3 kwah okit niwetatakewan kina katka in WeTatsDyos wan kina kipalewiyaya Yosé pa mochiten kichiwaya kisaya kwal.

4 Kwakin Potipar kitaya Yosé kina kwal kichiwaya,

kitokayolti pa nikal kampa okitake pa takwitaptiyaskya mochi kishki tapiyaya.

5 Pa in tonat kimani Potipar kitakawili pa kikwitaptiyaskya nikal wan pa mochi kishki tapiyaya.

Wan in WeTatsDyos kimashtiyaya Potipar,

yok kina pa nikal wan yok kina pa nitashosholtik.

6 Yok Potipar in egiptiyo okitakawil pa takwitaptiyaskya Yosé pa mochi kishki tapiyaya,

yahmo kimatiya pa kishki tapiyaya hanwel ten kikwaskya.

Yosé katka se takat kwal tachiyaya.

7 Kwah panok myak tonatim,

nisiwa niwetatakewan kwal okit Yosé wan kili:

―Shimotek nonak.

8 Yosé amo kinek wan kili:

―Ka newal onka mochi yewal niyashka nowetatakewan pa nikal,

wan yewal amoten ki'ilnamik pa nikal mochi yewal nishtake niyashka pa nikitatiyas.

9 Amo onka okse yok wetatakewan kina newal.

Wan amoten nishtatsotili pa kishki tapi,

kampa hanwel tewal,

kampa tewal ti'isiwa.

Kina kwal nikchiwaskya ten amokwal wan nimokatsawiliskya inak Dyos?

10 Hanse tonatim tahtowaya ka Yosé amo kinek motek ka yewal,

amo momakawilti pa yeskya ka yewal.

11 Pa se tonat,

Yosé kalak kalitik pa kal pa kichiwaskya nitikipanoliste,

amo'ak katka pa kalitik.

12 Wan in siwat kikitski Yosé pa nishashal kili:

“Shiwal shimotek nonak!”

Ma yok Yosé,

kikawil nishashal pa nimahwam in siwat,

motal pa kiyawak in kal.

13 Kimani yewal okit kina okikawil nishashal pa nimahwam wan motaloti okis pa in kal,

14 in siwat okinnots yehwante tikipanolme pa in kal wan kinmili:

“Shikitak!,

in hebreteko yewal notaka otishwalikil kinekiya tishpenawaltiskya tehwante.

Okalak nika kinek motekaskya nonawak,

wan wehwe nitsats.

15 Kwah nishkak nitsats,

kika nishashal ka newal wan motaloti pa kiyawak.”

16 Wan yewal okital nishashalme Yosé sela pa kimani nitaka walmokwepaskya icha.

17 Kwakin kinawati kili:

“In tikipanol hebreteko yewal titishwalikil owal ka newal kinek omotek nonawak.

18 Kwah nitsats pa nishpalewiloskya,

okika itakemtel nahnewal wan omotal pa kiyawak.”

19 Kwah niwetatakewan kikak kina kitakichili nisiwa,

yok onishchiwil motikipanol,

yewal hyero kwalan

20 kikitskik Yosé kitsakwak pa in kalitik kaha kintsakwaloya yehwante nitakam in we para'ó.

Ompa kitsakwak Yosé

21 katka WeTatsDyos inak Yosé kaha tatsakwal wan ki'ihniliyaya.

Okichi kampa kwal kiwetsiskya in wetatakewan pa in tatsakwal,

22 niwe nitatsakwalme kimak Yosé pa kinkwitawiskya moshte yehwante ompa katkaloya,

kitaliyaya Yosé pa kinkwitawiskya mochi in tikipanoliste yewal mochiwaya ompa kalitik.

23 In wetatakewan kaha tatsakwal amo monekiya pa takwitawiskya,

amoten pa kishki takwitaptikatkaya Yosé kampa katka in WeTatsDyos inak yewal,

wan kiyawiya kwal pa mochiten yewal kichiwaya.