Ma yok shikintakewak ma kichiwak yok kishki myak kichiptikatkaloya ladriyo'.
Kampa amo kinteshmonekis se!
Kampa inik isra'elita' hyero tatsiwil pa tekipanoske,
kampa nishtahtantikat:
“Shitishka pa tiyaske tiktaliliske tatamakaliste toDyos.”
9 Yok shikintekipanoltik hyero miyak,
pa amo ta'ilnamiktiyaske ka inintikwamanaliste in Moshé wan Arón.’”
10 Inik egiptiyo' inik tatakewaloya ipa inik isra'elita' wan inik isra'elita' tatakewaloya ipa sek tanichikolme ka tekipanoliste oyak kinmilik inik masewalme:
“Yok kito para'ó:
‘Yahmo nikinmakas sakat pa kichiwaske ladriyo'.
11 Anmehwante anyaske ankitemoske moselte kaha ankitaske!
Kampa monek pa ankichiwaske in kishki ladriyo' ankichiwaloya wan amo anmishtimowiliske!’”
12 Yok oye kina inik masewalme oyak okipehpenak sakat pa mochi tal Egipto.
13 Inik egiptiyo' inik tatakewaloya ipa inik isra'elita' kinisiwiltiloya wan kinmililoya:
“Shikasiltik in kishki ankichiwaloya pa se tonat pa kimani anmishmakaloya sakat.”
14 Inik egiptiyo' inik tatakewaloya ipa inik isra'elita' okintalililoya inik isra'elita' inik tatakewaloya ipa sek tanichikolme ka tekipanoliste,
kinwetikiloya yehwante wan kinmililoya:
“Kampa yalwa wan ashka amo ankichiwak kishki monek pa ankichiwaloskya,
yewal ankichiwaloya pa se tonat?”
15 Kwakin inik tatakewalme pa se tanichikol ka isra'elita' oyak ka para'ó wan kililoya:
―Tehwante timotekipanolme.
Pates yok tishchiwilitik?
16 Tishtakewal pa tikchiwaske ladriyo' kishki tikchiwaloya pa kimani tishmakaloya sakat,
kampa ashka amo tishmakal sakat!
Motekipanolme ankat tawitekilme!
Momasewalme tewal kichiptikat ta'ihtakoliste!
17 In para'ó tanankili:
―Anmehwante antatsiwil antekipanoske!
Kampa anyok ankitol:
“Shitishka ma tiyak pa tiktaliliske tatamakaliste in WeTatsDyos.”
18 Ashka shimokwepak pa anmotekipanoliste!
Amo anmishmakaske sakat,
ma yok ankipiyal pa ankichiwaske ladriyo' kishki ankichiwaloya pa kimani anmishmakaloya sakat.
19 Inik isra'elita' inik tatakewalme pa se tanichikol ka tekipanoliste amo kimatiloya ten kichiwaloskya kampa hyero moyolkoltitikatkaloya pa kimani kinmilik pa kipiyaloya pa kichiwaloskya ladriyo' yok kina kishki kichiwaloya pa kimani kinmakaloya sakat.
20 Yehwante kinamikik in Moshé wan Arón,
yehwante kichishtikatkaloya pa kiyawak pa kimani tamiloskya tahtoloskya inak para'ó,
21 kinmililoya:
“Kampa yewal in WeTatsDyos ma anmishkokolti ka in ten amokwal antishchiwilitikat!
Ashka in para'ó wan nitekipanolme tishihyal!
Anmehwante anmoselte ankinmakak in teposte pa ininmahwam pa tishmiktiske!”
Moshé kitahtanili Dyos
22 Kwakin Moshé kitahtanili WeTatsDyos wan kili: